Монголыг дэлхийд сурталчилсан зардлаа 800 нугалж олсон “Go Mongolia”

Сүүлийн үед Соёлын сайд Ч.Ундрамын улстөржилтийн бай болж буй  “Go Mongolia” хөтөлбөр Монголын эдийн засагт ямар үр өгөөж авчирсныг эргэн харцгаая. Тухайлбал,  “Go Mongolia” хөтөлбөр хэрэгжсэнээр 2022 онд 200 мянга гаруй байсан жуулчдын тоо 2024 онд анх удаа 808 мянга болж өссөн нь уг төслийн гол үр дүн. Монгол Улсад 2024 онд ирсэн 800 гаруй мянган жуулчин 1.6 тэрбум ам.доллар буюу 6 их наяд төгрөгийн эдийн засгийн эргэлт бий болгосон байна.
BBC, CNN, FULHAM НИЙТДЭЭ  670 САЯ ГАРУЙ ХҮНД МОНГОЛ УЛСЫГ СУРТАЛЧИЛЖЭЭ

 
Фулхэм клубийн сургалтын бааз дахь бэлтгэлийн хөтөлбөр. 2025 оны 4 дүгээр сарын 2-7-ны хооронд Фулхэм клубийн Премьер лигийн түвшний сургалтын бааз дээр “Go Train with Fulham” хөтөлбөрөөс сонгогдсон 11 хүүхэд болон Соёлын яамны 5 төлөөлөгчийн бүрэлдэхүүнтэй багийг хүлээн авч, сургалтын хөтөлбөрийг зохион байгуулав.
Монгол Улс 2023 оноос анх удаа стратеги төлөвлөгөөтэйгөөр улсаа олон улсад сурталчлах ажлыг эхлүүлж байсан нь Go Mongolia брэнд. 2022 онд 200 -хан мянга байсан жуулчид 2024 онд анх удаа 808  мянга болж өссөн нь энэ төслийн гол үр дүн байлаа. 2024 онд Монголд ирсэн 800 мянган жуулчин 1.6 тэрбум ам.долларын эдийн засгийн эргэлт бий болгосныг төгрөгт шилжүүлбэл 6 их наяд гэсэн аварга тоо гарч байна.
Аялал жуулчлалын салбар улсын төсвийн 20 хувьтай тэнцэхүйц асар том эргэлтийг эдийн засагт авчирсан цаад шалтгаан нь Монгол улс Засгийн газрын хэмжээнд гадаад сурталчилгаандаа онцгой анхаарсных байв. Монгол Улсын Засгийн газар, тэр дундаа Go Mongolia-г гардан хэрэгжүүлсэн Соёлын яам Английн үндэсний телевиз BBC, АНУ-ын CNN, дэлхийн тэргүүлэгч маркетинг, брэндингийн компани Edelman, мөн түүний сувгаар National Geographic, Time Magazine, CNBC, БНХАУ-ын 400 сая хэрэглэгчтэй аяллын платформ Trip.com зэрэг байгууллагуудтай хамтран ажилласнаар Монголыг зорих жуулчдын тоо огцом өссөн юм. BBC – 177 сая, CNN – 270 сая, Fulham – 215 сая хүн нийтдээ 670 сая гаруй хүнд Монгол Улсыг сурталчилсан учраас Монгол улс түүхэндээ анх удаа 800 мянган жуулчин хүлээж авч байлаа.
1 АМ.ДОЛЛАР ТУТАМД 800 ОРЧИМ АМ.ДОЛЛАРЫН ЭДИЙН ЗАСГИЙН ЭРГЭЛТ БИЙ БОЛГОВ

“Go Mongolia”-г  маш богино хугацаанд бодит үр дүн өгсөн, хамгийн амжилттай хэрэгжсэн төсөл гэж эдийн засагчид онцолж байна.Монгол Улс маркетингийн сурталчилгаанд зарцуулсан 1 ам.доллар тутамдаа 800 орчим ам.доллар, өөрөөр хэлбэл 3500 төгрөг тутамд 2 сая төгрөгийн эдийн засгийн эргэлт бий болгосон гэх тооцоо гарчихаж.  Аялал жуулчлалын салбарын өгөөжийг   зочид буудал, жуулчны бааз, ресторан, бар,  аяллын компаниуд, хөдөө орон нутгийн малчид, гар урлал эрхлэгчид гээд бүх салбар, таксинд явдаг Дорж, найман нэрийн барааны дэлгүүр ажиллуулдаг Дулмаа, бэлэг дурсгалын жижиг бизнес эрхэлдэг Цэцэгээ гээд хүн бүр хүртдэгээрээ онцлог. Ингээд харахаар эдийн засгийн эргэлтийг нэмсэн 6 их наяд төгрөг хүн бүрийн халаасанд орж, амьжиргаанд нь дэм болсон гэсэн үг.
ЗАРИМ ИНДЕКСҮҮД САЙЖИРЧ, ЗЭЭЛЖИХ ЗЭРЭГЛЭЛ ӨСЛӨӨ
Монгол Улсын нэр хүндийг олон улсын тавцанд нэмэгдүүлсэн том төсөл бол “Go Mongolia”. “Go Mongolia” хэрэгжсэнээр Монгол Улсын “зөөлөн хүчний индекс” буюу соёл, дипломат харилцааны үзүүлэлт 14 байр урагшилжээ. Зарим индексүүд сайжирч, Монгол Улсын зээлжих зэрэглэл хүртэл дээшилсэн байх юм. Орчин үеийн олон улсын харилцаа  зөвхөн улс төр, дипломат харилцаагаар хязгаарлагдахгүйг энэ үзүүлэлтүүдээс харчихаж болж байна.  Олон улсын харилцаа иргэд хоорондын ойлголцол, бизнес хоорондын хамтын ажиллагаа зэрэг өргөн хүрээг хамарсан ойлголт болоод удаж буй. Товчхондоо соёлын дипломат харилцаа, үндэсний сурталчилгаа  улс хоорондын өрсөлдөөний томоохон талбар болчихож. Үр дүнгээ богино хугацаанд өгсөн “Go Mongolia” брэнд үүний тод жишээ.
ЯМАР Ч УЛС ГАДААД СУРТАЛЧИЛГААНДАА  МӨНГӨ ЗАРЦУУЛАХГҮЙГЭЭР ГАДНААС ОРЛОГО ОЛОХГҮЙ
Улс орнууд “Соёлын дипломат харилцаа, үндэсний сурталчилгаа” гэсэн энэ том урсгалаас гээгдэж хоцорвол хөрөнгө оруулалт татах, худалдаагаа өргөжүүлэх, ажлын байр нэмэгдүүлэх, аялал жуулчлалын урсгалыг өсгөх боломжоо алдаж байна гэсэн үг. Ямар ч улс гадаад сурталчилгаандаа  мөнгө зарцуулахгүйгээр гаднаас орлого олно гэж байхгүй. Хатуухан хэлэхэд өчнөөн гоё оронд хичнээн сайхан айлчлал хийлээ ч үр дүн гарахгүй бол тэр айлчлал Монголд өгөөжгүй, хэрэггүй.
Гадаад хамтын ажиллагаа, гэрээний талаар ярьж байгаа бол зөвхөн зардал бус, үр дүн, эдийн засгийн өгөөж, улс орны нэр хүндийн өсөлтийг хамтад нь ярьж үнэлж байж Монгол улс хөгжих нь булзах аргагүй бодит үнэн юм.
Хоёр их гүрний дунд оршиж буй ардчилсан Монголд зөөлөн хүчний бодлого л тусаа өгнө. Өөрөөр хэлбэл “хадны завсар хавчуулагдсан халиуны зулзага шиг” манай улсын хувьд Монголынхоо  сайн сайхан зүйл, урлаг соёл, түүхээ дэлхийд таниулж байж л эдийн засгийн бие даасан байдлаа бэхжүүлж чадна.
Улс төржүүлэх ёсгүй зүйл гэж бийг мэдээллийнхээ төгсгөлд онцолъё. Гадаад харилцаа, хамтын ажиллагаагаа улс төржүүлснээр манай улс л хохирно. Цаашид Монголтой  хамтран ажиллах сонирхолтой түнш улс, байгууллага олдохгүй болно. Дэлхийн бүх улс орон хөгжихийн төлөө өрсөлдөж байна. Бүгд гадаад сурталчилгаандаа анхаарч, аялал жуулчлал, хөрөнгө оруулалт татах бодлого хэрэгжүүлж байна. Жишээлбэл, бидний сайн мэдэх Вьетнам улс жил бүр 10 сая ам.долларыг зөвхөн олон улсын сурталчилгаандаа зарцуулж байна. Харин дундаж улс орон жил бүр 10–150 сая ам.долларыг гадаад сурталчилгаандаа зарцуулдаг гэх статистик бий.скачать dle 12.0