Зарим салбарын ажлыг хязгаарлах шийдвэр гаргалаа

Засгийн газрын өнөөдрийн ээлжит хуралдаанаар, дөрөвдүгээр сарын 3-18-нд зарим салбарын ажлыг хязгаарлах шийдвэр гаргалаа. 

Хуралдаанаар, дээрх хугацаанд Гамшгийн үеийн бэлэн байдлын "улаан" түвшин буюу хатуу хөл хорио тогтоохыг дэмжээгүй байна. Харин улсын хэмжээнд зарим салбарын ажлыг хязгаарлах УОК-ын саналыг дэмжжээ. Энэ нь  цар тахлын үед эрүүл мэндээ хамгаалахын зэрэгцээ эдийн засгаа сэргээх зорилгоор халдвар хамгааллын дэглэмийг мөрдөж, иргэд, аж ахуйн нэгжүүдийн ажлыг хэвийн үргэлжлүүлэх бодлоготой холбоотой юм.

Дээрх хугацаанд:  

• Ресторан, лоунж, саун, бассейн, алжаал тайлах төв, кино театр, үзвэр үйлчилгээ, бялдаржуулах төв, амралт сувилал, сургалтын төв ажиллахгүй
• Хоол үйлдвэрлэл, зоогийн газрууд хүргэлтээр үйлчлэх
• Үсчин, гоо сайхны газрууд амралтын өдрүүдэд ажиллахгүй, бусад өдөр халдвар хамгааллын дэглэм сахиж ажиллах   
• Худалдаа, үйлчилгээний газрууд хүн хоорондын зай бариулах, ариутгал, халдваргүйжүүлэлтээ дээд зэргээр хийх, нийт талбайнхаа 30 хувиас хэтрэхгүй байхаар тооцон үйлчлэх /супермаркетууд түрдэг тэрэгний тоогоор зохицуулалт хийх/
• Нарантуул, Хархорин, Барс, Хүчит шонхор, Нарантуул-2 зэрэг томоохон зах  30 хувиар ажиллах /амралтын өдрүүдэд ажиллахгүй/
• Дэлгүүр, худалдааны төвүүд 20.00 цагт хаах
• Аймаг, орон нутаг руу зорчих иргэдийн хөдөлгөөнийг хүндэтгэх шалтгаанаас бусад тохиолдолд хориглох
• Орон нутаг руу хүнс, ачаа тээвэр, малын өвс тэжээл, шатахуун тээврээс бусад тохиолдолд автомашины хөдөлгөөнийг хязгаарлахаар боллоо.

Тодорхой зохицуулалт хийх зорилгоор:

• Нэг дор таваас дээш хүн цуглахгүй байх зохион байгуулалтыг төрийн болон хувийн хэвшлийн бүх шатанд хэрэгжүүлэх
• 60-аас дээш настай ахмадуудыг шаардлагагүй тохиолдолд гэрээс гарахгүй байхыг сануулах, халдвар авахаас сэргийлэх, дархлаажуулах
• Хөршийн холбоо,  иргэдийн сайн дурын ажлыг идэвхжүүлэх
• Төрийн болон хувийн хэвшлийн байгууллага нийт ажилтан, албан хаагчдынхаа 30-аас ихгүй хувийг ажиллуулах
• Барилга, бүтээн байгуулалтад ажиллаж байгаа хүмүүс  нэг дор таваас дээш бөөгнөрөхгүй байх, хүн хоорондын зайгаа баримтлах
• Хорио цээрийн дэглэмийн хэрэгжилтийг сахиулах Ажлын хэсэг байгуулах

Тандалт судалгаа, дархлаажуулах ажлыг эрчимжүүлэх хүрээнд:

• Ойрын хавьтлыг олж тогтоох тандалт судалгааг эрчимжүүлэх
• Гэрээр долоо хоног тусгаарлагдах иргэдэд гарын авлага+гэрийн эмчилгээний багц /эм, халууны шил, витамин, гар ариутгагч зэрэг/ хүргэх
• Гадаадаас ирэх иргэдийн тусгаарлалтыг долоо хоног болгох, ингэхдээ 3, 5 дахь өдөр нь PCR шинжилгээ авч сөрөг гарсан тохиолдолд гаргах, гэрээр ажиглахыг болих
• Тусгаарлах байранд эмчлүүлж эдгэрч гарсан иргэдийг долоо хоног гэрээр ажиглахыг цуцлах
• Орон гэргүй, асрамж шаардлагатай болон хорих ангид хүмүүжигч, түр саатуулах байранд саатуулагдсан иргэдийг дархлаажуулалтад хамруулах
• Тавдугаар сарын 1-нээс өмнө нийслэлийн нэг сая иргэнийг дархлаажуулах
• Дөрөвдүгээр сарын 5-наас орон нутгийн зорилтот бүлгийг /эмч, эмнэлгийн ажилтан, цагдаа, онцгой, хил гаалийн ажилтан, албан хаагчид/ дархлаажуулах
• Долоодугаар сарын 1 гэхэд орон нутгийн иргэдийг дархлаажуулж дуусгахаар төлөвлөж байна.

скачать dle 12.0