Төрийн далбааг мандуулж, жанжин тугийн дор цэргүүд ёслон жагсав

Төрийн далбааны өдөрт зориулсан цэргийн ёслолын жагсаал өнөөдөр Жанжин Д.Сүхбаатарын талбайд боллоо.

Жагсаалд Монгол Улсын Зэвсэгт хүчин, ЦЕГ, ОБЕГ, Хууль  сахиулахын их сургууль, Батлан хамгаалахын их сургууль, Хүндэт харуул зэрэг тусгайлсан чиг үүргийн байгууллагын нийт 90 хайрцаг жагсаж, Улаанбаатар цэргийн хүрээний дарга, хошууч генерал Р.Сүхбат удирдав. Төрийн далбааны өдөрт Монгол Улсын Зэвсэгт хүчний ерөнхий командлагч, Монгол Улсын Ерөнхийлөгч Х.Баттулга, Ерөнхий сайд У.Хүрэлсүх, УИХ-ын дарга Г.Занданшатар, Засгийн газрын гишүүд, Батлан хамгаалах яам, Зэвсэгт хүчний жанжин штабын удирдлага, Монгол Улсад суугаа гадаад орны Элчин сайд нар, Олон улсын байгууллагын төлөөлөгч, иргэдийн төлөөлөл оролцсон юм.



Төрийн далбааны өдрийг энэ жил 10 дахь удаагаа тэмдэглэж буй бөгөөд уламжлал ёсоор Монгол Улсын Төрийн далбааг мандуулж, жанжин тугийн дор цэргүүд ёслон жагссан. Энэ нь цэрэг-иргэний харилцааг бэхжүүлэх, эх оронч, үндэсний бахархлыг дэврээх ач холбогдолтой юм. 


Монгол төрийн бэлгэ тэмдэг болсон Төрийн далбаандаа хүндэтгэлтэй хандах, түүхт ёс, түүхэн уламжлалаа нандигнан өвлөх, үндэсний эв нэгдлийг бэхжүүлэх зорилгоор төрийн далбааны өдөртэй болох хуулийг УИХ-ын гишүүн С.Бямбацогт, Ж.Сүхбаатар, Ц.Дашдорж нар 2008 онд санаачлан батлуулсан юм. Ингэснээр Төрийн далбааны өдрийг жил бүрийн долдугаар сарын 10-нд, баяр наадмын өмнөх өдөр тэмдэглэж байхаар хуульчилж 2009 оноос эхлэн тэмдэглэдэг болсон юм. 



Одоогийн Монгол Улсын Төрийн далбаа нь 1992 оноос хэрэглэж эхэлсэн бөгөөд 1949 оны төрийн далбаанаас социалист одыг нь хассанаараа өөр юм. Далбааны улаан өнгө нь ардчилсан хувьсгалыг, хөх өнгө нь манай ард түмний эгнэгт энхийг эрхэмлэгч үзэл санааг илэрхийлжээ. Соёмбо нь 1686 онд Өндөр гэгээн Занабазар хутагтын зохиосон соёмбо бичгийн эхний үсэг бөгөөд манжийн эсрэг үндэсний тусгаар тогтнолын төлөөт тэмцэгч, 1921 оны ардын хувьсгалын партизан цэргийн хүсэл зоригийн илтгэн мандсаар байна. Соёмбо тэмдэг бол Монголчууд бид бүхэн гал мэт мандан бадарч, Наран, Саран мэт гэрэлтэн мөнхжиж, зэв сум мэт хурц шулуун, хуяг мэт бат бэх байж, загас мэт сонор соргог, өнөр өтгөн явж, арга билэг хослон, төмөр хүрээ лугаа адил төр улсаа хамгаалъя гэсэн гүн утгатай юм.



1911 онд Үндэсний эрх чөлөөний хувьсгалын дараа Монгол Улсын төрийн далбааг бүтээх тухай баримт бичигт өгүүлэхдээ “Олон улсын дор цөм өөр өөрийн далбаа буй, бидний Монгол болбоос өөрөө эзэрхэг эрх хэмжээ бүхийг илэрхийлбэл зохимой” хэмээн шинэ тутам байгуулагдсан Монголын төрийн далбаанд ихээхэн ач холбогдол өгсөн байдаг. Үүнээс хойш 1924, 1940, 1945, 1960, 1992 оны Үндсэн хуулиудад Төрийн далбааны тухай мөн зааж өгчээ.


Сонирхуулахад, АНУ 6 дугаар сарын 14, ОХУ 8 дугаар сарын 22, Итали 1 дүгээр сарын 7, Аргентин 6 дугаар сарын 20-нд Төрийн далбааны өдрөө бүх нийтээр тэмдэглэн өнгөрүүлдэг бол Европын холбоо 5 дугаар сарын 9-ний өдөр далбааныхаа өдрийг ёслол төгөлдөр тэмдэглэдэг ажээ.скачать dle 12.0