'Нэг хаалга-Нэг шинжилгээ'-г 30 тэрбум төгрөгөөр зохион байгуулна

Улаанбаатар хотод хоёрдугаар сарын 11-ний 06.00 цагаас хоёрдугаар сарын 23-ны өглөөний 06.00 цаг хүртэл бүх нийтийн байдалд шилжүүлэх бэлтгэлийг хангаж байна. Хөл хорио тогтоосон 12 хоногийн хугацаанд нийслэлийн 411.4 мянган өрх бүрээс нэг иргэнээс шилжилгээ авах ажлыг зохион байгуулах юм. Энэхүү ажлыг зохион байгуулах хүн хүч хийгээд санхүүгийн хувьд багагүй зардал гаргахаар тооцож буй. 

Нэг хаалга-Нэг иргэн шинжилгээг хэрхэн зохион байгуулах вэ
Нийслэл Улаанбаатар хотод коронавирусийн халдвар голомтлон гарч байгаа 30 цэг, идэвхжил өндөр байгаа 89 цэг байгаа аж. Тиймээс хөл хорио тогтоосон хоёрдугаар сарын 11-14-нийг хүртэл хамгийн идэвхжил өндөр байгаа 89 цэгт хамаарах 119 мянган өрхөөс шинжилгээ авахаар төлөвлөж байгаа аж. Үүний дараагаар дүүрэг дүүргээр нь тэг зогсолт хийж блоклох байдлаар шинжилгээ авахаар төлөвлөжээ. Тухайлбал, Баянзүрх дүүргийн өрх бүрээс шинжилгээ авахдаа тус дүүргийг бүхэлд нь тэг зогсоож байгаад хороо бүрт ойрхон шинжилгээ авах цэгүүдийг ажиллуулна. Нэг дүүрэгт хамгийн ихдээ 72 цаг тэг зогсолт хийх байдлаар бүх өрхийн нэг иргэнээс шинжилгээ авах юм байна. Ингээд Баянзүрх дүүргийн өрх бүрээс шинжилгээ авсны дараа дараагийн дүүрэг тэг зогсолт хийж, шинжилгээг авах байдлаар ажиллах аж. 
Шинжилгээ авах 210 цаг ажиллуулна
Урьдчилсан байдлаар  иргэдээс PCR шинжилгээ авах 210 цэг ажиллуулахаар тооцоо гаргажээ. Үүнийг задалбал,  явуулын 73 цэг, автобустай 50 цэг, эмнэлгийн байнгын шинжилгээ авах 87 цэгийг нэгэн зэрэг ажиллуулж, өдөрт 42 мянган иргэнд PCR шинжилгээ авах юм байна. Ингэхдээ өрх бүрээс 18-наас дээш нэг иргэнээс заавал шинжилгээ авна. Тухайн оршин суугаа дүүрэг, хэсгийн хорооны ажилтнууд иргэдийн шинжилгээнд хамрагдах өдөр, цагийг мэдэгдэж, идэвхтэй хамруулахад анхаарч ажиллаж юм байна. Нийслэлд түр оршин суугч, хаягийн бүртгэлгүй иргэдийг ч энэхүү шинжилгээнд заавал хамруулах аж. Хөл хорио тогтоосон үеэр нийгмийн халамж шаардлагатай 21000 өрхөд хүнсний тусламж үзүүлэхээр төлөвлөж байгаа юм. 
Зөвхөн цагдаагийн хамгаалалт, эргүүлийн ажилд 36 мянган төрийн албан хаагч дайчлагдана
Цагдаагийн байгууллагаас хөл хорио тогтоож, өрх бүрээс шинжилгээ авах ажлыг зохион байгуулалтад оролцох хамгаалалт,  аюулгүй байдлыг хангах эргүүлийн ажилд хамгийн  багадаа 36 мянган албан хаагч шаардлагатай тооцоог гаргасан байна. 
Шуурхай штабаас эхний ээлжид төрийн яам, агентлаг, төрийн өмчит газруудаас ажиллах боломжтой төрийн албан хаагчдын тоог гаргасан байна. Яам агентлагаас нийтдээ 22 мянган албан хаагч,  Хууль зүй, дотоод хэргийн яам, түүний харъяа байгууллагаас 4000 гаруй албан хаагч, нийтдээ 26 мянган  төрийн албан хаагчийг дайчилж, цагдаагийн байгууллагын ажилд туслуулах юм байна. 
Төрийн яам агентлагаас 50 мянган хүнийг дайчлах тооцоог гаргасан ч эндээс 22-45 настай эрэгтэй хүмүүсийг бүгдийг нь сонгож 22 мянган албан хаагчийг дайчлах аж. Дайчлагдаж буй төрийн албан хаагчдыг долоо, долоо мянгаар нь найман цагийн зайтай гурван ээлжлээр ажиллахаар төлөвлөжээ.  
Харин нийслэлээс 15184 албан хаагч өрх бүрээс шинжилгээ авах ажилд дайчилна. Үүнээс дийлэнх нь шинжилгээ авах ажлыг зохион байгуулахад оролцох бөгөөд эргүүл, хамгаалалтад 2500 хүнийг ажиллуулах боломжтой гэсэн гэжээ.
 Өрх бүрээс шинжилгээ авах ажилд 30 тэрбум төгрөг зарцуулна
Улаанбаатар хотын 400 гаруй мянган өрх бүрийн нэг иргэнээс шинжилгээ авах ажлыг зохион байгуулахад нийтдээ 30 тэрбум төгрөг зарцуулах тооцоо гарсан байна. Нийт зардлын 4 тэрбум төгрөгийг нийслэлээс гаргаж, үлдсэн санхүүжилтийг Засгийн газрын нөөц хөрөнгө, бусад эх үүсвэрээс гаргах төлөвлөжээ. Шинжилгээ авах ажилд зарцуулах 30 тэрбум төгрөг нь ойролцоогоор 2.5 сая тун вакцин худалдан авахтай тэнцэх хэмжээний эх үүсвэр юм. 
Одоогоор нэг өрхийн иргэнээс нэг л удаа шинжилгээ авах эсэх, шинжилгээгээр эерэг гарсан хүмүүсийг хаана тусгаарлаж шилжүүлэх, өдөрт шинжилгээг хэдээс хэдэн цагийн хооронд, ямар маршрутаар авах эсэх нь эцсийн байдлаар тодорхой болоогүй байна. Өнөөдрөөс зарим асуудал тодорхой болж, олон нийтэд нэгдсэн мэдээлэл өгөх хүлээлттэй байгаа юм. скачать dle 12.0