Б.Лхагвасүрэн: Зээлийн хүү 2.5 хувиар буурсан

УИХ-ын Эдийн засгийн байнгын хорооны өнөөдрийн хуралдаанаар “Зээлийн хүүг бууруулах стратеги батлах тухай” 2020 оны 8 дугаар сарын 28-ны 21 дүгээр тогтоолын хэрэгжилтийн явцын талаар мэдээлэл сонслоо. 


Монголбанкны ерөнхийлөгч Б.Лхагвасүрэн, “Стратегийг хэрэгжүүлэхээр холбогдох байгууллагуудын төлөөлөгчдийг оролцуулсан ажлын баг ажилласан. Ажлын үр дүнд хүү тасралтгүй буурч, тодорхой түвшинд хүрээд байна. 2021 оны эцсийн байдлаар зээлийн дундаж хүү стратеги баталсан үе буюу 2020 оны 8 дугаар сарынхтай харьцуулахад 2.5 хувиар, өнгөрсөн оныхоо мөн үеийнхтэй харьцуулахад 1.3 хувиар буурч, өнөөдрийн байдлаар жилийн 14.5 хувь боллоо. Стратеги хэрэгжүүлэх төлөвлөгөөний дагуу 2023 оны эцэст сарын 1 хувь буюу жилийн 12 хувьд хүрэх зорилт тавьсан. Энэ бол дундаж хүү. Хэрэв Засгийн газраас хэрэгжүүлж байгаа бусад хөтөлбөрийн зээлийн хүүг үүнд оруулж тооцвол дундаж хүү 13.8 хувь буюу сарын 1.15 хувьд хүрч буураад байна” гэв. 


Танилцуулга мэдээлэлтэй холбогдуулж Улсын Их Хурлын гишүүн Г.Амартүвшин, Ч.Хүрэлбаатар, О.Цогтгэрэл, М.Оюунчимэг, Ж.Ганбаатар нар асуулт асууж, хариулт авав.

Дараа нь УИХ-ын гишүүн Х.Баделхан, Б.Баттөмөр, Х.Булгантуяа нарын өргөн мэдүүлсэн Хот, суурины ус хангамж, ариутгах татуургын ашиглалтын тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцэж, дэмжлээ.

Хуулийн төслийг УИХ-ын гишүүн Х.Баделхан танилцуулав. Танилцуулгадаа хуульд нэмэлт, өөрчлөлт оруулснаар нутгийн захиргааны байгууллагын ус хангамж, ариутгах татуургын талаарх хууль зүйн зарим зохицуулалт тодорхой болно гэдгийг онцлов. Мөн ус хангамж, ариутгах татуургын барилга байгууламж, инженерийн шугам сүлжээний ашиглалтыг сайжруулан хүн амыг стандартын шаардлага хангасан баталгаат унд, ахуйн усаар хангах, хэрэглээнээс гарсан бохир усыг татан зайлуулах, ариун цэврийн байгууламжаар хангах нөхцөлийг дээшлүүлж, цэвэр усны аж ахуйн нэгж, байгууллагын үйл ажиллагаанд тавих хяналтыг сайжруулах зохицуулалт тусгасныг онцлов. Түүнчлэн хүн амыг стандартын шаардлага хангасан ундны усаар хангах нэгдсэн зохицуулалттай болох, эмнэлэг, эрүүл мэндийн байгууллагын болон үйлдвэрийн хэрэглээнээс гарсан олон нийтэд халдварт өвчин тараах аюултай хаягдал бохир усыг төв цэвэрлэх байгууламжид нийлүүлэхээс өмнөх урдчилан цэвэрлэх байгууламжийг тусгай зөвшөөрөл бүхий мэргэжлийн байгууллагад хариуцуулдаг болох зохицуулт оруулсныг тэмдэглэв.

Уг хуулийн төслийг хэлэлцэхийг хуралдаанд оролцсон гишүүдийн олонх дэмжсэн бөгөөд энэ долоо хоногийн чуулганы нэгдсэн хуралдаанаар хэлэлцэхээр төлөвлөөд байна.скачать dle 12.0