“Энэрэл” төвийн хүүхдүүд төрсөн өдрөө тэмдэглэлээ

Жил бүр Монгол Бахархлын өдөр буюу Өвлийн тэргүүн сарын шинийн нэгэнд Эрдэнэт үйлдвэрийн дэргэдэх “Энэрэл” төвийн хүүхдүүд төрсөн өдрийн баяраа хамтдаа тэмдэглэдэг уламжлалтай. Уламжлал ёсоор энэ өдөр тус төвийн хүүхдүүд, багш ажилтнууд хамтдаа дуулж бүжиглэн тэмдэглэлт өдрөө дурсамж дүүрэн өнгөрүүллээ.
Эрдэнэт үйлдвэрийн нийгмийн хариуцлагын хүрээнд бий болсон олон бүтээн байгуулалт, бахархалт үйлсийн нэг нь “Энэрэл” хүүхдийн төв бөгөөд 1992 онд нээгдсэнээс хойш эдүгээ 33 дахь жилдээ тасралтгүй үйл ажиллагаа явуулж ирсэн. Одоо тус төвд 2-оос 18 насны 60 хүүхэд өсөж, хүмүүжин,, сургуулийн өмнөх насны болон ерөнхий боловсролын сургуульд суралцаж байна.
Энэ жилийн төрсөн өдрийг “Энэрэл” төвийнхөн бүтээлч үйл ажиллагаандаа илүү ач холбогдол өгч, хүүхдүүдийн гар урлал болон уран зургийн бүтээлээр үзэсгэлэн дэлгэн үзүүлснээрээ онцлогтой байв. Өнгөрсөн нэг жилийн хугацаанд сурч мэдсэнээ багш ажилтнууд болон бие биедээ үзүүлж, амжилт ололтоо тайлагнан, цаашдын зорилго мөрөөдлөө хэрхэн тодорхойлж буйгаа хүүхдүүд танилцуулж ярилаа. Тус төвийн хүүхдүүдийн нэг Н.Анар аниме төрлөөр олон бүтээл хийж, дэлгэн тавьсан нь багш нарынхаа төдийгүй Эрдэнэт үйлдвэрийн удирдлага, уурхайчдын сонирхлыг ихээхэн татаж, цаашид энэ чиглэлээр суралцахад нь дэмжлэг үзүүлэхээр болсныг төрсөн өдрийн баяр дээр дуулгасан.
“Ер нь бид хүүхдүүдийнхээ авьяас сонирхлыг багаас нь нээж, тэрхүү хүсэл эрмэлзэл дээр нь нэг бүрчлэн анхаарал тавьж, хөгжүүлэх, бодлого хөтөлбөртөө тусган дэмжих зорилт дэвшүүлсэн. Ингэснээр хүүхдүүдийнхээ юу хүсэж мөрөөдөж, ямар авьяас чадвар илүү байгааг нь тодруулж, ирээдүйн мэргэжлээ өөрийн сонирхлоор эзэмшин, тууштай үр бүтээмжтэй хөдөлмөрлөх үүд замыг нь нээж өгөхийг зорьж байна” гэж "Энэрэл" төвийн эрхлэгч М.Майцэцэг онцоллоо.
“Энэрэл” төвийн хүүхдүүдийн ирээдүйн боловсрол, хөгжилд нь хөрөнгө оруулж, хүүхэд бүрийн нэр дээр Эрдэнэт үйлдвэрийн удирдлага, уурхайчин ах эгч нар нь дэмжлэгийн данс нээсэн бөгөөд үйлдвэрийнхээ төрсөн өдрөөр энэ санд хандив нэмдэг. Энэхүү сайхан санаачилга ирэх сарын 14-ний тэмдэглэлт өдөр уламжлалын дагуу зохион байгуулагдах юм.скачать dle 12.0