Дуучин Т.Ариунаа "ТЭНГЭР ШИГ БАЙ" тоглолтоо хийнэ
МУГЖ, НҮБ-ын хүүхдийн элч дуучин Төмөрийн Ариунаа бие даасан, бүрэн хэмжээний 15 дахь тоглолтоо ирэх сарын 8-нд “Буянт-Ухаа” цогцолборт хийхээр болжээ.Урлагийн тайзнаа 30 гаруй жил гялалзаж буй тэрбээр энэ удаагийн тоглолтод өөрийн үе үеийн шилдэг дуунуудаа шинэчлэн дуулж буйгаараа онцлог. Түүнчлэн “Тусгаар тогтнол”, “Тэнгэр шиг бай”, “Хорвоог дүүргэж дэргэд минь байгаарай” зэрэг сүүлийн үеийн хит уран бүтээлүүд нь мөн багтсан байна.
“Тэнгэр шиг бай” тоглолт өнгөрсөн, одоо, ирээдүйн илэрхийлэл бүхий гурван хэсгээс бүрдэх бөгөөд гурван цаг үргэлжлэх аж.
Монгол Улсын төрийн шагналт, төр нийгмийн зүтгэлтэн, яруу найрагч Очирбатын Дашбалбар агсны алдарт шүлгийг албан ёсны зөвшөөрөлтэйгөөр дуу болгон амилуулж тоглолтын нэрээ болгожээ.“Дэлхий нийтээрээ язгуур соёл руугаа эргэн тэмүүлэх болсон өнөө үед “Тэнгэр шиг бай” дуу Монголын ард түмэнд нэгийг бодогдуулж, хоёрыг тунгаах боломж олгох биз ээ. Энэ уран бүтээл хүн хүнээ эрхэмлэх, хайрлах, хүндэтгэх ёс зүйг олон нийтэд түгээж тэнүүн сэтгэлтэй ард түмнээ тэнгэр шиг байхад уриалж буй юм” хэмээн тэрээр онцолсон юм.
21 жилийн өмнө сонсогчдыг байлдан дагуулсан “Утасны чинь дугаар” дуугаа шинэчлэн дуулж, “Cosmic Ariunaa” цомгоо танилцуулж байсан тэрээр "Тэнгэр шиг бай" шинэ тоглолтдоо нэлээд эртнээс чамбай бэлтгэж байгаагаа хуваалцсан юм.
Гал цогтой эрч хүчээрээ үргэлж сонсогчдыг байлдан дагуулдаг түүний арван жилийн дараах тоглолтыг шүтэн бишрэгчид нь тэсэн ядан хүлээж буй аж.
Тоглолтын тасалбарыг ticket.mn-ээс авах боломжтой.
1 сэтгэгдэл