Евро 2024: Мбаппе гэмтэж, Лукаку, Лунин нар тааруу тоглолоо

РУМЫН 3 – 0 УКРАИН
Тоглолт эхлэхийн өмнө Украины шигшээ багийг ямар сайн бүрэлдэхүүнтэйг хүн бүр гайхаж, битүү морьд гэцгээж байв. Гэтэл эхний тоглолтдоо бүдэрч, хөрсөн дээрээ буулаа. Ингэхдээ бүр Румыныг барсангүй. Станчиу, Марин, Драгуш гурав гурвуулаа гайхалтай гоол оруулж, түүхэн ялалт байгуулжээ.

Румын улс Еврод хийсэн сүүлийн 17 тоглолтдоо хожоогүй байсан бөгөөд хамгийн сүүлд 24 жилийн өмнө Английг хожиж байв.

Украины шигшээ багийн хаалгач Андрей Лунин өнгөрсөн улирал Реал Мадридын бүрэлдэхүүнд гайхалтай байсан ч шигшээ багтаа үр нөлөө үзүүлж чадсангүй. Тоглолтын дараа муу тоглосноо хүлээн зөвшөөрч, ард түмнээсээ уучлалт гуйжээ.

Тоглолтын шилдгээр тодорсон Николай Станчиу "Энэ гоол миний замналын хамгийн шилдэг нь байлаа. Энэ өмсгөл надад их зүйлийг өгүүлж байна. Еврод гоол оруулж, хожил байгууллаа.Үнэхээр гайхалтай. Дэмжлэг онцгой байлаа. Өмнө нь ийм зүйл мэдэрч байсангүй. Миний хамаатнууд, аав, эхнэр минь гээд бүгд уйллаа. Тэдэнд талархмаар байна. Тэднийгээ өнөөдөр баярлуулсан гэж бодож байна" гэв.
Украины шигшээ багийн ахлагч Тарас Степаненко "Өнөөдөр тоглолтдоо үнэхээр сэтгэл дундуур байна. Өнөөдөр бид өмнөх шигээ байсангүй. Румын хожил хүртэх эрхтэй. Бид тэмцээнээ цааш үргэлжлүүлнэ. Бидэнд хоёр тоглолт үлдсэн. Хүчтэй байж, нөхцөл байдлыг өөрчилнө" гэжээ.
БЕЛЬГИ 0 – 1 СЛОВАК
Бельгийн шигшээ багийн алтан үе дуусч, шилжилтийн үе ирж байгаа ч Словакт хожигдоно гэж олон хүн бодоогүй биз. Тоглолтын эхэнд Бельгийн шигшээ багт гоол оруулах цөөнгүй боломж олдсон ч ашиглаж чадаагүй. Улмаар хамгаалалтдаа алдаж гаргаж, түүнийг нь Словак овжин ашиглаж, Шранз тоглолтын цорын ганц гоолыг оруулжээ.

Ромелу Лукаку олон боломж алдаж, хоёр гоол оруулсан ч шүүгч давтан бичлэг үзээд тооцоогүй. Эхнийх нь отон тоглолт байсан бол удаах нь довтолгооны эхлэлд Опенда бөмбөгөнд гар хүрчихсэн гэж үзсэн.
Словакийн хамгаалалт ч ганц гоолын тэргүүллээ хадгалах гэж амиа тавив. Бельгийн шигшээ хамаг л довтолгооны сэлгээгээ хийж, үр дүнг өөрчлөхийг хүссэн ч санаснаар болсонгүй. Словак 11 жилийн дараа Бельгийг буулган авлаа.

Тоглолтын дараа Бельгийн ахлах дасгалжуулагч Доменико Тедеско "Бид энэ тэмцээний хүрээнд хожигдол хүлээнэ гэдгээ мэдэж байсан. Гэхдээ өнөөдөр гэж мэдсэнгүй. Энэ багийг үүнээс илүү сайжруулна гэж ам гарч чадахгүй. Бид өнөөдөр олон боломж гаргаж, гоол ч оруулсан. Гоолыг тооцсон бол тоглолт амархан болох байлаа. Бид довтолгооны төсгөлөө л хийж чадсангүй. Мэдээж энэ бол спортын нэг хэсэг. Тоглогчид үнэхээр сэтгэлээр унасан" гэв.
Словакийн дасгалжуулагч Франческо Калзона "Манай тоглогчид бүхнээ дайчилж, зүтгэж, хүчтэй өрсөлдөгчөө буулган авлаа. Би хөвгүүддээ ялагчийн сэтгэхүйтэй бай гэж хэлсэн. Бид шилдгүүдтэй эн тэнцүү өрсөлдөж чадна. Гайхалтай хожил байлаа. Гэхдээ бид улам хичээнэ. Ирэх тоглолтууддаа ч гоол оруулж, зорилгодоо хүрч, дараагийн шатанд шалгарна" гэжээ.
ФРАНЦ 1 – 0 АВСТРИ
Австрийн шигшээ баг зөөлөн боорцог биш гэдгээ харуулж, дэлхийн шилдэг Францын шигшээг багагүй сандаргалаа. Тэдний шахалт, талбайн төвд бөмбөг эзэмшиж буй байдал, довтолгооны санаачлага зэрэг нь хэдийнэ дэлхийн топ баг шиг харагдав. Гагцхүү хамгаалалтын шугамдаа гаргасан ганц алдаа нь хожигдлын үнэтэй байжээ.

Филип Мвенегийн тааруу дамжуулалтыг Мбаппе олзолж, хөндлөн дамжуулсан бөмбөг нь Воберын толгойноос Австрийн хаалганд оров. Мбаппе, Турам, Дембеле гурвыг жигүүрт тогтооход тун хэцүү байсан. Мөн Нколо Кантег дурдах нь зүйтэй. Бага сага алдааг эс тооцвол хуучны Канте талбайдаа эргэн иржээ.
Тоглолтын шилдгээ шалгарсан Нколо Канте "Тоглолтын эхэнд жаахан айдас байсан. Гэхдээ багийнхантайгаа талбайд гараад хуучны мэдрэмжээ эргүүлэн авлаа. Бүгд гайхалтай байлаа. Бид хүмүүс учир бүгд сайн үр дүнгийн төлөө хамтдаа тэмцэж, үүнийгээ үргэлжлүүлэх хэрэгтэй. Килианыг гэмтэл авч талбайг орхиход бүгд санаа зовсон. Нөхцөл байдал ямар байгааг мэдэхгүй юм. Гэхдээ түүнийг эргэн талбайд харна гэж найдаж байна" гэлээ.

Килиан Мбаппегийн хувьд тоглолтын үеэр хамрандаа бэртэл авч, талбайг орхисон юм.

Австрийн ахлах дасгалжуулагч Ралф Рангник "Бид олон боломж үүсгэлээ. Мэдээж, Франц ч олон боломж үүсгэсэн. Би багаа зэмлэхгүй. Бид үргэлж зөв шийдвэр гаргаад байхгүй. Гэхдээ бидний өрсөлдөгч хэн байсныг битгий мартаарай. Франц илүү олон боломж үүсгэсэн. Хожил хүртэх эрхтэй. Гэхдээ сүүлийн минут хүртэл бид тэмцлээ. Бид бүхнээ талбай дээр гаргалаа. Одоо дараагийн тоглолтдоо анхаарч, Польшийг хожихыг хичээе" гэв.скачать dle 12.0