Монголын шигшээ баг Малайзын багийг хожиж, эхний ялалтаа авлаа

Монгол Улсын нийслэлд дэлхийн стандартад нийцсэн “UG Arena” ордонд Азийн аваргын урьдчилсан шатны D хэсгийн тоглолтууд болж байгаа бөгөөд өчигдөр /2022.11.11/ Монголын шигшээ баг нутгийнхаа талбайд эхний ялалтаа авлаа.
​Улаанбаатарт явагдаж буй D хэсгийн 4 дэх тоглолт Монголын шигшээ, Малайзын шигшээ багуудын хооронд болоход тоглолт эхэнд Малайзын шигшээ тэргүүлсэн удалгүй өрсөлдөөн өрнөж үзэгчдийн дэмжлэг багаа сэргээсэн гэж болно. Тоглолтод онооны тэргүүлэл 13 удаа солигдсон бөгөөд тоглолтын турш Монголын баг 19 минут 58 секундын хугацаанд онооны илүүтэй тоглосон бол Малайзын баг 16 минут 51 секундын турш илүүрхжээ.
​Энэ үзүүлэлтээс хоёр багийн тоглолт ямар хурц, ширүүн өрсөлдөөнтэй болсныг батална. Малайзын баг эрч хүчтэй довтолгооны хувилбар бага, харин холын шидэлтэд найддаг, боломж гарвал дундаас шиддэг баг болохыг гурван онооны шидэлтээр 42 оноог авсан нь илэрхийлж байгаа юм. Харин Монголын шигшээ хурдан довтолгооны оноогоор илүүрхэж байлаа.
​Хоёр багийн онооны зөрүү 10 болж, Малайзын баг тэргүүлж эхлэх үед багийнхаа тоглолтын хувь заяаг эргүүлсэн тоглогч бол ОУХМ Тунгалагийн Санчир байв. Т.Санчир яг энэ эгзэгтэй үед гурван ч удаа холоос оновчтой шидлээ. Мөн түүний довтолгоо, сэтгэл зүй өрсөлдөгч багийн тоглолтын эрчийг сулруулж чадсан юм.
​Тоглолтын төгсгөлд багууд тун ойрхон аль баг ч хожиж болох эгзэгтэй мөчид ялалтыг Т.Санчир авчирсан. Үзэгчид Т.Санчир хэмээн уухайлж, тэр багаа ялалт өөд хүргэн тэргүүлэгч тоглогч гэдгээ харуулж 94:92-оор Монголын шигшээ эхний ялалтаа авлаа.
​Тэрбээр 36 оноо, 7 самбар, 3 оновчтой дамжуулалт хийсэн үзүүлэлтээр багаа тэргүүлсэн. Мөн шигшээ багийн ахлах дасгалжуулагч Ч.Ижилболдын зөв шийдвэр, ухаалаг сэлгээнүүд ялалтад чухал хувь нэмэр болсныг онцлох ёстой. Залуу дасгалжуулагчийн хувьд шигшээ багийнхаа гараа, олон улсын хэтийн замналыг ялалтаар эхлүүлж чадлаа.   
​Малайзын шигшээ багаас  Чун Хон Тин 33 оноо, 10 самбараар багаа тэргүүлсэн, мөн И Хоу Вон 29 оноо авсан байна.
​Ийнхүү тус тэмцээний 2 дахь өдөр эхний  тоглолтыг Тахити болон Тайландын шигшээ багууд хийсэн бөгөөд тоглолтын эхнээс Тайландын шигшээ баг илүүрхэж явсаар 114:46-гаар илт давуу хожил авсан юм.
​Харин дараагийн тоглолт Монголын шигшээ баг, Малайзын шигшээ багийн хооронд тун өрсөлдөөнтэй өрнөж, цаг дуусахад ийнхүү 94:92-оор Монголын баг хожиж, шинэхэн ордноо ялалтаар мялаасан юм. 








скачать dle 12.0