Х.Нямбаатарыг хотын 36 дахь даргаар томилно

Нийслэлийн Засаг дарга бөгөөд Улаанбаатар захирагч Д.Сумъяабазар гурав дахь жилийнхээ босгон дээр өөрийнхөө хүсэлтээр албан тушаалаасаа чөлөөлөгдлөө. Тэрээр гурван жилийн өмнө УИХ-ын гишүүний бүрэн эрхээ дэнчинд тавьж чөлөөлөгдөн хотын даргаар томилогдож байлаа. Харин энэ удаад Х.Нямбаатар УИХ-ын гишүүн, Хууль зүй, дотоод хэргийн сайдын бүрэн эрхээсээ чөлөөлөгдөж нийслэлийн Засаг даргаар томилогдохоор болов. Тэрээр нийслэлийн 36 дахь Засаг дарга болж байгаа юм.
Ерөнхий сайдын итгэлт хүн
УИХ, Засгийн газрын гишүүнээсээ чөлөөлөгдөөд нийслэлийн Засаг даргаар томилогдоно гэдэг улстөрч болгоны гаргах шийдвэр биш. Бүгд л албан тушаал ахихыг хүсдэг. Гэхдээ бүрэн эрхийн хугацаа нь дуусахад жил хүрэхгүй хугацаа үлдсэн түүнд алдах зүйл алга. Мөн тэрээр тойрогтоо, дүүрэгтээ аль хэдийнэ дархлагдсан нэгэн. Бас Ерөнхий сайдын хамгийн итгэлт хүн, үеэл нь .Тийм ч учраас Оюутолгойн хөрөнгө оруулагчидтай хэлэлцээ хийх ажлын хэсгийн ахлагч, Францын Орано компанитай байгуулах хөрөнгө оруулалтын гэрээ боловсруулах ажлын хэсгийн ахлагч, “Нүүрсний хулгай”-н асуудлыг хянан шалгах УИХ-ын түр хорооны дарга гээд хамгийн чухал гэж үзсэн бүхий л асуудлуудыг түүнд даалгасаар ирсэн. Мөн албан тушаалынхаа чиг үүргийн хүрээнд Засгийн газраас хэрэгжүүлж буй “Таван Ш” ажиллагааг ажил хэрэг болгоход голлон ажилласан. Товчхондоо Засгийн газрын гишүүдээс хамгийн их ачаалалтай ажиллаж байгаа нь Х.Нямбаатар. Гэвч Ерөнхий сайд түүнийг нийслэлийн Засаг даргаар томилж асуудлыг цэгцлэх нь зүйтэй гэж үзсэн бололтой. ЗГХЭГ-ын дарга Д.Амарбаясгалан түүнийг нийслэлийн Засаг даргаар томилохоор болсон тухай шийдвэрийг танилцуулахдаа “Х.Нямбаатар  сайд УИХ-ын гишүүн, Засгийн газрын гишүүний бүрэн эрхээсээ татгалзаж, Улаанбаатар хотын Засаг даргын үүргийг дангаар гүйцэтгэнэ. Гэхдээ Засгийн газраас шийдвэр гаргаад нэг төрлийн Бүрэн эрхт төлөөлөгч (БЭТ) хэлбэрээр ажиллах нөхцөлийг бий болгох юм.
Улаанбаатар хотын түвшинд Нийслэлийн Иргэдийн төлөөлөгчдийн хурал үйл ажиллагаа явуулж удирддаг. Төр засгийн зүгээс анхаарал хандуулж олон жил хуримтлагдсан бугшсан идээ бээрийг шахахад, Засгийн газар бодлогын дэмжлэг үзүүлж бүх салбарын түвшинд анхаарал хандуулах зорилго агуулж байна” гэсэн юм.    
Багшаас эхэлсэн булган сүүлтэй ажлын гараа
Х.Нямбаатар сайд ажлын гараагаа 2000 онд багшаас, улс төрийн карьераа 2012 онд Сонгинохайрхан дүүргийн ИТХ-ын төлөөлөгчөөс эхлүүлсэн түүхтэй. Түүний төгссөн сургууль, мэргэжил, ажилласан байдлыг танилцуулъя.  
Төгссөн сургууль, мэргэжил:

• 1996 онд 48 дугаар дунд сургууль
• 2000 онд Орхон их сургууль, эрх зүйч (бакалавр)
• 2002 онд Орхон их сургууль, боловсрол судлалын магистр
• 2008 онд Цагдаагийн академи, (Хууль сахиулахын их сургууль) хууль зүйн ухааны магистр
• 2012 онд Удирдлагын академи, төрийн удирдлагын докторант
• 2017 онд Хууль сахиулахын их сургууль, хууль зүйн ухааны докторант

Ажилласан байдал:

• 2000-2007 онд Орхон их сургуульд багш
• 2005-2009 онд Монголын өмгөөлөгчдийн холбоонд өмгөөлөгч
• 2009 онд Сонгинохайрхан дүүргийн хуулийн зөвлөх
• 2009-2012 онд Сонгинохайрхан дүүргийн Төрийн захиргаа, удирдлагын хэлтсийн дарга
• 2012-2016 онд Сонгинохайрхан дүүргийн Иргэдийн төлөөлөгчдийн тэргүүлэгчдийн хурлын дарга
• 2016-2020 онд УИХ-ын гишүүн
• 2019-2020 онд УИХ-ын Хууль зүйн байнгын хорооны дарга
• 2020 оноос УИХ-ын гишүүн
• 2020 оноос Хууль зүй, дотоод хэргийн сайд

Х.Нямбаатарын оронд нөхөн сонгууль явуулахгүй
УИХ-ын сонгуулийн тухай хуулийн 77.3-д “Орон гарсан Улсын Их Хурлын гишүүний бүрэн эрхийн хугацаа дуусахад нэг жил хүрэхгүй хугацаа үлдсэн бол орон гарсан суудлыг нөхөхгүй” гэсэн заалт бий. Үүний дагуу Х.Нямбаатарын оронд нөхөн сонгшууль явуулахгүй. Харин Ж.Мөнхбатын оронд нөхөн сонгууль явуулах байсан ч УИХ эс үйлдэл гаргаж энэхүү сонгуулийг зохион байгуулаагүй. Тэгэхээр 2024 оны сонгууль хүртэл УИХ-ын 27-р тойрог буюу Сонгинохайрхан 1, 2, 3, 4, 5, 6, 20, 22, 24, 26, 32, 33, 34, 35, 36, 37, 41-р хорооны иргэдийг Б.Жаргалмаа гишүүн ганцаараа төлөөлөхөөр болж байна.скачать dle 12.0