“ЗУУНЫ ТҮҮХ-ЗУУН ОНЦЛОХ ҮЙЛ ЯВДАЛ”

Монгол Улс, ОХУ-ын хооронд дипломат харилцаа тогтоосны 100 жилийн ой энэ 2021 онд тохиож байна.
1921 оны 11 дүгээр сарын 05-ны өдөр Москва хотноо Ардын Засгийн газар ба ЗСБНОУ-ын Засгийн газрын хооронд Найрамдлын хэлэлцээрт гарын үсэг зуржээ. Энэ түүхэн ойд зориулан Монгол Улсын Ерөнхийлөгчийн Тамгын газар, УИХ дахь Монгол-Оросын парламентын бүлэг, Гадаад харилцааны яам хамтран “Зууны түүх-зуун онцлох үйл явдал” сэдэвт гэрэл зургийн үзэсгэлэн зохион байгуулж байна.
Монгол Улсын Ерөнхийлөгчийн ивээл дор зохион байгуулж буй тус үзэсгэлэнд хоёр орны улс төр, худалдаа, эдийн засаг, шинжлэх ухаан, техник, боловсрол, соёл урлаг, спорт, эрүүл мэнд, хүмүүнлэгийн салбар, их бүтээн байгуулалт, хөдөө аж ахуйн салбарыг харуулсан болон харилцаа, хамтын ажиллагааг хөгжүүлэх үйлсэд гар бие оролцсон түүхэн хүмүүс, соёл урлагийн алдартнууд, спортын одод зэрэг нэр хүндтэй эрхэмүүдийн хөрөг бүхий 200 шахам зургаас бүрдсэн 100 самбар гэрэл зургийг толилуулж байна.
Тухайлбал, 1921 оны Ардын хувьсгал, 1939 оны Халх голын дайн,1941-1945 онд фашизмын эсрэг тэмцэж буй Зөвлөлтийн ард түмнийг дэмжиж монгол орон даяар өрнөсөн “Бүхнийг фронтод, Бүгдийг ялалтын төлөө” хөдөлгөөн, 1945 оны Чөлөөлөх дайн, 1949 онд Улаанбаатар-Наушкийн төмөр зам баригдсан болон 1960-аад оны атар газар эзэмшсэн түүх, ХХ зууны манлай бүтээн байгуулалт “Эрдэнэт” үйлдвэр, Зөвлөлт-Монголын сансрын хамтарсан нислэг, Найрамдлын Дархан хот байгуулагдсан нь зэрэг түүхэн үйл явдлыг товчоолон харуулжээ.
Тус үзэсгэлэнгийн хамтран зохион байгуулагчаар “Улаанбаатар Төмөр зам” хувь нийлүүлсэн нийгэмлэг, “Эрдэнэт үйлдвэр” төрийн өмчит үйлдвэрийн газар, Оросын шинжлэх ухаан, соёлын төв, Монгол-Оросын найрамдлын нийгэмлэг, “Мишээл экспо” олон улсын үзэсгэлэн худалдааны төв, “Монголын гэрэл зураг, мэдээлэл” сэтгүүл зэрэг байгууллагууд оролцжээ.
Хоёр орны харилцааны нэгэн зууны хөгжлийн түүхийг ирээдүй хойч үе, хүүхэд, залууст сурталчлан таниулах, мөнхлөн үлдээх зорилгоор зохион байгуулж буй тус үзэсгэлэн 2021 оны 10 дугаар сарын 25-27-ны өдрүүдэд Монголын Уран зургийн галерейдгарах ажээ.скачать dle 12.0