Үзлэгийн 15 хувийг томуу эзэлвэл ХӨЛ ХОРИО тогтоодог, улсын дундаж 9.3 хувьтай байна

Амбулаторийн үзлэгийн 15 хувийг томуу, томуу төст өвчин эзлэвэл хөл хорио тогтоож, цэцэрлэг, сургууль болон олон нийтийн үйл ажиллагааг хязгаарладаг гэдгийг Эрүүл мэндийн сайд Д.Сарангэрэл хэллээ.

Нийслэлийн хэмжээнд 977 хүүхдийн ор байгаа бөгөөд өнгөрсөн долоо хоногт 723 хүүхэд эмнэлэгт хэвтэж, орны ачаалал 73 хувиар нэмэгдсэн

ЭМЯ долоо хоног тутам томуугийн дэгдэлтийн судалгааг хийж байгаа бөгөөд өнөөдрийн байдлаар томуу, томуу төст өвчний дэгдэлт улсын хэмжээнд 9.3, Улаанбаатар хотын хэмжээнд 7.1 хувьтай байна. Харин хөдөө орон нутагт 10.6 хувьтай байгаа аж. Улсын дундаж 9.3 хувьтай байгаа ч Төв, Дорнод аймагт энэ тоо 17-д хүрээд байгаа тул орон нутагт хязгаарлалтад орох шаардлагатай болоод байгааг ч тэрбээр онцолсон.
Эрүүл мэндийн сайд Д.Сарангэрэл томуу, томуу төст өвчний нөхцөл байдлын талаар “Өвчний дэгдэлт нэмэгдэх нь тодорхой байна. Ид дэгдэлт нь 1-3 сард, хоёр дахь дэгдэлт нь 3-5 сард болох нь гэж үзэж байна. Нийслэлийн хэмжээнд 977 хүүхдийн ор байгаа бөгөөд өнгөрсөн долоо хоногт 723 хүүхэд эмнэлэгт хэвтэж, орны ачаалал 73 хувиар нэмэгдсэн. Энэ долоо хоногт харьцангуй аядуу эхэлж байна. Орны хэтрэлт 53.2 хувьтай, 503 ор нэмэлтээр шаардагдаж байна.
Өнөөдрийн байдлаар эмнэлгийн коридорт шалан дээр гудас тавьж хүүхэд авахгүй байгаа. Гэхдээ нэгэнт хүнд өвдсөн хүүхдийг буцаахгүйн тулд коридорт эвхдэг ор тавьж хүүхэд авч байгаа нь бодит үнэн. Өмнөх жилүүдтэй харьцуулахад дэвшил боловч коридорт хүүхэд авна гэдэг хэвийн үзэгдэл биш. Орчин нөхцөл, багтаамж, агааржуулалт, халдваргүйжилтийн хувьд сөрөг талтай. Хүүхэд өвдчихсөн байхад ор байхгүй гээд буцаах эрх бидэнд байхгүй учир өнөөдөр гал унтраасан маягаар ажиллаж байна. Бусад тасагт, эмч, сувилагч нар, сургалтын өрөө гээд бүгдийг чөлөөлсөн. Эмч, сувилагч нар 24 цаг босоогоороо ажиллаж байна.

Улсын дундаж 9.3 хувьтай байгаа ч Төв, Дорнод аймагт энэ тоо 17-д хүрээд байна

Коридорт эвхдэг ор тавьж хүүхэд хүлээн авч буйг зогсоохоор зарим дүүргийн нэгдсэн эмнэлгийн насанд хүрэгчдийн тасаг болон амбулаторийн үзлэгийг хувийн эмнэлгүүд уруу шилжүүлэх ажлыг эхлүүлсэн. Төрийн тусгай албан хаагчдын эмнэлэгт 30 ортой хүүхдийн тасаг нээсэн, II эмнэлэгт 30, Төмөр замын эмнэлэгт 100 орыг нэмэгдүүлсэн зэргээр ажиллаж байна” гэлээ.
Мөн тэрбээр ачаалал ихтэй, хүүхэд нь өвдсөн эцэг эхчүүдийн уур бухимдлыг хүртэл зохицуулаад ажиллаж байгаа эмч, эмнэлгийн ажилчид маань өнөөдрийг хүртэл гомдол, санал тавихгүй ажиллаж байгаад талархал илэрхийлсэн юм.скачать dle 12.0