Генерал цолыг нийт 185 цэргийн зүтгэлтэн хүртжээ

Монгол Улсад генерал цол олгож эхэлсний түүхт 76 жилийн ой, "Монгол генералуудын өдөр" өнөөдөр тохиож байна.

1944 оны 4 дүгээр сарын 28-нд БНМАУ-ын Ардын Сайд нарын Зөвлөлийн тогтоолоор цэргийн гарамгай 11 зүтгэлтэнд  анх “ГЕНЕРАЛ” цол олгожээ. Улмаар эх орныхоо тусгаар тогтнол, халдашгүй бүрэн эрх, аюулгүй байдлын төлөө зүтгэсэн цэрэг эрсээ хүндэтгэн дээдлэх, дайчин уламжлалыг нь үр хойчдоо өвлүүлэх, монгол бахархлыг түгээн дэлгэрүүлэх зорилгоор "Монгол генералуудын өдөр"-ийг тэмдэглэж ирсэн юм. Жил бүрийн энэ өдөр төр, засгаас генералууддаа хүндэтгэл илэрхийлдэг уламжлалтай ч энэ жил дэлхий нийтээр тархсан шинэ короновирусний халдвараас сэргийлэх үүднээс хүндэтгэлийн ёслол зохион байгуулах боломжгүй байгаа юм.

Ташрамд дурдахад, анх 11 хүнд генерал цол олгосноос хойш 185 цэргийн зүтгэлтэн энэхүү эрхэм цолыг хүртсэний дотор өдгөө 91 нь энх тунх байгаа бөгөөд хамгийн өндөр настай нь 96 настай хурандаа генерал С.Лувсангомбо байна. Генералуудаас 27 нь төрийн цэргийн болон үндэсний аюулгүй байдлыг хангах чиг үүрэг бүхий байгууллагадаа үүрэг гүйцэтгэж байгаа юм. Генерал цолтнууд дотор маршал нэг, армийн генерал нэг, хурандаа генерал найм, дэслэгч генерал 20, хошууч генерал 110, бригадын генерал 41 байна. Үүнээс БНМАУ-ын баатар цолтон зургаа, Хөдөлмөрийн баатар гурав, дайн, байлдаанд оролцсон 34, төрийн өндөр албан тушаалыг хашсан 15, сансрын нисгэгч нэг, эрдмийн зэрэг цолтой 38, энхийг сахиулах ажиллагаанд үүрэг гүйцэтгэсэн болон олон улсын байгууллагад ажилласан 10, БНМАУ-ын төрийн тэргүүн 1, УИХ (АИХ)-ын гишүүн (депутат) 69, төрийн сайд 20, цэргийн дипломат 31 байдаг ажээ.скачать dle 12.0