“Монгол бахархал-2023” гэрэл зургийн үзэсгэлэн “Чингис хаан” үндэсний музейд нээгдлээ

Монгол түмний бахархал Үндэсний их баяр наадмыг тохиолдуулан наадамчин олон Монголчууд, гадаадын зочин төлөөлөгч, аялагч, жуулчдад зориулсан “Монгол бахархал-2023” гэрэл зургийн үзэсгэлэнг өнөөдөр “Чингис хаан” үндэсний музейд нээлээ.
Энэхүү үзэсгэлэнд Монгол эх орныхоо дээд тэнгэрээс дэргэдэх газар шороо, уул ус, ургамал ногоо, ан амьтан, жигүүртэн, туурайтныг нэгэн дор цогцлоож, улс орны түүхэн хөгжил, уламжлал, нүүдэлчдийн өв соёл, орчин цагийн Монгол улсын хөгжил, цэцэглэлт, бүтээн байгуулалтыг дээжлэн дэлгэсэн нь үзсэн, харсан бүхний мэлмийг гийлгэж, сэтгэлийг баясган, бахархлыг төрүүлэх биз ээ.
Соёлын яамны дэмжлэгтэйгээр 2019 оноос өнөөг хүртэл жил бүр уламжлал болгон гаргаж хэвшээд буй уг үзэсгэлэнг Соёл урлагийн газар, Чингис хаан үндэсний музей, Монголын гэрэл зурагчдын нэгдсэн холбоо хамтран зохион байгуулж байгаа бөгөөд Монголын дунд, залуу үеийн 40 гаруй гэрэл зурагчин, уран бүтээлчийн шилдэг ная гаруй уран бүтээл дэлгэгдэж байна.
Үзэсгэлэнгийн нээлтэд Соёлын дэд сайд М.Батбаяр, Монголын Гэрэл зурагчдын нэгдсэн холбооны ерөнхийлөгч Л.Жаргалсайхан, Соёл урлагийн газар, Гэрэл зургийн агентлагууд, гэрэл зурагчин уран бүтээлчид оролцов.
Соёлын дэд сайд М.Батбаяр хэлэхдээ: ​”Монгол улсын урт хугацааны хөгжлийн бодлогод : Төрт ёсны уламжлал, түүх, соёлын дурсгал, утга зохиол, урлагийн бүтээлээр үндэсний бахархал төлөвшүүлж, эх орон ч үзэл, эв нэгдлийг нягтруулахаар зорьж буйг засгийн газрын “Шинэ сэргэлтийн бодлого”, Соёлын яамнаас зохион байгуулж буй “Соёлын сэргэлт” ажил, арга хэмжээнүүдээр хэрэгжүүлж байгаа бөгөөд түүний нэг нь энэхүү үзэсгэлэн юм” гэв.
Үзэсгэлэн 07 дугаар сарын 07-ны өдрөөс 14-ний өдрүүдэд үргэлжилнэ.

скачать dle 12.0