Эрдэнэт үйлдвэрийн Ил уурхай 500 тонны даацтай авто пүү Монголд анх ашиглалтад орууллаа

Эрдэнэт үйлдвэрийн Ил уурхай овоолгын талбайдаа исэлдсэн хүдрийн жин хэмжих 500 тонны даацтай хоёр авто пүүг Монголд анх ашиглалтад орууллаа. Өнгөрсөн долдугаар сараас эхэлсэн уг ажлын гүйцэтгэгчээр Монгол Улсын Стандартчилал, хэмжил зүйн тусгай зөвшөөрлийн хүрээнд хүнд даацын жингийн худалдаа, засвар, үйлчилгээ эрхэлдэг “Бэхэм” ХХК ажилласан байна. Энэхүү авто пүү нь БНХАУ-ын “Shandong China coal” компанид үйлдвэрлэгдсэн, SCS-500 маркийн 500 тонн хүртэлх ачаа хэмжих хүчин чадалтай, -40 хэмийн хүйтэнд хэвийн ажиллах боломжтойгоороо онцлог гэж “Бэхэм” ХХК-ийн Гүйцэтгэх захирал О.Балдандорж танилцуулав. 
Автомат ажиллагаатай систем нь хяналтын камераар авто өөрөө буулгагчийн дугаарыг таньж, тээвэрлэж буй хүдрийн жингийн мэдээллийг Ил уурхайн диспетчерийн компьютерын сүлжээнд шууд дамжуулах боломжтой. Ингэснээр хүдрийн хөдөлгөөнийг бодит цагийн горимоор хянах, удирдах нөхцөл бүрдэж байна. Өмнө нь, исэлдсэн хүдрийн овоолгоос ачигдсан хүдрийн хэмжээг сар бүрийн төгсгөлд маркшейдерийн хэмжилтээр тооцдог байсан бол шинэ авто пүү ашиглалтад орсноор уг үйл явц илүү нарийвчлалтай, шуурхай, хөдөлмөр хөнгөвчилсөн хэлбэрт шилжжээ.
“Исэлдсэн хүдрийн 8а болон 12 дугаар овоолгоос гаднын компанид гэрээгээр нийлүүлж буй хүдрийн хэмжээг илүү нарийвчлалтай хянах, хүний оролцоог багасгах, ажлын бүтээмжийг нэмэгдүүлэх ач холбогдолтой ажил боллоо” хэмээн Эрдэнэт үйлдвэрийн Үйлдвэрлэл, техникийн бодлогын газрын Ерөнхий уурхайчин, Угсралтын ажил хүлээлцэх Ажлын хэсгийн ахлагч Д.Эрдэнэбаатар онцлов. Хүнд даацын авто пүү суурилуулах ажлын явцад Барилга, байгууламжийн хяналт, төлөвлөлтийн хэлтэс, Чанарын хяналтын хэлтэс болон Ил уурхайн холбогдох мэргэжилтнүүд стандарт шаардлагын дагуу хяналт тавин ажилласан байна.скачать dle 12.0