Л.ЭНХ-АМГАЛАН: ХИЧЭЭЛИЙН ХОЦРОГДОЛ НӨХНӨ ГЭСЭН СУРГАЛТУУДАД ХЯНАЛТ ТАВИНА, ХУУЛЬ БУС БИЗНЕС ДЭЛГЭРЧ БОЛОХГҮЙ

БШУЯ-наас сурагчдын сургуульд бэлтгэгдсэн байдлын үнэлгээ, хоцрогдлын оношилгооны судалгаа, хоцрогдол арилгах төлөвлөгөөний талаарх мэдээллийг өгч байна.
БШУ-ны сайд Л.Энх-Амгалан: “Цаашдаа бүх сургалтыг танхимаар явуулах шаардлагатай, нөгөө талаас багшийн цахимаар хичээлээ орох боломжоор нь хангаж өгөх ёстой гэж дүгнэсэн. Мөн эцэг, эхчүүдийн оролцоог нэмэгдүүлэх шаардлагатай.
7-14 настнуудын 61 хувь нь буюу 10 хүүхдийн зургаа нь унших чадвараа эзэмшсэн байна. Хоёр хүүхдийн нэг нь тоо бодох чадвараа эзэмшиж, бусад нь хоцрогдолд орсон байна. 2-3 дугаар ангийн хүүхдүүд сургууль дээрээ очиж үзээгүй, багштайгаа бодитоор уулзаж үзээгүй хүүхдүүд байна. Нийт сурагчид эзэмших ёстой боловсролынхоо 50 хувийг л эзэмшсэн байна.
Хоцрогдолд багшийн заах арга зүй, сурагч, багш нарын цахим платформын дутмаг хэрэглээ, бодит сургуулийн орчинд хичээллээгүй, сурагчдад гэрийн даалгавар огт өгөхгүй эсхүл хэт их өгөх зэрэг нөлөөлсөн.
Энэ хавар аль болох танхимаар хичээллэнэ. Халдварын тохиолдол бага байвал танхимын сургалтыг үргэлжлүүлнэ” гэсэн юм.
Тэрбээр үргэлжлүүлэн сэтгүүлчдийн асуултад хариулав.
-Дөрөвдүгээр ангийн сурагч хоёрдугаар ангийн мэдлэгтэй бол анги улираах асуудал байх уу?
-Анги улираахаа больсон. Аль болох танхимаар хичээллэвэл энэ хоцрогдлыг нөхөх боломжтой. Нэгэнт хоцрогдол үүссэн учраас хүүхдэд ачаалал өгөх нь ойлгомжтой.
-Хоцрогдол арилгана гэсэн сургалтын төвүүд олон болсон. Үүнд яамнаас хяналт тавьж байна уу?
-Гэрээр даалгавар хийлгэж, давтлага өгдөг зүйл далд эдийн засагт орно. Солонгос улсад эцэг, эхчүүд хүүхдүүддээ давтлага өгүүлэхэд хамгийн их мөнгө зардаг. Үүнийг далд эдийн засаг гэж үздэг. Нэгдүгээр сургууль, 23-р сургуулийн багш нар ийм бизнес хийдэг болчихсон. Үүнийг нуугаад байх зүйл байхгүй. Гэхдээ цөөн хүүхэд давтлага авдаг бус нийтэд нь тэгш боломжийг олгох ёстой. Medle.mn сайтад хамгийн сайн багшийн хичээлийг худалдаж аваад, бүх хүүхдэд нээлттэй болгох чиглэлээр ажиллаж байна. Нэг багшийн хичээлийг 100 мянгаас нэг сая төгрөгөөр худалдаж авч байгаа.

Гадуур хоцрогдол арилгана гэсэн сургалтуудад хяналт тавина, хууль бус бизнес дэлгэрч болохгүй.

-Сүүлийн жилүүдэд анги дэвших шалгалтыг цуцалсан, цаашид ийм зүйл байх уу?
-Сүүлийн хоёр жил анги дэвших шалгалтыг цуцалсан. Жил болгон цуцлаад байж болохгүй. Энэ жил Монгол хэлний шалгалтыг авах ёстой. Ирэх долоо хоногт ЭЕШ-ын бүртгэл эхэлнэ.скачать dle 12.0