Эдийн засгийг тогтворжуулах бодлогыг дэмжиж, 100 сая ам.долларын санхүүжилт батлав

Дэлхийн банкнаас Монгол Улсын эдийн засгийг тогтворжуулж, цаашид илүү тогтвортой бөгөөд хүртээмжтэй хөгжилд хүрэхэд дэмжлэг үзүүлэх зорилгоор 100 сая ам.долларын санхүүжилт батлав. Уг асуудлыг Дэлхийн банкны Гүйцэтгэх захирлуудын зөвлөлийн хурлаар хэлэлцэж дэмжсэн байна.
Дэлхийн банкны Эдийн Засгийн Удирдлагыг Дэмжих цуврал хөтөлбөрийн эхний шатыг 2017 онд батлан хэрэгжүүлсэн. Хоёр дахь санхүүжилтийн 100 сая ам.доллараар өмнөх хөтөлбөрийг үргэлжлүүлэх бөгөөд өрийн тогтвортой байдлыг сэргээх, нийгмийн хамгааллын тогтолцоог бэхжүүлэх, өрсөлдөх чадварыг сайжруулахад чиглэсэн Монгол Улсын бодлогын шинэчлэлийг дэмжиж байгаа юм.

Монгол Улсын эдийн засаг 2016 оны макро эдийн засгийн хүндрэлээс амжилттай гарч чадсан ч суурь эмзэг асуудлууд байсаар байна. Эдийн засгийн өсөлт 2016 онд 1.2 хувь байсан бол  2018 онд 6.9 хувь болж өссөн. Төсвийн алдагдал 2016 онд ДНБ-ий 16.4 хувьтай тэнцэж байсан бол 2018 онд 2.7 хувьтай тэнцэх ашигтай гарсан. Энэ нь ДНБ-д эзлэх Засгийн газрын өрийн хэмжээг дээрх хугацаанд бараг 13 нэгж хувиар буурахад нөлөөлсөн аж. 2014-2016 оны эдийн засгийн идэвхжил саарч байсан үед ядуурал нэмэгдсэн ч эдийн засгийн сэргэлттэй холбоотойгоор ядуурал бага зэрэг буурсан нь хөдөлмөрийн зах зээлд сорилтууд байсаар байгааг болон нийгмийн халамжийн бодлогуудыг илүү үр дүнтэй болгож сайжруулах шаардлагатай байгааг харуулж байна хэмээн тус зөвлөл үзжээ.
Монгол Улс, БНХАУ, БНСУ-ыг хариуцсан Дэлхийн банкны захирал Мартин Рэйзэр  “Энэхүү хөтөлбөр Монгол Улсын эдийн засгийн тогтвортой өсөлтийг бий болгох, улсын төсөв, санхүүг бэхжүүлэх, өрсөлдөх чадварыг сайжруулахад чухал үүрэгтэй. Засгийн газраас дээрх асуудлуудыг шийдэхээр ажиллаж байгаа нь эдийн засагт бүтцийн шинжтэй өөрчлөлт хийх бодлого баримталж байгаагийн тод илрэл юм. Дэлхийн Банк цаашид Засгийн газар болон олон улсын хөгжлийн түншүүдтэй хамтран Монгол Улсын Эдийн засгийг сэргээх хөтөлбөрийг дэмжин ажиллах болно” хэмээн онцлов.
Тус хөтөлбөрт татварын тогтолцоо болон төсвийн хөрөнгө оруулалтыг сайжруулах, одоо хэрэгжиж буй улсын төсвийн хөрөнгө оруулалттай төслийн зардлыг бууруулах, төсвөөс санхүүждэг тусгай сангийн удирдлагыг сайжруулах зэрэг эдийн засгийг тогтворжуулах ажил багтаж буй юм. Түүнчлэн Хөгжлийн банк, Төв банкны сүүлийн жилүүдийн үйл ажиллагаанд хийсэн хөндлөнгийн үнэлгээг олон нийтэд ил болгох, орон сууцны ипотекийн хөтөлбөрийн хэлбэр, бүтцийг сайжруулах замаар худалдан авах чадварт нийцсэн орон сууцны хүртээмжийг нэмэгдүүлэх аж.
Хөтөлбөрийн өөр нэг чухал чиглэл бол уул уурхайн салбараас бусад салбарт ажлын байр бий болгох, нийгмийн хамгааллын бодлогыг зорилтот бүлэгт оновчтой чиглүүлэх замаар ядуу, эмзэг бүлгийн нийгмийн хамгааллын тогтолцоог бэхжүүлэх явдал юм. Мөн эдийн засгийн өрсөлдөх чадварыг сайжруулахын тулд тусгай зөвшөөрлийн шаардлагыг хялбаршуулах, хөрөнгө оруулагчдын хамгаалалтыг бэхжүүлэх, худалдааг хөнгөвчлөх зэргээр бизнес, худалдааны орчныг сайжруулах боломжийг эрэлхийлж буй аж.
Харин уг хөтөлбөрийн хүрээнд хийхээр төлөвлөж буй гурав дахь шатны санхүүжилт нь ОУВС-ийн хөтөлбөртэй нягт уялдаатайгаар арилжааны банкуудын өөрийн хөрөнгийг нэмэхэд чиглэх аж. скачать dle 12.0