Алтай Таванбогдод 260, Говийн их дархан цаазат газарт 185 боодол өвс тавьжээ

Байгаль, цаг уурын өөрчлөлт зэрэг олон хүчин зүйлээс болж зэрлэг ан амьтны идэш тэжээл хомсдох, тоо толгой хорогдох, устаж үгүй болох эрсдэлээс урьдчилан сэргийлж төр, хувийн хэвшлийн байгууллагууд олон ажил хийж байна. 

Энэ жил ихэнх нутгаар өвөлжилт хүндэрсний улмаас ан амьтны идэш, тэжээл хомстож айлын хот, суурин газарт орж ирэх тохиолдол цөөнгүй гарч байна. Тиймээс Монгол Алтайн нурууны улсын тусгай хамгаалалттай газрын хамгаалалтын захиргааны албан хаагчид Алтай Таванбогдын байгалийн цогцолборт газрын “Шивээт хайрхан”, “Талдгийн их уул”, “Сонгионт”, “Мухар”, Сийлхэмийн нурууны байгалийн цогцолборт газрын “А”, ”Б” хэсэг, “Хүрэнхайрхан”, “Хармагнай” орчимд Аргаль, Янгир, Халиун буга зэрэг амьтдын идэш тэжээл, амьдрах орчныг тэтгэх зорилгоор зургаан удаагийн давтамжтайгаар найман газарт 260 боодол өвс, есөн тонн давс тавьсан байна.

Түүнчлэн Говийн их дархан цаазат газрын “Б” хэсгийн нийт нутаг дэвсгэрт хяналт шалгалт, мониторинг хийжээ. Дархан цаазат газрын нийт нутаг дэвсгэрт их хэмжээний цас тогтож, тал газарт 15-20 см, уулархаг болон гуу жалганд 40-52 см зузаан цастай байна. Тэгвэл Хонь ба Тахь усны баянбүрд газарт сэргээн нутагшуулж байгаа тахийн 25 тахь сүргийн 273 тоо толгойд 185 боодол өвс тавьжээ.

Ташрамд дурдахад, Говийн их дархан цаазат газрын “Б” хэсэгт Говь-Алтай, Ховд аймгийн таван сумын нутаг дэвсгэр хамаардаг юм. скачать dle 12.0