ЗТХ-ийн сайдыг үүрэгт ажлаас нь чөлөөлөв

УИХ-ын чуулганы өнөөдрийн хуралдаанаар ЗТХ-ийн сайдыг үүрэгт ажлаас нь чөлөөллөө.
ЗТХ-ийн сайд Я.Содбаатарын эхнэрийн үүсгэн байгуулсан компани ЖДҮХС-гаас зээл авсантай холбогдуулан тэрбээр ёс зүйн хариуцлага хүлээж, үүрэгт ажлаа хүлээлгэн өгөх хүсэлтээ өнгөрсөн оны арванэгдүгээр сарын 30-нд Ерөнхий сайдад хүргүүлсэн. Уг саналыг Ерөнхий сайд хүлээн авч өнгөрсөн оны арванхоёрдугаар сарын 04-нд УИХ-д өргөн мэдүүлсэн бөгөөд Төрийн байгуулалтын байнгын хороо өчигдөр буюу өнгөрсөн сарын 31-нд хэлэлцэж дэмжсэн юм.
Хэлэлцүүлгийн эхэнд О.Баасанхүү гишүүн, “ЗТХ-ийн сайд Я.Содбаатар ЖДҮХС-гаас хамаарал бүхий этгээд нь зээл авсны төлөө хариуцлага хүлээж, ажлаа хүлээлгэн өгч байна. Улсын хөгжил замаасаа эхэлдэг. Энэ салбарыг хариуцсан сайд нар олон удаа солигдож байна. ЗТХ-ийн дараагийн сайдыг УИХ-ын гишүүдээс сонгох уу” хэмээн тодрууллаа.
Ерөнхий сайд У.Хүрэлсүх, “ЗТХ-ийн сайдаар шударга хүн тавихаар судалж байгаа. Улсын өмч, хөрөнгөд хуруу дүрдэггүй, эх орныхоо төлөө ажиллах сэтгэлтэй хүн байх ёстой. ЖДҮХС-тай холбоотой асуудал нийтэд ил болсон нь тун сайн. Албан тушаалтнууд ч энэ асуудалд нэр холбогдсондоо ёс зүйн хариуцлага хүлээж байгаа нь үлгэр, дуурайлал болсон сайн жишиг юм. ЖДҮХС-гаас зээл авсан албан тушаалтнууд түүнийгээ эгүүлэн төлж байгаа. Энэ мөнгийг зорилтот бүлэгт нь ил тод хүргэхийн төлөө ХХААХҮ-ийн сайд ажиллаж байна. Мөн Засгийн газрын бусад санд шалгалт хийж байгаа. Эдгээр сангуудтай холбоотой холбоотой асуудал гарвал мөн л ёс зүйн хариуцлага хүлээлгэх болно” хэмээв.
ЖДҮХС-гаас зээл авсан бүх аж ахуйн нэгжүүдийг улс төртэй хутгах хэрэггүй гэдгийг Ж.Энхбаяр гишүүн хэллээ. Тэрбээр, “ЖДҮХС-гаас авсан зээлээ зориулалтын дагуу ашиглаж, олон ажлын байр бий болгосон компаниуд бий. Энэ асуудлыг хууль, хяналтын байгууллага шалгаж байгаа. Хуулийн байгууллагуудын шалгалт дууссаны дараа бүх зүйл ил тод, нээлттэй болно гэдэгт итгэлтэй байна” гэлээ. Мөн тэрбээр сайдаар ажиллах богино хугацаандаа зам, тээврийн салбарт шинээр эхлүүлсэн, цаашид үргэлжлүүлэх шаардлагатай ямар ажил байгааг Я.Содбаатар сайдаас тодрууллаа.
ЗТХ-ийн сайд Я.Содбаатар, “Зам, тээвэр бол маш том салбар. Энэ салбарт хамгийн тулгамдаж байгаа асуудал бол боловсон хүчин. Салбарын мэргэшсэн хүмүүсээр төрийн албыг бэхжүүлэх ньь чухал юм. Мөн энэ салбарын хуулиудыг сүүлийн 10 гаруй жилийн хугацаанд шинэчлээгүй. Тэгэхээр 2019 оны хаврын чуулганаар хууль, эрхзүйн орчныг шинэчлэх ажлыг эхлүүлэх хэрэгтэй. 2020-2030 онд “Улаанбаатар төмөр зам” хувь нийлүүлсэн нийгэмлэгийг шинэчлэх хөтөлбөр баталсан. Мөн иргэний агаарын тээврийг либералчилах ажил мөн эхэлсэн. Өнөөдөр л гэхэд МИАТ компани шинэ агаарын хөлгөө хүлээн авлаа. Эдгээр ажлыг цаашид үргэлжлүүлэх нь чухал юм” гэсэн хариулт өгөв.
Ингээд ЗТХ-ийн сайдыг үүрэгт ажлаас чөлөөлөхийг хуралдаанд оролцсон гишүүд 69.1 хувийн саналаар дэмжлээ.скачать dle 12.0