“Гурван үеийн торго хяргасан” уран хатгамалч

Намайг С.Буд гэдэг. Би монгол уран хатгамлаар 20 гаруй жил урлаж байна. Миний ээж маш сайхан оёж, хатгадаг, аав маань мод, чулуу гээд олон төрлийн зүйл урладаг уран дархан хүн байлаа.

Энэ хугацаанд миний бүтээлүүдийг тоолох аргагүй болсон. Ялангуяа даалин, хавтага их урласан. Миний ажлын хамгийн онцлог нь хуучны торго ашигладаг. Хуучны торго надад яг л амьтай мэт санагддаг. Атирч хумигдсан торгыг зөөлөн индүүдэхэд дахин “амьсгалж” байгаа юм шиг мэдрэмж төрдөг. Түүн дээрх дүрс, хээ бүр өөрийн гэсэн гүн утга, түүхийг агуулдаг. Тиймээс би торгон дээрх хээг аль болох бүтнээр нь хадгалж, бүтээлдээ шингээхийг зорьж, давтагдашгүй, цорын ганц бүтээл хийхийг эрхэмлэдэг.

Заримдаа өөрийгөө “гурван үеийн торго хяргасан хүн” гэж боддог. Богд хаан, Дондогдулам хатны үеийн 100 гаруй жилийн настай торго, эцэг эхийн минь үеийн орос торго, мөн өөрийн цаг үеийн торго гээд гурван өөр цаг хугацааны амь, түүхийг бүтээлдээ нэгтгэж явна.

Миний хамгийн онцлог бүтээл бол “Алтан соёмбо”. Энэхүү бүтээлээ 2020 онд эхлүүлж, 2022 онд дуусгасан. Бүтээлдээ зээгт наамлын аргыг ашиглаж, деталь бүрийг зүү ороох хатгамлаар баяжуулсан. Мөн уламжлалт хавтгай хэлбэрийг товгор шийдэл рүү шилжүүлснээрээ онцлог болсон. Би үргэлж өмнөх бүтээлээсээ илүү өндөр түвшний, цаг хугацааг давсан бүтээл хийхийг зорьдог. Тэр дундаа “Алтан соёмбо”-оосоо давсан шинэ бүтээл төрүүлэхийн төлөө өөрийгөө байнга сорьдог.

Сайн бүтээл урлаачаа дагуулж явдаг, заримдаа бүр чирээд явдаг юм. “Алтан соёмбо” бүтээл маань намайг олон хүнд таниулсан. Би өөрөө очиж амжаагүй газар хүртэл энэ бүтээл намайг төлөөлөн хүрсэн байдаг. Тиймээс би “Алтан соёмбо”-доо маш их хайртай.

Нэг сайн бүтээл урлаачийнхаа өмнөөс хүмүүст зааж, сургаж чаддаг гэдгийг багш маань надад ойлгуулсан. Хэрэв би 50, 100 жилийн настай бүтээл үлдээж чадвал, тэр бүтээл минь миний өмнөөс шавь төрүүлж, мэдлэгийг минь дамжуулж явна. Хожим хараа муудаж, гарын ур дүй суларсан ч сайн бүтээл үлдвэл тэр өөрөө миний оронд “ярьж”, “зааж” чадна гэж боддог.

Өмнөговь аймгийн уугуул, уран хатгамалч С.Будскачать dle 12.0