Монгол Улсын Ерөнхийлөгч У.Хүрэлсүх саналаа өглөө

Монгол Улсын Ерөнхийлөгч У.Хүрэлсүх гэргий Л.Болорцэцэгийн хамт Баянзүрх дүүргийн 48 дугаар сургуульд байрлах 8-1-1-3 дугаар хэсгийн хорооны санал авах байранд саналаа өглөө.

Тэрбээр саналаа өгсөний дараа хэвлэлийнхэнд хандаж хэлэхдээ, энэ удаагийн сонгууль анхдугаар Үндсэн хууль батлагдсаны түүхт 100 жилийн ойтой давхцаж байгааг онцлоод Үндсэн хуулиар олгогдсон эрхээ эдэлж, ардчилсан сонгуульдаа идэвхтэй оролцохыг иргэдэд уриаллаа.


Энэ удаагийн сонгуулийн дүнгээр тойргоос 78, жагсаалтаар 48 гишүүн сонгогдоно. Нийслэлд хамаарах зургаан тойрогт 24, хөдөө, орон нутагт хамаарах долоон тойрогт 54 суудал ногдож байна. 19 нам, хоёр эвсэл болон бие даан нийт 1341 хүн нэр дэвшсэн нь 1992 оноос хойш хамгийн олон нам эвсэл оролцож байгаа сонгууль юм.

Нэр дэвшигчдийн 61.2 хувь нь эрэгтэй, 38.8 хувь нь эмэгтэй. Хамгийн ахмад нь 79 настай, хамгийн залуу нь 25 настай.

Сонгогчийн нэрийн жагсаалтад бүртгэгдсэн 2.224.233 иргэн саналаа өгөх бөгөөд 1.143.172 нь орон нутагт, 1.081.061 нь нийслэлд байна.

Сонгогчийн саналыг 2198 санал авах байранд 2943 санал тоолох төхөөрөмжөөр уншуулан дүнг гаргаж, 100 хувь гар аргаар хяналтын тооллого хийнэ. Иргэдийн сонгуульдаа оролцох боломжийг бүрдүүлэхээр 25 мянга гаруй төрийн албан хаагч ажиллаж байна. Түүнчлэн сонгуулийг дотоодын 30 мянга, гадаадын 260 ажиглагч ажиглаж, дотоодын хэвлэл мэдээллийн байгууллагаас гадна олон улсын 12 агентлаг сурвалжилж буй юм.скачать dle 12.0