Хангайн бүсийн аймгуудын өвөлжилтийн бэлтгэлийн асуудлаар хуралдлаа

Хангайн бүсийн аймгуудын өвөлжилтийн бэлтгэл ажлыг хангах тухай аймгийн удирдлагуудын уулзалт өнөөдөр Өвөрхангай аймгийн Хархорин сумын түүхт Хархорум музейд болж байна.

Хангайн бүсийн аймгууд өвөлжилтийн бэлтгэлийг хэрхэн хангаж байгаа талаар, орон нутгийн удирдлагууд болоод малчдын дунд шийдвэрлэх ямар асуудал байгаа тухай дэлгэрэнгүй ярилцаж, санаа оноогоо хуваалцаж байна.

Уулзалтын үеэр хүнс, хөдөө аж ахуй, орон нутгийн нөхцөл байдлын талаар мэдээлэл танилцууллаа.

Манай орны бэлчээрийн ургамлын ургалтын байдал 7 дугаар сарын 20-ны байдлаар нутгийн 50 орчим хувьд сайн, 30 гаруй хувьд дунд, 20 орчим хувьд буюу Говь-Алтай аймгийн 7, Баянхонгор аймгийн 11, Өвөрхангай аймгийн 4, Төв аймгийн 2, Дундговь аймгийн 9, Өмнөговь аймгийн 6, Дорноговь аймгийн 2 нийт 41 сумын нутгаар муу байгааг анхааралд авч ажиллах шаардлагатай.

Улсын тусгай хамгаалалттай газар, хилийн зурвас газарт отроор өвөлжиж, хаваржих малчин өрх, малын тоог аймаг сумдаас авч нэгтгэн холбогдох төрийн байгууллагуудад хүсэлтийг уламжилж, тухайн газруудад отроор өвөлжүүлж, хаваржуулах малын тооны зөвшөөрлийг авч отор нүүдлийн ажлыг 10 дугаар сард багтаан зохион байгуулах ажил биднээс шийдэл хүлээж байна.

Мөн улсын тусгай хэрэгцээний аймаг дундын 9 отрын бүс нутгийн 783.3 мянга га бэлчээр болон орон нутгийн тусгай хэрэгцээний сумын нөөц 5.1 сая га бэлчээрийн даацтай уялдуулан тодорхой тооны малыг отроор өвөлжүүлж, хаваржуулах ажлыг 11 дүгээр сараас өмнө зохион байгуулах хэрэгтэй юм.

Ирэх өвөл, хаврын улиралд шаардагдах аймаг, сумын өвс, тэжээлийн аюулгүйн нөөцийн тооцоо хийхэд 60.2 мянган тн өвс,15.9 мянган тн тэжээл бэлтгэх хэрэгцээтэй байна. Ийм хэмжээний өвс, тэжээл бэлтгэхэд шаардлагатай хөрөнгийг аймаг, орон нутгийн удирдлага та бүхэн өөрсдийн нөөц бололцоонд тулгуурлан шийдэж өвөл, хаврын эрсдлийг даван туулах арга хэмжээг зохион байгуулахад нэн тэргүүн ээлжинд анхаарлаа хандуулах шаардлагатай байна.

Уулзалт хангайн бүсийн аймгуудын Засаг дарга нарын өвөлжилтийн бэлтгэл ажил, зуншлагын мэдээлэл, ирэх саруудад хийх ажлуудын мэдээллээр үргэлжилж байна.