Хөл бөмбөгийн ДАШТ-ий үеэр хэрэглэсэн бөмбөгнүүд

2026 оны хөл бөмбөгийн дэлхийн аварга шалгаруулах тэмцээн (ДАШТ) АНУ, Мексик, Канад гэсэн Хойд Америкийн гурван улсын 16 хотын 16 цэнгэлдэх хүрээлэнд зургаадугаар сарын 11-нээс долоодугаар сарын 19-ний өдрүүдэд болох гэж байгаа билээ. Энэ удаагийн ДАШТ-д түүхэнд анх удаа 48 орны шигшээ багууд өрсөлдөнө.

Хүн төрөлхтний их баяр цэнгэл наадам болох хөл бөмбөгийн ДАШТ болох гэж байгаатай холбогдуулан уншигчдадаа дэлхийн хамгийн том спортын баярын үеэр хэрэглэж байсан бөмбөгнүүдийн талаарх сонирхолтой мэдээллийг цувралаар хүргэж байна. 

1986 оны ДАШТ-ий “Azteca” бөмбөг
1986 оны хөл бөмбөгийн дэлхийн аварга шалгаруулах тэмцээний (ДАШТ) албан ёсны бөмбөгний загвар нь өмнөх "Tango” бөмбөгтэй төстэй байсан боловч зохион байгуулагч орон болох Мексикийн соёлын элементүүдийг шингээж өгснөөрөө онцлог байв. Бөмбөг дээрх хар триад хээг ацтекуудын уран барилга болон ханын зургаас сэдэвлэсэн хээ угалзаар чимэглэсэн байлаа.

Гэхдээ үүнээс ч илүү чухал зүйл нь, энэ бөмбөг бол ДАШТ-ий түүхэнд ашигласан хамгийн анхны бүрэн синтетик материалаар хийсэн бөмбөг байсан юм.
Мөн "Azteca" бөмбөг нь ДАШТ-ий түүхэнд маш онцгой байр суурь эзэлдэг бөгөөд алдарт хөлбөмбөгчин Диего Марадона хамгийн алдартай гоолоо яг энэ бөмбөгөөр оруулж байжээ.

1990 оны ДАШТ-ий “Etrusco Unico” бөмбөг
Өмнөх "Azteca" бөмбөгний адилаар 1990 оны дэлхийн аварга шалгаруулах тэмцээний бөмбөг нь зохион байгуулагч улс болох Италид хүндэтгэл үзүүлсэн загвартай байв. Этрускчууд МЭӨ 800-100 оны орчимд Төв болон Хойд Италийн нутагт амьдарч байсан түүхтэй. ДАШТ-ий энэхүү бөмбөгөн дээрх гурвалжин хэлбэртэй 20 триад хээг тэр үеийн дүрслэх урлагт өргөн тархсан мотив болох этрускийн арслангийн толгойн дүрсээр алтдан чимэглэжээ.

Магадгүй эдгээр арслангийн толгой довтлогчдыг айлгачихсан уу гэлтэй 1990 оны ДАШТ нь түүхэнд хамгийн цөөхөн гоол орсон тэмцээнээр тэмдэглэгдсэн үлдсэн юм.
Үүнээс хоёр жилийн дараа "Etrusco Unico" бөмбөг олон улсын тэмцээний тавцанд дахин олны анхаарлын төвд орж, 1992 онд Шведэд болсон Европын аварга шалгаруулах тэмцээн болон тухайн үед болсон Барселоны Олимпын наадмын албан ёсны бөмбөгөөр сонгогджээ.

1994 оны ДАШТ-ий “Questra” бөмбөг
“Adidas” компанийнхан дараагийн дэлхийн аварга шалгаруулах тэмцээний бөмбөгөн дээр ч шинээр элдэв зүйл сэдэж толгойгоо гашилгасангүй. Тэд дахин " Tango" бөмбөгний загварыг суурь болгон авч, дээр нь Америкийн өнгө төрхийг шингээж өгчээ. " Questra" бөмбөгний триад хээнүүдийг гараг эрхэс, одод болон пуужингийн зургаар чимэглэсэн байна. Бөмбөгний нэрийг "The quest for the stars" буюу "Одод руу тэмүүлэх нь" гэсэн хэллэгээс санаа аван өгчээ. Энэхүү бөмбөг нь өмнөх загваруудтайгаа харьцуулахад усны хамгаалалт илүү сайтай, мөн илүү хөнгөн болсон байна.

1998 оны ДАШТ-ий “Tricolore” бөмбөг
"Tricolore" нь дэлхийн аварга шалгаруулах тэмцээний түүхэнд (ДАШТ) хэрэглэсэн хамгийн анхны олон өнгөтэй бөмбөг болсон юм. Уламжлалт хар цагаан өнгөний хослолыг шинэчилж, зохион байгуулагч орны далбааны өнгө болох улаан, цагаан, хөх өнгийг шингээж өгчээ. Бөмбөгний триад хээ бүр дээр Францын үндэсний бэлгэдэл болох гурван азарган тахиаг дүрсэлсэн бөгөөд тахианы улаан залаа нь "Adidas" компанийн логог илэрхийлж байв.
Техникийн үзүүлэлтүүд ч мөн адил сайжирчээ. 1994 онд анх нэвтрүүлсэн хөөсөнцөр үе давхаргыг улам боловсронгуй болгосноор бөмбөгийг илүү зөөлөн, хурдан нисдэг болгожээ. Түүнчлэн 1970 оноос хойш анх удаа ДАШТ-ий албан ёсны бөмбөгийг Европт бус харин Марокко улсад үйлдвэрлэсэн байна.скачать dle 12.0