ХӨСҮТ: Эмнэлгийн ачаалал 30 хувиар буурсан

Эмч мэргэжилтнүүдийн зүгээс "Одоо бидний ашиглаж байгаа вакцин томуугийн H1N1 вирусийн эсрэг хамгаалах нөлөөтэй байгаа нь тодорхойлогдож байна" гэдгийг онцолсон юм.
ЭНЭҮТ-ийн Яаралтай тусламжийн тасгийн эрхлэгч Э.Доржбурам:
-Манай төвийн ачаалал арванхоёрдугаар сарын сүүлийн хоёр долоо хоногт дээд цэгтээ хүрсэн. Нийт 330 ор дээр нэмж, 400 орон дээр 600 хүүхэд хэвтэн эмчлүүлсэн. Өнөөдрийн байдлаар 400 орон дээр 475 хүүхэдтэй, ачаалал 30 хувиар буурсан байдалтай ажиллаж байна. Хүүхдийн яаралтай тусламжийн тасгаар хоногтоо 350-400 хүүхэд үйлчлүүлдэг байсан бол өнөөдрийн байдлаар 150-200 хүүхэд үйлчлүүлж байна. Мөн амбулаториор 150-200 хүүхэд гээд нийт 300-400 хүүхэд үйлчлүүлж, тусламж авч байна. Нийт хэвтэн эмчлүүлж байгаа хүүхдүүдийн 70 хувь нь уушгины хатгалгаатай, 10 хувь нь гэдэсний суулгалттай байна. Тэр дундаа уушгины хатгалгаатай хүүхдүүдийн 10 хувийнх нь биеийн байдал маш хүнд байна.

Хүүхдүүдийн 70-80 хувь нь томуу, томуу төст өвчний шинж тэмдэгтэй буюу ханиалгаж, халуурсан, гүйлгэж, бөөлжиж байна.

Насны бүлгээр нь авч үзвэл, нэг наснаас доош сартай хүүхдүүд 40 хувийг эзэлж байна. Цэцэрлэгийн насны хүүхэд буюу 2-5 насныхан 30 хувь, 6-гаас дээш насныхан 30 хувийг эзэлж байна. Энэ тоон үзүүлэлтээс харахад орны ачаалал буурч байгаа ч хүүхдийн өвчлөл маш амархан хүндэрч байна. Сургууль амарсан үед ахуйн осол гэмтлийн тохиолдол нэмэгдэх хандлагатай байна.
ХӨСҮТ-ийн Томуугийн үндэсний төвийн Тандалт судалгааны албаны дарга А.Бурмаа:
-Одоо ханиад томуугийн өвчлөл оргил үедээ хүрээд эргээд буурч байгаа юм шиг боловч хаврын улиралд дахин өөр вирус дэгдэж, өвчлөл нэмэгдэх магадлалтай байдаг. Хүн болгон хүүхдэдээ анхаарч, сургууль болон цэцэрлэг орохоор өвчлөл нэмэгдэх эрсдэлтэй. Амны хаалтаа тогтмол хэрэглэж, хүүхдийнхээ дархлааг дэмжих хэрэгтэй.скачать dle 12.0