“Эрдэнэт үйлдвэр”-ийн Тэргүүн дэд захирал болон хэлтсийн дарга нарыг чөлөөлөв

Засгийн газрын тогтоолоор байгуулсан “Эрдэнэт үйлдвэр”-т онцгой дэглэм тогтоох ажлын хэсэг тус үйлдвэрийн ажилтнуудтай уулзлаа.

Засгийн газраас “Эрдэнэт үйлдвэр”-т зургаан сарын хугацаатай онцгой дэглэм тогтоох тогтоолыг өнөөдөр баталсан. Энэ хүрээнд ажлын хэсэг “Эрдэнэт үйлдвэр”-т 11 ажил зохион байгуулах юм.

Дээрх ажлын хэсгийн ахлагч Л.Оюун-Эрдэнэ сайд, “Эрдэнэт үйлдвэр”-ийн Ерөнхий захирал болон Төрийн өмчийн бодлого, зохицуулалтын газар (ТӨБЗГ)-ын удирдлагуудтай ярилцаж, бүтцийн өөрчлөлт хийж, зарим албан тушаалтныг үүрэгт ажлаас нь чөлөөлөх зайлшгүй шаардлага үүссэн гэдгийг онцлов.

“Эрдэнэт үйлдвэр”-ийн Ерөнхий захирлын тушаалаар өнөөдөр тус үйлдвэрийн Тэргүүн дэд захирал, Эдийн засгийн асуудал хариуцсан орлогч дарга болон Хуулийн хэлтэс, Санхүүгийн хэлтэс, Хангамжийн хэлтэс, Захиргаа, хүний нөөцийн хэлтсийн дарга нарыг үүрэгт ажлаас нь чөлөөлжээ. Дээрх албан тушаалтны өрөөг ТӨБЗГ, Тагнуулын ерөнхий газрын алба хаагчид битүүмжлэх юм.Мөн уулзалтын үеэр Л.Оюун-Эрдэнэ сайд, "АТГ болон ЦЕГ-аас 49 хувийн асуудлыг мөнгө угаах гэмт хэргийн шинжтэй үйлдэл байж болзошгүй хэмээн үзэж, "Монголын зэс", Худалдаа хөгжлийн банкны зарим албан тушаалтныг саатуулан шалгаж байгаа. Энэ хүрээнд “Эрдэнэт үйлдвэр”-тэй холбоотой зарим нэг аж ахуйн нэгжийн гүйлгээг шалгах хэрэгтэй тул найман өрөөг битүүмжилнэ. Тухайн өрөөнүүдээс албан бичиг, цаас авч гарахыг хориглоно. Онцгой дэглэмээс үүдэн үйлдвэрийн өдөр тутмын үйл ажиллагаанд саад учрахгүй. Тиймээс үйлдвэрийн ажилтан, албан тушаалтнууд ч Засгийн газрын тогтоолыг хүндэтгэж, ёс бус үйлдэл гаргахгүй гэдэгт итгэж байна” гэлээ.

1.Улсын эдийн засгийн амьдрал, хүн амын үйлчилгээний хэвийн нөхцөлийг хангахад нэн чухал үүрэг бүхий тодорхой үйлдвэрийн газар, байгууллагад шаардлагатай гэж үзвэл нийтлэг баримталдаг хууль тогтоомжийн заалтыг хэрэглэхгүйгээр 6 сар хүртэл хугацаагаар тусад нь онцгой дэглэм тогтоож, харъяалал харгалзахгүйгээр өөрийн шууд хяналтад авч ажиллуулах эрхийг Монгол Улсын Засгийн газарт олгосугай.

2.Онцгой дэглэмээр ажиллах үйлдвэрийн газар, байгууллагын үйл ажиллагааны талаар Засгийн газраас тогтоох эрх зүйн онцгой журам нь Монгол Улсын хууль тогтоомжийн ардчилсан зарчим, Монгол Улсын олон улсын гэрээний үндэслэл, иргэдийн нийтлэг ашиг сонирхолд нийцсэн байхын зэрэгцээгээр дор дурдсан асуудлын хүрээнд байвал зохино:

Үүнд:

-үйлдвэрийн газар, байгууллагын зохион байгуулалтын бүтэц, үүргийг тогтоох, бүх шатных нь удирдах ажилтныг томилох;

-ажлын өдөр, цагийн дэглэм, ээлжийг өөрчлөн тогтоох;

-хөдөлмөрийн норм, цалин хөлсийг шинэчлэн тогтоох, өөрчлөх;

-үндсэн ба эргэлтийн хөрөнгө, түүний дотор түүхий эд, материалын нийлүүлэлт, зарцуулалт, үйлдвэрлэсэн бүтээгдэхүүний хадгалалт, хуваарилалт, тээвэрлэлт, борлуулалтад нь тусгай хяналт тогтоох;

-Засгийн газраас тогтоосон онцгой журмыг хэрэгжүүлэхэд саад учруулсан улс төр, олон нийтийн байгууллагын үйл ажиллагааг тухайн үйлдвэрийн газар, байгууллага дээр түр зогсоож, хяналт тогтоох;

-тухайн үйлдвэрийн газар, байгууллагад хөдөлмөр, үйлдвэрлэл, технологийн сахилгыг чанд сахин биелүүлэхэд чиглэсэн хөдөлмөрийн сахилгын тухайлсан дүрэм, үйлдвэрлэлийн аюул осолгүй ажиллагааны болон олон нийтийн хэв журам сахиулах тусгай журам тогтоож, тэдгээрийг зөрчигчдөд харьяалал харгалзахгүйгээр зохих хариуцлага хүлээлгэх;

-онцгой дэглэмтэй үйлдвэрийн газар, байгууллагын хэвийн ажиллагаа алдагдахад хүрвэл хүн хүч, тээврийн хэрэгслийн дайчилгаа явуулах;

-онцгой дэглэмтэй үйлдвэрийн газар, байгууллагаас бусадтай байгуулсан гэрээний болзлыг зайлшгүй шаардлагатай тохиолдолд захиалагч /бэлтгэн нийлүүлэгч/-ийн хууль ёсны ашиг сонирхлыг хохироохгүйгээр өөрчлөх буюу гэрээг цуцлуулах;

-улсын захиалга, даалгаврыг биелүүлээгүй тохиолдолд тухайн үйлдвэрийн газар, байгууллага, түүний эрх баригчдад хүлээлгэх эдийн засгийн болон захиргааны хариуцлагын арга хэмжээ тогтоож хэрэглэх;

-хүн амын хүнсний болон өдөр тутмын хэрэглээний ховор олдоцтой барааг хуваарилах, тээвэрлэх, худалдан борлуулах, хил нэвтрүүлэх тусгай журам тогтоож, тэдгээр барааг дамлан худалдах, шунахай зорилгоор их хэмжээтэй нөөцлөх зэргээр дотоод зах зээлд барааны хомсдлыг зориуд бий болгохтой тэмцэхэд чиглэгдсэн захиргааны урьдчилан сэргийлэх, таслан зогсоох болон хариуцлагын арга хэмжээ тогтоон хэрэглэх.