ЭМЯ: 7 хүнийг тусгаарлаж, коронавирусийн халдвар авсан эсэхийг шинжилж байна

Шинэ коронавирусийн халдварын талаар ЭМЯ-аас өдөр бүр мэдээлэл хийж байгаа билээ.  Тэгвэл өнөөдөр ээлжит мэдээллээ хийж, зөвлөмж өглөө.  Хуралд ЦЕГ-ын нийтийн хэв журам хамгаалах газрын дарга Эрдэнэбат, ОБЕГ-ын Удирдлагын газрын эрүүл мэндийн газрын дарга Хонгор, ДЭМБ-ын мэргэжилтэн О.Ариунтуяа, ХӨСҮТ-ийн захирал Д.Нямхүү нар оролцлоо. 
Хурлын эхэнд ЭМЯ-ны ОНХТШУХ-ийн дарга Д.Нарангэрэл  "Шинэ коронавирусийн халдвар өдрөөс өдөрт нэмэгдсээр байна. Манай улсад одоогоор энэ вирусийн тохиолдол бүртгэгдээгүй. Гэхдээ сэжигтэй тохиолдлууд нэлээд бүртгэгдлээ.  100 гаруй сэжигтэй тохиолдол бүртгэгдэж, тандалт судалгаа, лабораторийн шинжилгээ хийлээ.  ЭМЯ-аас маш олон зөвлөмжийг хүргүүлсэн. Тэр дундаа өвчлөл гарсан улсууд руу зорчихгүй байхыг нэгдүгээр сарын 6-ны үед мэдээлж, зөвлөмж хүргүүлсэн.  Мөн далайн гаралтай амьтны захаар явахгүй байхыг зөвлөсөн.   Гэвч иргэд зөвлөмжийг хүлээж авахгүй өвчлөл гарсан улс руу маш олноороо зорчиж байна.  Үүний улмаас эрсдэл нэлээд хэмжээгээр нэмэгдэж байгаа. 
Нийслэлээс гадна, Өвөрхангай, Дархан-Уул, Хөвсгөл, Орхон зэрэг аймгуудаас нэгдүгээр сарын 23-аас хойш 20 гаруй иргэн өвчлөл гарсан бүс нутаг руу зорчсон, аялсан байна.  Тэдгээр хүмүүсээс халуурах, ханиалгах, суулгах гэж зэрэг ямар нэгэн зовиур, сэжигтэй шинж тэмдэг илэрч, эрүү мэндийн байгууллага тусгаарласан. Энэ бол Монголын нийт иргэдийг эрсдэлд оруулж буйн жишээ. 
Хамгийн сүүлд гэхэд, Хөвсгөл аймгийн харьяат иргэн Замын-Үүдээр зорчоод, өнөөдрийн байдлаар тэр хүнтэй нэгдүгээр хавьталд орсон 109 хүнийг тусгаарлах арга хэмжээг авч байна. Энэ нь Эрүүл мэндийн байгууллагууд, цагдаа, онцгой, мэргэжлийн хяналтынхны ажлын ачааллыг нэмж байгаа. Түүнээс гадна, 109 хүнийг тусгаарлахаар хоолн ундаар хангахаас авахуулаад эдийн засгийн ачааллыг нэмж байна. Энэ мэт олон асуудал дагаж үүсэж байгааг иргэд ойлгох хэрэгтэй" хэмээлээ. 
ДЭМБ-ын мэргэжилтэн О.Ариунтуяа "Хоёрдугаар сарын 12-ны 10:00 цагийн байдлаар нийтдээ 45168 хүн короновирусээр өвчилж, 1115 хүн нас барсан байна. Олон улсын баг Хятадад ажиллахаар бэлтгэж байгаа. Дэлхийн эрүүл мэндийн баг хоёрдугаар сарын 10-ны өдөр очиж ажиллаж байна. Хубэй мужаас бусад газар халдвар авсан хүмүүсийн нас баралтын хувь 0.2. Харин хэнээс халдвар авсан мэдэгдэхгүй тохиолдол 10-аад орон бүртгэгдээд байна. Энэ нь вирусийн халдвар хүн амын дунд тархсан байх магадлалтайг харуулж байгаа юм. 
Манай орны хувьд урьдчилан сэргийлэх бүхий л арга хэмжээг авч ажиллаж байна. Халдварын тохиолдол хараахан бүртгэгдээгүй учраас урьдчилан сэргийлэх, бэлэн байдал хангах чиглэлээр ажиллаж байгаа.  Хоёр хоногийн өмнө хийсэн эрсдэлийн үнэлгээгээр маш өндөр гэж гарсан. Цаашид халдварын тохиолдол гарлаа гэхэд ажиллах нөхцлийг хангахаар төлөвлөж ажиллаж байна" хэмээв. 
ЦЕГ нийтийн хэв журам хамгаалах газрын дарга Эрдэнэбат "Цагдаагийн байгууллагаас Улсын онцгой комисс, Нийслэлийн Засаг даргын шийдвэр, захирамжийн биелэлийг хангах чиглэлээр холбогдох арга хэмжээг авч хэрэгжүүлж байна. Улаанбаатар хот руу нэвтэрдэг 9 хяналт, шалгалтын цэгт хамтарсан баг ажиллаж, хяналт, тандалтыг хийж байгаа.  Түр хязгаарлах шийдвэр гарсан ч иргэд дагаж мөрдөхгүй, үйл ойлголцол, маргаан үүсгэх байдал гаргаж байна. Тиймээс иргэдэд түр хязгаарлалт тавьсан энэ үед ухамсартай хандаж, заавар, зөвлөгөөг дагахыг анхааруулж байна" хэмээлээ. 
ХӨСҮТ-ийн захирал Д.Нямхүү "2020 оны хоёрдугаар сарын 10-ны өдөр Хөвсгөл аймагт нэг иргэнийг тусгаарласан. Тэр хүний шинжилгээний хариу сөрөг гарсан.  Мөн өдөр Гашуунсухайт боомтоор орж ирсэн 12 хүний шинжилгээ манайд ирсэн.  Шинжилгээний хариу мөн сөрөг гарсан байна.  Хоёрдугаар сарын 11-ий өдөр 7 хүнийг тусгаарласан. ХӨСҮТ, Сүхбаатар дүүрэгт тус бүр нэг. Баян-Өлгийд нэг, Сүхбаатар аймаг, Замын-Үүдэд тус бүр хоёр хүнийг тусгаарлаад, шинжилгээ хийж байна.  31 хүүхдийн тусгаарлах хугацаа дуусах дөхөж байгаа.  Одоогоор янз бүрийн шинж тэмдэг илрээгүй байгаа" хэмээсэн юм. 
Мөн ЭМЯ-аас өвчлөл гарсан бүс нутаг руу зорчихгүй байхыг дахин анхаарууллаа. Түүнээс гадна, иргэд согтууруулах ундаа ууж, "Би Ухань хотоос ирсэн" гэх мэтээр худлаа мэдээлэл өгч, эрүүл мэндийн байгууллагыг чирэгдүүлэх тохиолдол их гарч байна. Тиймээс иргэд ухамсартай байхыг ч анхаарууллаа.  скачать dle 12.0