Оксфордын их сургуулийн вакцин нааштай үр дүн үзүүллээ

Их Британийн Оксфордын их сургуульд гарган авсан вакцин дархлааны хариу урвал үзүүлжээ. 1077 хүн оролцсон туршилтаар тарилга тэдний биед коронавирустэй тэмцэх эсрэг биет, “Т” эс үүсгэж буй нь харагджээ.


Одоогийн байдлаар гарсан үр дүн маш их итгэл найдвар төрүүлж байгаа боловч халдвараас хамгаална гэж үзэх болоогүй байгаа бөгөөд өргөн хүрээг хамарсан туршилтыг явуулж байгаа ажээ.

Их Британи 100 сая тун вакциныг хэдийн захиалжээ.

Вакцин хэрхэн үйлчилдэг вэ?
“ChAdOx1 nCoV-19” нэртэй вакциныг урьд байгаагүй хурдан хугацаанд бүтээж байгаа юм. Уг вакциныг шимпанзе сармагчинд томуу үүсгэдэг вирусийн генийг инженерчлэн бүтээжээ. Эрдэмтэд уг вирусийг ихээхэн өөрчилж, хүнд халдварлах боломжгүйгээс гадна коронавирустэй ижил харагддаг болгожээ.

Тэд коронавирусний “өргөст уургийн” генийн зааврыг вакциндаа шилжүүлсэн бөгөөд уг уураг нь вирус хүний биеийн эсүүдэд нэвтрэхэд голлох үүрэг гүйцэтгэдэг байна. Ингэснээр вакцин коронавирустэй төстэй зүйлийг үүсгэснээр дархлааны тогтолцоо үүнтэй хэрхэн тэмцэхээ сурах ажээ. 

Эсрэг биет, “Т” эс гэж юу вэ?
Шинэ коронавирусний судалгаануудын дийлэнх нь эсрэг биетэд голчлон анхаарч байгаа боловч эсрэг биетүүд нь хүний биеийн дархлааны хамгааллын нэгхэн хэсэг юм.

Эсрэг биетүүд нь дархлааны тогтолцооны бүтээсэн жижиг уургууд бөгөөд вирусний гадаргууд наалдах ажээ. Саармагжуулах эсрэг биетүүд нь коронавирусийг идэвхгүй болгох чадвартай байна.

“Т” эс нь цусны цагаан эсийн нэг төрөл бөгөөд дархлааны тогтолцоог зохицуулахад тусалж, биеийн аль эсүүд халдвар авсныг илрүүлж, тэдгээрийг устгадаг ажээ.

Бараг бүх үр дүнтэй вакцин нь эсрэг биет болон “Т” эсийн аль алийг үүсгэдэг байна.

Оксфордын вакцины хувьд, тарилга хийснээс хойш “Т” эсийн түвшин 14 хоногийн дараа, эсрэг биетийн түвшин 28 хоногийн дараа хамгийн өндөр хэмжээнд хүрчээ. “Lancet” сэтгүүлд нийтэлсэн судалгаанд тэмдэглэснээр, тэдгээрийг хэдий хугацаанд үйлчлэхийг судлаачид хараахан тогтоогоогүй байгаа ажээ.  

“Бид саармагжуулах эсрэг биет, “Т” эсүүд үүссэн талаарх үр дүнг нийтэлж буйдаа маш их баяртай байна” гэж Оксфордын их сургуулийн судалгааны багийн профессор Эндрью Поллард “ВВС” сувагт мэдээлжээ. “Вакцин үйлчлэх эсэх, хамгаалалт үүсгэх эсэхийг хүн бүхэн мэдэхийг хүсэж байгаа. Бид үр дүнг хүлээж байна” гэж тэрбээр нэмж хэлжээ.

Судалгаагаар тогтоосноор, нэг тун вакцин хийсний дараа хүмүүсийн 90 хувьд саармагжуулах эсрэг биет үүсжээ. Харин 10 хүнд хоёр дахь тунгийн дараа үүссэн бөгөөд бүгдэд нь саармагжуулах эсрэг биет үүсжээ.

“Бид халдвараас хамгаалахад ямар түвшний эсрэг биет, “Т” эс үүсгэх шаардлагатайг мэдэхгүй байгаа боловч хоёр дахь тунгаар хариу урвалыг боломжит дээд хэмжээнд хүргэж чадна” гэж Э.Поллард мэдээлсэн байна.

Вакцин аюулгүй юу?
Тийм ээ, гэвч сөрөг нөлөөнүүд бий.

Вакцин хийлгэснээр ноцтой сөрөг нөлөө үүсэхгүй боловч туршилтад оролцсон хүмүүсийн 70 хувьд халуурах юм уу толгой өвдөх шинж тэмдэг илэрчээ.

Судлаачдын мэдээлснээр, үүнийг “парацетамол” ууснаар зохицуулах боломжтой ажээ.

“Бид өөрсдийн гарган авсан вакциныг “COVID-19” цар тахлын эсрэг үр дүнтэй гэдгийг батлах хүртэл гүйцэтгэх ажил олон байгаа хэдий ч эхний үр дүнгүүд итгэл найдвар төрүүлж байна” гэж Оксфордын их сургуулийн профессор Сара Гилберт хэлжээ. скачать dle 12.0