Гэгээн Ширээт Улсын ХМА: Монгол Улс дахь айлчлал нь Пап Францисын гадаадад хийж буй 43 дахь айлчлал

Монгол Улсын Ерөнхийлөгч Ухнаагийн Хүрэлсүхийн урилгаар Гэгээн Ширээт Улсын Төрийн тэргүүн Пап Францис манай улсад наймдугаар сарын 31-нээс есдүгээр сарын 4-ний өдрүүдэд төрийн айлчлал хийх гэж байна.


Энэхүү айлчлалтай холбогдуулж Гэгээн Ширээт Улсын Хэвлэл мэдээллийн албаны дарга Маттео Бруни наймдугаар сарын 29-ний мягмар гарагт Ватиканд хэвлэлийн бага хурал зохион байгуулж, наймдугаар сарын 31-нээс есдүгээр сарын 4-ний хооронд Пап Францисын Монголд Улсад хийх айлчлалын хөтөлбөрийг олон нийтэд танилцуулж, сэтгүүлчдийн асуултад нээлттэй хариулжээ. Монгол Улсад хийх энэхүү айлчлал нь Гэгээн хутагт, Пап Францисын гадаад улсад хийж буй 43 дахь  айлчлал юм байна.

Гэгээн Ширээт Улсын Хэвлэл мэдээллийн албаны дарга Маттео Бруни, Пап Францисын Монгол Улсад хийж буй айлчлалын гол цөм нь 1500 орчим католик сүсэгтнүүдтэй хийх уулзалт болохыг дурдаад 13 дугаар зуунаас эхлэлтэй хоёр улсын харилцаа 1992 онд дипломат харилцаа болон өргөжиж, анхны шашин дэлгэрүүлэгчдийг Монгол Улсад ирэхийг урьснаас хойш 30 гаруй жилийн хугацаанд хамтын ажиллагаа эрчимтэй хөгжиж буйг онцолжээ.

Тэрбээр мөн "Айлчлалын үеэр Улаанбаатар дахь "Мөсөн өргөөн"-д  зохион байгуулах талархал магтаалын мөргөлд Монгол Улс дахь католик шашны сүсэгтнүүдээс гадна ОХУ, БНХАУ, Таиланд, Казахстан, Киргиз, Азербайжан, Вьетнам зэрэг хөрш зэргэлдээ орнуудаас сүсэгтнүүд оролцоно. Ням гарагт "Хүн" театрт болох шашин хоорондын уулзалтад бөө мөргөл, шинтоизм, буддизм, ислам, иудаизм, индуизм болон бусад шашны шашны төлөөлөгчид оролцох ба энэхүү арга хэмжээ нь Монголын ард түмнийг олон арван жилийн турш тодорхойлж ирсэн энх тайвнаар зэрэгцэн орших хүсэл эрмэлзлийн илэрхийлэл болно" хэмээн тэмдэглэжээ. Уулзалтад Монгол Улсын Засгийн газрын төлөөлөгчид болон их, дээд сургуулийн эрдэмтэн судлаачид ажиглагчаар оролцох юм байна.

Сэтгүүлчид түүнээс Пап Францисыг Монголын Буддын шашны удирдагчид, тэр дундаа шинээр тодорсон 10 дугаар Богдтой ганцаарчилсан уулзалт хийх эсэх, мөн мөргөлийн дараа ОХУ, БНХАУ-аас хүрэлцэн ирсэн Христэд итгэгчидтэй хувийн уулзалт хийх эсэх талаар тодруулжээ. "Одоогоор ганцаарчилсан уулзалт хийхээр төлөвлөөгүй болно. Энх тайвныг бэхжүүлэх шашин хоорондын уулзалтад Буддын шашинтнуудаас гадна Монгол Улс дахь бусад бүх шашны төлөөлөгч оролцоно" хэмээн тэрбээр сэтгүүлчдийн асуултад хариулсан байна.

Түүнчлэн хэвлэлийн бага хурлын төгсгөлд ноён Маттео Бруни, Гэгээн Ширээт Улсын Төрийн тэргүүн Пап Францисын энэ удаагийн айлчлал нь Монголын ард түмэнтэй ойртон танилцах айлчлал байх болно гэлээ хэмээн Гэгээн Ширээт Улсын Хэвлэл мэдээллийн албанаас гаргасан мэдээлэлд дурджээ.скачать dle 12.0