Амиа алдсан цэрэг кросст гүйж ирээд амьсгал хураажээ

Дорноговь аймгийн Зүүнбаян дахь Зэвсэгт хүчний 336 дугаар ангид алба хааж байсан цэрэг энэ сарын 22-ны өдөр амь насаа алдсан хэрэг гарсан талаар бид өмнө нь мэдээлсэн.
 

Хэргийн талаар Цагдаагийн ерөнхий газрын Хэвлэл мэдээллийн төвийн ажилтан М.Мөнхшүр“Цагдаагийн байгууллагад 2019 оны нэгдүгээр сарын 22-ны 17:30 цагт дуудлага ирсний дагуу шалгахад, 2018 оны арваннэгдүгээр сард хугацаат цэргийн албанд татагдсан, Орхон аймгийн харьяат, 19 настай А гэгч нас барсан нь тогтоогдсон. Талийгаачийн ар гэрийнхний зүгээс бусдад зодуулсан байж болзошгүй гэсэн үндэслэлийг тавьж байна. Цагдаагийн байгууллага урьдчилсан дүгнэлтээр "Гадны нөлөөгүй" гэсэн мэдээллийг авсан. Гэхдээ бид ар гэрийнхний гаргаж буй мэдээллийг эцэслэн шалгах үндсэн үүргийнхээ дагуу ажиллана. Нарийвчилсан шинжилгээ хийлгэхээр эсийн шинжилгээ авсан. Хуульд заасан хугацаа буюу 21 хоногийн дотор дүгнэлтийн хариу гарна. Үүн дээр үндэслэн ямар шалтгаанаар амиа алдсаныг тогтооно " гэсэн юм. 

 
Харин талийгаачийн ах Б.Эрдэнэбат “Дүү маань эмчийн үзлэгээр орж, эрүүл саруул гэгдээд цэргийн албанд явсан. Жудо бөхөөр хичээллэдэг. Гүйлт зэргийг тоохооргүй хүүхэд. Хэрэг болсон өдөр гар утасны хэргээс болоод 17 цэргийг шийтгэж, гүйлгэсэн юм билээ. Цэргүүд багтраад байна, цааш гүйж чадахгүй нь гэхэд тус ангийн ахлагч М зодож гэмтээн, ухаан алдаж унахад нь эмч дуудсан ч аль хэдийн амьсгал хураасан байсан. Цэргийн ангиас ажил явдлын хөрөнгө мөнгө гаргаж өгнө гэж байгаа ч бид нарт тэр мөнгө хэрэггүй. Хэрэг гарсан 22-ны орой бид энэ талаар мэдэж, маргааш нь цэргийн ангид очиж, камерийн бичлэг үзсэн. Эмнэлгийн тусламж үзүүлж, амь насыг нь аврах боломж байсан ч тэгээгүй юм билээ. Өнөөдөр /2019.01.24/ талийгаачийнхаа шарилыг Орхон аймагт авчирлаа. Ар гэрийнхнээс нь зөвшөөрөл авалгүй задлан шинжилгээнд оруулсан байсан. Ерөөсөө л дүүг минь зодож алчихаад, одоо дараад өнгөрөх гэж байна” гэлээ.
 
Эндээс харахад, цагдаагийн байгууллага болон талийгаачийн ар гэрийнхэн хоёр өөр байр суурьтай байна. Харин цэргийн анги дахь эх сурвалжийн мэдээлж буйгаар, цэргийн ангид гар утас хэрэглэхийг хориглодог бөгөөд хэсэг цэргүүд гар утас ашиглаж, ангийн дотоод журам зөрчсөн байна. Улмаар зөрчил гаргасан цэргүүдэд сахилгын арга хэмжээ авч, хөнжил пүүгээг нь үүрүүлэн кроссонд гүйлгэсэн бололтой. Цаг гаруй хугацаанд гүйсний эцэст талийгаач багтарч унажээ. Энэ үед ангийн ахлагч М түүнийг үргэлжлүүлэн гүйхийг шаардсан ч талийгаач таталт өгч, удалгүй амьсгал хураажээ. Хэрэг гарсан даруйд Зүүнбаянгийн цэргийн ангийн бүх алба хаагчдыг бэлэн байдалд дуудаж, цагдаагийн байгууллага үзлэг, шалгалт хийж эхэлсэн гэх мэдээллийг өгч байна.  
 

Дээрх хэргийг Дорноговь аймгийн цагдаагийн газарт шалгаж байгаа ба мөрдөн шалгах ажиллагааны урьдчилсан дүгнэлтээр, байлдагч А-гийн биед гадны нөлөө илрээгүй бөгөөд эцсийн шинжилгээг хийж байгаа гэв. Энэ хэрэгт Зэвсэгт хүчний 336 дугаар ангийн захирагч Д.Өлзийбаяр, ахлагч н.Мандалхангай нарыг холбогдуулан шалгаж байна. Мөн тухайн өдөр хамт байсан байлдагч нараас мэдүүлэг авч эхэлжээ.

 
Амь хохирогчийн ар гэрийнхэн, талийгаачийн цогцосны зургийг өнөөдөр олон нийтэд ил болгосон. Тэгвэл цогцост үүссэн толбоны талаар Шүүхийн шинжилгээний шинжээч эмч дараах тайлбарыг хийж буй. Хавтаст хэргийн материалтай хохирогчоор тогтоогдсон хуулийн этгээд хохирогчийн өмгөөлөгч, ар гэрийнхэн танилцана гэсэн заалт бий. Мөн хавтаст хэрэгт авагдсан хохирогчийн зураг болон ямар нэг баримтыг бусдад буюу олон нийтэд задруулахгүй байх гэсэн хуулийн заалт байдгийг албаныхан санууллаа. 

 
Эх сурвалж тухайн зурган дээр харагдаж байгаа нөхцөл, биед харагдаж буй хэсэг нь цогцост үүссэн хүүрийн толбо гэж тайлбарлав. Үүнийг иргэд бусдад зодуулсан, зодуулсны улмаас гэмтэл үүссэн хэмээн ярьж, ойлгож байгаа. Хүн амьсгал хураасны дараа биед юүлэгдэж үлдсэн цусыг хүүрийн толбо гэж үздэг аж. Цагдаагийн байгууллага болон шүүх эмнэлгийнхэн иргэн амиа алдсан хэргийн газарт очсоныхоо дараа эхлээд хүүрийн толбо дээр нь дарж үзээд, хэр хугацаанд амиа алдах нөхцөл байдал үүссэн зэргийг тогтоодог ажээ.   
"Иргэд сошиал дахь зургийг хараад бусдад зодуулсан байна гэсэн ташаа мэдээлэл, ойлголт тарааж байна" гэж Шүүхийн шинжилгээний шинжээч тайлбарлалаа. скачать dle 12.0