ЭТТ ХК-ийн хөрөнгө оруулалтын зардлыг 200 тэрбум төгрөгөөр танана

Засгийн газраас ЭТТ ХК-д онцгой дэглэм тогтоож, бүрэн эрхт төлөөлөгчийн баг томилж, ажиллуулсан. Тэгвэл тус БЭТ-ийн багийн ахлагч У.Бямбасүрэн өнөөдөр мэдээлэл өглөө. 
Тэрээр, "2025 оны эхний хагас жилийн гол үзүүлэлтүүд бүгд өнгөрсөн оны мөн үеэс19-61 хувь буурсан. Жишээлбэл, өнгөрсөн оны эхний хагас жилд 17.1 сая тонн хөрс хуулалт хийж байсан бол энэ жил 13.8 сая тонн болсон. Нүүрс олборлолт 17.1 сая тонн байснаас энэ жил 13.8 сая тонн болж буурсан. Борлуулалт мөн 16.8 сая тонноос 10.2 сая тонн, экспорт 16.5 сая тонноос 12 сая тонн болж буурсан. Орлогын хувьд өнгөрсөн оны эхний хагас жилд 1.8 тэрбум ам.доллар байсан бол энэ жил 710 сая ам.долларт хүрсэн байна. Энэ уналтын нөхцөлд Засгийн газар онцгой дэглэм тогтоосон юм.
Гадаад зах зээл дээр ч нөхцөл байдал өөрчлөгдөж байна. БНХАУ-ын Ганцмод боомт дээр нүүрсний үнэ хоёрдугаар сарын 10-ны байдлаар 1000 орчим юаньд хүрсэн. Энэ боломжийг ашиглахын тулд Онцгой бүрэн эрхт төлөөлөгчийн баг соргог ажилласан.
Биржийн борлуулалтын тухайд, 2025 оны эхний хагас жилд 85 арилжаанаас 20 нь амжилттай болж, 3 сая тонн нүүрсийг 95.5 сая ам.доллараар зарсан. Харин онцгой дэглэм тогтоосноос хойш, 7-р сарын 1-нээс 8-р сарын 10 хүртэл 23 арилжаа амжилттай болж, 382 мянган тонн нүүрсийг 3 сая ам.доллараар зарсан. Тодруулбал, өнөөдөр буюу 8-р сарын 13-нд ганцхан өдөрт 3 арилжаагаар 64 мянган тонн эрчим хүчний нүүрс, 512 мянган тонн нүүрс, 19.2 мянган тонн баяжуулсан коксжих нүүрс борлуулж, 43.6 сая ам.долларын орлого оллоо. Энэ нь онцгой дэглэмийн хугацаанд олсон нийт орлогын тал хувийг зөвхөн нэг өдөрт бүрдүүлсэн гэсэн үг.
Долоодугаар сараас эхлээд олборлолт, борлуулалт, экспортын үзүүлэлтүүд огцом сайжирсан. Зургаадугаар сард 1.2 сая тонн байсан олборлолт 2.7 сая тонн болж, борлуулалт 900 мянган тонноос 1.8 сая тонн, экспорт 1.6 сая тонноос 1.9 сая тонн болсон. Өдрийн дундаж ачилт ч нэмэгдэж, Ганцмод боомтоор нэвтэрсэн тээврийн хэрэгслийн тоо наймдугаар сарын 7-нд 1000-д хүрч, энэ оны хамгийн өндөр үзүүлэлт боллоо.
Бид гацаад байсан биржийн гэрээний асуудлыг шийдвэрлэж эхэлсэн. Өнгөрсөн жилийн өндөр үнэтэй гэрээнүүдийг хааж, илүү төлөгдсөн дүнгээр нүүрс нийлүүлэх, эсвэл дараагийн арилжаанд дэнчин болгон ашиглах нөхцөлөөр 5 гэрээг цэгцэлсэн.
Мөн “Тавантолгойн нүүрс ачих логистикийн төв” дээрх эвдрэл, доголдлыг засварлаж, бүрэн хүчин чадлаар ажиллуулах бэлтгэлийг хангаж байна. Үүнээс гадна худалдан авах ажиллагааг нэг удирдлагатай, ил тод, төвлөрсөн байдлаар зохион байгуулахаар ажлын шинэ бүтэц байгуулсан. Есдүгээр сарын 1-ний өдөр гэхэд энэ ажил бүрэн цэгцэрнэ.
Өр, зардал бууруулах чиглэлээр хөрөнгө оруулалтын зардлыг энэ жил 200 тэрбум төгрөгөөр танах, үйл ажиллагааны зардлыг 30 хувиар бууруулах төлөвлөгөөг баталсан.
Авлига, албан тушаалын гэмт хэрэгтэй тэмцэх хүрээнд шүгэл үлээгчийн эрх зүйн байдлыг хамгаалах, ил тод байдлыг нэмэгдүүлэх хуулийн төслүүдийг есдүгээр сарын 10-нд Засгийн газрын хуралдаанд оруулах үүрэг өгсөн. Мөн холбогдох албан тушаалтнуудад хууль бус дарамт шахалт үзүүлсэн тохиолдолд шуурхай арга хэмжээ авахыг даалгасан.
Эцэст нь хэлэхэд, эдгээр бүх арга хэмжээг хэрэгжүүлснээр зургаадугаар сард 90 сая ам.доллар байсан орлого долоодугаар сард 127 сая ам.доллар, наймдугаар сарын эхний 10 гаруй хоногт 83.6 сая ам.долларт хүрээд байна. Цаашдаа энэ өсөлтийг хадгалахын төлөө Засгийн газар, компани, иргэд, ААН-үүд хамтдаа ажиллахыг уриалж байна" гэлээ.скачать dle 12.0