Японд суралцах 45 оюутан батламжаа гардав

Боловсрол, шинжлэх ухааны сайд Л.Энх-Амгалан “Инженер, технологийн дээд боловсрол” төслийн бакалаврын хамтарсан хөтөлбөр болон магистрын хөтөлбөрт хамрагдаж Япон улсад суралцах болзол хангасан 45 оюутанд батламж гардууллаа.
​Бакалаврын хамтарсан хөтөлбөрийн 44, магистрын хөтөлбөрийн 1, нийт 45 оюутан тэргүүлэх инженер, технологийн чиглэлээр тус тус 2 жил суралцах юм. Төгсөөд эх орондоо эргэн ирж мэргэжлээрээ ажиллах болзолтой ийнхүү Япон улсыг зорино.
​Төслийн Бакалаврын хамтарсан хөтөлбөр ШУТИС-ийн Бакалаврын сургалтын хөтөлбөрийн чанарыг олон улсын түвшинд хүргэх, сургалтын орчныг сайжруулах, инженер, технологийн чиглэлээр өндөр мэдлэг, ур чадвар бүхий мэргэжилтэн, хүний нөөцийг бэлтгэх зорилготой. Хөтөлбөрт нийт 320 оюутан суралцуулахаар төлөвлөснөөс 289 оюутан хамрагдаад байна. Энэхүү хөтөлбөрт хамрагдсан оюутнууд Шинжлэх, ухаан технологийн их сургуульд хоёр жил суралцаад Япон улсын Консорциумын 10 их сургуульд 3 дугаар дамжаанаас шилжин Барилга, хүрээлэн буй орчны инженер, Архитектур, Механик инженер мэргэжлээр суралцдаг хос дипломтой төгсдөг онцлогтой юм.

Төслийн үндсэн 3 хөтөлбөрийн хүрээнд 2022 оны эхний хагас жилийн байдлаар нийт 821 оюутан, судлаач, багш нар хамрагдсан нь суралцуулах зорилтот 1000 инженерийн 82.1 хувийг эзэлж байна.



скачать dle 12.0