“Шатахууны үнийг автоматаар тогтоох механизм” нэвтрүүлж байна

Монгол Улсын Засгийн газраас ОУВС-тай хамтран хэрэгжүүлж буй “Өргөтгөсөн санхүүжилтийн хөтөлбөр”-ийн хүрээнд манай улсад “Шатахууны үнийг автоматаар тогтоох механизм” нэвтрүүлж байна.

Шатахууны үнийг хилийн үнэ болон валютын ханштай уялдуулан автоматаар тооцдог дээрх механизмыг нэвтрүүлэх ОУВС-гийн Техник туслалцааны ажлын хэсэг өнгөрсөн дөрөвдүгээр сарын 11-29-нд манай улсад ажиллаж, шатахууны үнийг автоматаар тогтоох томьёолол болон аргачлал, зөвлөмж гаргаж Сангийн яаманд танилцуулаад байна.

Дээрх механизмыг нэвтрүүлснээр, дэлхийн зах зээл дээрх газрын тос, газрын тосны бүтээгдэхүүний үнийн хэлбэлзэл болон тухайн сард нийлүүлэх шатахууны жижиглэнгийн үнийн мэдээллийг нийтэд ил тод, тогтмол мэдээлж байх юм. Ингэснээр улстөржилтөөс шалтгаалан үнэд нөлөөлдөг байдал болон ямар нэг дэмжлэг үзүүлдэг ил болон далд татаасыг зогсоож, шатахууны үнийн огцом өөрчлөлтийг багасгаж, зах зээлийн зарчимд уялдуулан нийцүүлэх юм. Энэ талын Дэд ажлын хэсгийг Монгол Улсын Шадар сайдын тушаалаар өнгөрсөн хоёрдугаар сард байгуулан ажиллаж байна. Дэд ажлын хэсэг нь улсын хэмжээнд шатахууны чанарын хяналтын тогтолцоог бүрдүүлэх үүднээс холбогдох байгууллагуудын ажлын уялдаа холбоог сайжруулан нефтийн бүтээгдэхүүний импорт, тээвэрлэлт, ачилт буулгалт, чанар, жин, хэмжээний мэдээ, мэдээллийг харилцан шуурхай солилцох хяналтын нэгдсэн систем бий болгох юм. Энэ талаар мөн судалж, санал, дүгнэлт гарган холбогдох хууль, эрхзүйд тусган боловсронгуй болгохоор ажиллаж байна. Дээрх ажлын дүнг энэ тавдугаар сард Засгийн газрын хуралдаанд танилцуулах юм.

Тодруулга:Дөрөвдүгээр сарын 30-ны байдлаар улсын хэмжээнд дунджаар ердийн хэрэглээний 49 хоногийн газрын тосны бүтээгдэхүүний нөөцтэй байна. Үүнээс А-80 автобензин 109, Аи-92 автобензин 49, дизелийн түлш 44, ТС-1 онгоцны түлш 27 хоногийн нөөцтэй байна. Засгийн газрын 2018 оны шийдвэрийн дагуу шатахуун импортлогч 26 ААН 116.5 мянган тонноос багагүй хэмжээний газрын тосны бүтээгдэхүүний өөрийн нөөцийг бүрдүүлж байна.

Улсын хэмжээнд шатахуун импортлох тусгай зөвшөөрөлтэй 100 гаруй компани ОХУ, БНХАУ, БНСУ зэрэг 18 орноос 2019 оны дөрөвдүгээр сарын 30-ны өдрийн байдлаар өссөн дүнгээр 472.3 мянга гаруй газрын тосны бүтээгдэхүүн импортлож, 101 агуулах, 1302ШТС-аар дамжуулан Монголын хэрэглэгчдийг шатахуунаар хангаж байна.