Налайхын шинэ замын хөдөлгөөнийг нээж байна
Гачууртын уулзвараас Налайх Чойрын уулзвар хүртэлх 20.9 км авто замын хөдөлгөөнийг өнөөдөр нээж байна. Уг замыг БНХАУ-ын Засгийн газрын хөнгөлөлттэй зээлийн хөрөнгөөр хэрэгжүүлсэн юм.
Гачууртын уулзвараас Налайх Чойрыэн уулзвар хүртэлх энэхүү замыг гүйцэтгэгчээр "Синохайдо Лимитед Корпорейшн" компани ажиллажээ. Нийтдээ дөрвөн эгнээ зорчих хэсэгтэй, явган хүний таван гүүр, долоон байршил машины зогсоолтой, ус зайлуулах хоолойтой, гэрэлтүүлэг сайтайг танилцуулгын үеэр онцоллоо.
Нээлтийн ажиллагаанд Монгол Улсын Ерөнхий сайд У.Хүрэлсүх, БНХАУ-аас Монгол Улсад суугаа Онц бөгөөд бүрэн эрхт Элчин сайд Шин Хаймин, нийслэлийн Засаг дарга С.Амарсайхан, Зам тээврийн хөгжлийн сайд А.Энх-Амгалан болон албаны бусад төлөөлөгчид оролцож байна.
Ерөнхий сайд У.Хүрэлсэх "Өмнө нь бага зардлаар урт зам барихыг илүүд үздэг байсан бол одооноос ашиглалтын хугацаа урттай, чанартай зам барихыг хичээдэг болсон. Энэ зун бороо хур ихтэй байсан тул замын ажилд 29 хоног алдсан ч монгол, хятадын ажилчид хичээнгүйлэн ажилласны үр дүнд хугацаандаа ашиглалтад оруулж байна.
Энэхүү ажилд гар бие оролцсон бүх хүнд талархлаа илэрхийлье.
Гэхдээ энэ зам нь хурдны зам биш гэдгийг анхаарах ёстой. Замын хөдөдгөөний дүрмээ чанд сахихыг иргэддээ анхааруулж байна. Бусдыг хүндлэн дураараа биш дүрмээрээ зорчихыг хүсье. Алтан шаргал зам нь өлзийтэй сайн байх болтугай" хэмээн нээлтийн үеэр хэллээ.
Нийслэлийн Засаг дарга С.Амарсайхан "Санхүүгийн эх үүсвэрийг нэмэгдүүлж, богино хугацаанд чанартай ажиллах зохион байгуулалтыг хийж дэмжсэн Ерөнхий сайд У.Хүрэлсүхэд талархлаа илэрхийлье.
Нойтон бороо, халуун өдөр, сэрүүн оройд хүчээ дайчлан ажилласан нийт ажилтан албан хаагчдадаа нийслэлчүүдийнхээ өмнөөс талархлаа илэрхийлье.
Энэ бол хөгжлийн зам юм. Учир нь Тэрэлж, Цонжин Болдог гэхчлэн цаашлаад манай улсын түүх дурсгалын олон чиглэлд энэ замаар зорчих болно.
Мөн эрүүл мэнд спортын зам гэж болно. Учир нь энд Яармагийн гүүрээс Налайх, Цонжин Болдог хүртэлх дугуйн аялал хийх боломжтой болж байна" гэв.
ШУУД ҮЗЭХ:
ВИДЕО 2:ВИДЕО 1:
550 сэтгэгдэл