"The Hu" хамтлаг 10 жилийн ойгоо тэмдэглэнэ

"Чингис хаан" одонт "The Hu” хамтлагийн 10 жилийн ой 2026 онд тохиож байгаа бөгөөд ойн баяраа монголчуудтайгаа хамт эх орондоо тэмдэглэнэ гэдгийг хамтлагийн гоцлол дуучин Г.Нямжанцан өмнө нь мэдээлж байв. Тэгвэл тус хамтлагийнхан ойн баяраа ирэх наймдугаар сард Төв цэнгэлдэх хүрээлэнд монголчуудтайгаа тэмдэглэхээр төлөвлөж байгаа аж. Тоглолтоос гадна хамтлагийн залуус сонсогч фэнүүддээ гурав дахь цомгоороо бэлэг барих гэнэ.
Хамтлагийнхан өнгөрсөн 2024 онд Монголын Үндэсний их баяр наадмаар анхны бүрэн хэмжээний "Нар сар" тоглолтоо эх орондоо толилуулж байсан юм. Тэднийг Их Британийн алдарт "The Guardian" сэтгүүлд "Дэлхийн хөгжмийн ертөнц дэх шинэ үзэгдэл" хэмээн тодорхойлсон байдаг. "The Hu" хамтлагийг 2016 онд Гавьяат жүжигчин, дуучин Б.Дашдондог үүсгэн байгуулсан ба Монгол үндэстний хөгжмийг рок дуугаралттай хослуулсан Монгол рок буюу Хүннү рок урсгалаар тоглодгоороо онцлог. Хамтлаг үндсэн дөрвөн гишүүнтэйгээр 2018 оны есдүгээр сард "Юу вэ, юу вэ, юу” дуугаар дебютээ хийсэн бөгөөд тус дуу юүтүб хуудаснаа 122 сая хандалт авч байлаа.
Энэ дуугаараа дэлхийн рок хөгжмийн урсгалд шинэ салхи авчирсан тэд үргэлжлүүлэн "Wolf Totem", "Shoog shoog" зэрэг дуунуудаа гаргаж, 2019 онд "Gereg" хэмээх цомгоо худалдаанд гаргажээ. Энэхүү цомог худалдаанд гарсан даруйдаа Billboard-ийн World albums төрөлд нэгдүгээр байрт жагссан байдаг.
Монголын уран бүтээлчид эх хэл дээрээ гаргасан уран бүтээлээрээ дэлхий дахины анхаарлыг татна гэдэг ердөө мөрөөдөл төдий байсан цаг саяхан. Харин "The Hu" хамтлаг энэхүү мөрөөдлийг бодит болгож дэлхийд томоохонд тооцогддог “Coachella”, “Hellfest” зэрэг хөгжмийн фестивалиудын тайзнаа тоглож, өнгөрсөн хугацаанд хоёр цомог, дөрвөн сингл цомог гаргаж, Америк, Европ, Австрали, Ази тивд нийт 270 гаруй тоглолт хийсэн юм.скачать dle 12.0