Х.Мандахбаяр: Монголын сэтгүүлчдийн нэгдсэн эвлэл сэтгүүлчдээ, редакцуудаа хамгаална

 Монголын Сэтгүүлчдийн нэгдсэн эвлэл байр сууриа илэрхийлж, өнөөдөр мэдээлэл хийлээ. “Болж буй үйл явдалтай холбоотойгоор нийгэмд сэтгүүлчдийн талаар сөрөг суртал ухуулга явуулж буй нь буруу гэж үзэж байна. Хараат бус сэтгүүл зүйн төлөө МСНЭ тэмцэх ёстой. Хэн нэгэн эрх мэдэлтэн сэтгүүлчийг, редакцыг дарамтанд оруулах ёсгүй” хэмээн МСНЭ-ийн ерөнхийлөгч Х.Мандахбаяр мэдэгдлээ.

Тус хэвлэлийн хуралд Зариг.мн сайтын сэтгүүлч Н.Өнөрцэцэг оролцож, нөхцөл байдлыг тайлбарлан сэтгүүлчдийн асуултад хариулсан юм. 

Тэрбээр “Энэ бол УИХ-ын гишүүн Ц.Гарамжав, Н.Өнөрцэцэг гэдэг хувь хүмүүсийн тулаан биш. Миний хувьд зөвхөн УИХ-ын гишүүн Ц.Гарамжав руу дайраагүй. Монголбанкны эрсдлийн сангаар мөнгөө төлүүлсэн ганцхан компани нь “Монполимет” байж таарсан. 10 тэрбум төгрөг бол маш их мөнгө. 10 ЖДҮ-тэй тэнцэнэ. Цэцэрлэг, сургууль барьж болно. Гэтэл хэн нэгэн албан тушаалтан эрх мэдлээ ашиглан тэр их мөнгийг эрсдлийн сангаар төлүүлсэн нь шударга бус санагдсан учраас олон нийтэд нээлттэй байгаа баримтад үндэслэн мэдээллийг гаргаж тавьсан. Бүх зүйл баримттай. Энэ баримтууд өөрөө хэлээд өгнө. Монголбанкнаас энэ талаар тайлбар авах гэсэн боловч чадаагүй байна. Энэ асуудлыг үргэлжлүүлэн сурвалжлах болно” гэлээ.

Зариг.мн сайт өчигдөр ажиллахгүй болсон талаар тэрбээр “Манай сервер байршдаг “Ай түүлс” компанид хандахад зариг.мн-рүү халдлага ирсэн тул гадаад, дотоод урсгалыг хаалаа гэсэн. Бид шалгуулахаар цагдаагийн байгууллагад хандсан” гэлээ. 

Сэтгүүлч Н.Өнөрцэцэг дэлгэрэнгүй тайлбар өгсний дараа МСНЭ-ийн ерөнхийлөгч Х.Мандахбаяр байр сууриа илэрхийлж, цаашид МСНЭ сэтгүүлчдээ, редакцуудаа хамгаална гэдгээ мэдэгдээд “Өнөрцэцэгийг шантааж хийсэн гэж сошиалаар гүтгэж байгаа. Харин ч сэтгүүлчийг мэдээллээ татах, хүчээ багасгах, сэтгүүлчээр ухаж төнхүүлэхгүйн тулд улстөрчид шантаачилж байгааг УИХ-ын гишүүн Ц.Гарамжавын энэ кэйс харуулж байна. Одоо бид салбараа, нэг нэгнээ хамгаалах ёстой. Энэ бол Өнөрөөгийн асуудал биш, Монголын нийт сэтгүүлч, хэвлэл мэдээллийн хэрэгслийн асуудал. Монголын ардчиллыг хамгаалах цорын ганц зөв зам нь эрүүл, хараат бус сэтгүүл зүй. Тиймээс МСНЭ сэтгүүлчдээ хамгаална” гэв.