ЭМГЭНЭЛ

Базарсадын БАТЦЭРЭН
/1950-2020/
Монголын гэрэл зургийн нэгдсэн холбооны ууган фотомастер, Удирдах зөвлөлийн гишүүн, Дорнод аймгийн гэрэл зургийн холбоог үүсгэн байгуулагч, фото сэтгүүлч Б.Батцэрэн 2020 оны 07 дугаар сарын 23-ны өдөр таалал төгсөж, бид бүхэнд нөхөж баршгүй гарз учирсанд талийгаачийн гэр бүл, үр хүүхэд, төрөл төрөгсдөд нь гүн эмгэнэл илэрхийлье.
Б.Батцэрэн нь 1950 онд Дорнод аймгийн Дашбалбар суманд төрж, 1974 оноос гэрэл зураг авч эхэлсэн. Тэрбээр 1975-1995 онд Дорнод аймгийн “Дөл” сонины газар фото сурвалжлагч, 1995 оноос Дорнод аймгийн Засаг даргын Тамгын газарт хэвлэл мэдээллийн ажилтан, Чойбалсан хот дахь МСҮТ-д гэрэл зургийн багшаар ажиллаж байв.


Б.Батцэрэн нь Олон улсын болон орон нутгийн гэрэл зургийн уралдаануудад амжилттай оролцож тэргүүн, дэд байрын шагнал хүртэж байлаа. Нийтдээ 40 гаруй номын зураг бэлтгэн хэвлүүлсэн ба аймагтаа гэрэл зургийн түр сургалтанд 90 гаруй хүн хамруулснаас 20 шавь нь өнөөдөр мэргэжлээрээ ажиллаж байна. Тэрбээр 1988 оноос хойш уран бүтээлийн бие даасан 42 удаагийн үзэсгэлэн гаргасны сацуу ОХУ-ын Эрхүү, Улаан-Үд, Чита болон Борзя, Агын үндэсний тойрогт зургаан удаа, БНХАУ-ын ӨМӨЗО-ны Хайлаар хотод таван удаа үзэсгэлэнгээ дэлгэж байв.ОХУ-ын Чита мужийн “Забайкальский рабочий” сонины газарт хоёр удаа мэргэжил дээшлүүлэх сургалтад хамрагдсан байна.
Тэрбээр 40 гаруй жил гэрэл зургаар он цагийн түүхийг бичилцэж, Монгол Улсын гэрэл зургийн хөгжилд үнэтэй хувь нэмэр оруулсан, гэрэл зургийг хөгжүүлэх үйлсэд амь бие, ажил хөдөлмөрөө зориулан биднийгээ үлгэрлэн дагуулсан ахмад гэрэл зурагчдыннэг байлаа.
Б.Батцэрэнгийн хөдөлмөр бүтээлийг төр засгаас өндрөөр үнэлэн “Хөдөлмөрийн гавьяаны улаан тугийн одон”, “Алтан гадас одон”, “Хөдөлмөрийн хүндэт медаль” болон бусад ойн медалиуд, “Хэвлэл мэдээллийн тэргүүний ажилтан” цол, “Монголын сэтгүүлзүйн-100 жил” ойн медаль, “Ган үзэгтэн” шагналаар шагнажээ. ОХУ-ын Бүх Буриадын Соёлын үндэсний нийгэмлэгийн дээд шагналаар мөн шагнагдаж байв.
Тэрбээр МГЗНХ-ны дээд шагнал “Гэрэл зургийн мастер” цол, тэмдгээр 2020 онд шагнагдсан манай ууган фотомастерийн нэг юм. Уран бүтээлийн сан хөмрөгөө Үндэсний Төв Архивт хадгалуулах санаачлагыг дэмжин, уран бүтээлч нөхдөө уриалж байсан нь саяхан билээ.
Бидний эрхэм дотны хүн, “Гэрэл зургийн мастер” Б.Батцэрэнгийн тууштай дайчин, ажилч хичээнгүй, үнэнч шударга зан чанар, эгэл даруу, гэгээн дүр төрх нь бидний сэтгэл зүрхэнд мөнхөд дурсагдана. 
Та минь эх дэлхийнхээ хөрсөнд энх мөнх нойрсовч үйл хэрэг, үзэл санаа тань үеийн үед үргэлжлэн дэвжих болно. 
МОНГОЛЫН ГЭРЭЛ ЗУРАГЧДЫН НЭГДСЭН ХОЛБОО
МГЗНХ-НЫ УДИРДАХ ЗӨВЛӨЛИЙН ГИШҮҮД
ҮЕ ҮЕИЙН ГЭРЭЛ ЗУРАГЧИДскачать dle 12.0