АТГ: Талийгаачийг цагдан хориогүй, сэжиглэн баривчилсан

Авлигатай тэмцэх газраас мэдээлэл хийлээ. Энэ үеэр дуулиан дагуулаад буй зарим  хэргийн талаар асуултад сэтгүүлчид хариулт авсан юм.
-Ерөнхийлөгч асан Ц.Элбэгдоржийг Тавантолгойн ордтой холбоотой асуудлаар шалгаж байгаа гэсэн. Энэ талаар тодруулахгүй юу?
- Монгол Улсын Ерөнхийлөгчөөс, Ерөнхийлөгч асан Ц.Элбэгдоржийг шалгуулахаар баримт материалыг Ерөнхий прокурорт өгсөн. Тухайн асуудал нь манай байгууллага дээр хэрэг бүртгэл нээгдэж, шалгаж байгаа хэрэг байсан. Түүнтэй нь уялдуулан бид Монгол Улсын Ерөнхийлөгч асан Ц.Элбэгдоржоос гэрчийн мэдүүлэг авсан. Энэ нь Тавантолгойн ордоос нүүрс хууль бусаар олборлосон, нүүрс алдагдсан хэрэг юм.  Ингэхэд тухайн газраас олборлосон нүүрсний хэмжээ хоорондоо зөрүүтэй байгаа. Өөрөөр хэлбэл, тухайн байгууллагууд мэргэжилтнүүдээ гаргаад хэмжилтээ хийсэн тоо, Засгийн газраас гаргасан ажлын хэсгийн хийсэн хэмжээ, мэргэжлийн хяналтын газраас хийсэн шинжилгээний тоо зэрэг нь зөрөөд байгаа юм. Тэгэхээр үүнийг тогтоох мэргэжлийн шинжээчийн баг гараад ажиллаж байна. Энэ ажлыг хийгдээд дуусвал хэргийг шийдвэрлэнэ.
-Амиа алдсан шүүгчтэй холбоотой мэдээллийг дэлгэрүүлэхгүй юу. Сэжиглэн баривчлах 48 цагийн хугацаа нь дууссан байсан гэдэг мэдээлэл гараад байна. Энэ үнэн үү?
-Салхитын мөнгөний орд газрыг эзэмшигч, болон ашиглагч нарын хоорондын маргаантай холбоотойгоор уг хэргийг хуулийн байгууллагаас шалгаж байсан юм. Гэтэл шалгалтын явцад их хэмжээний мөнгийг хээл хахуульд өгсөн хэрэг бүртгэгдсэн. Хэрэг бүртгэлт төлөвлөгөөний дагуу явагдсан. Энэ хэрэгт талийгаачийг сэжиглэн баривчилсан юм. Цагдан хориогүй. Мөрдөх байгууллагын хүрээнд талийгаачийн ажлын байр болон гэрт нэгжлэг хийсэн. Ингэх явцад сэжиглэн баривчлах хэмжээний баримтууд хураагдсан. Ингэснээр 48 цагийн хүрээнд сэжиглэн баривчилсан. 48 цаг нь дуусаад очих үед энэ харамсалтай хэрэг гарсан байсан. Үүн дээр цагдаагийн байгууллагаас дэлгэрэнгүй мэдээлэл аваарай. Авлигатай тэмцэх газрын Мөрдөн шалгах хэлтсийн хувьд сэжигтнээр шалгах 48 цагийг хэтрүүлсэн асуудал байхгүй. Хуулийн дагуу тогтоол, шийдвэрүүд цаг хугацааны дагуу байсан. Энэ хэрэг нь Монгол Улсын Эрүүгийн хэрэг хянан шийдвэрлэх тухай хуулийн 31.5-д  зааснаар шүүхийн зөвшөөрөлгүйгээр баривчлах хянан шалгах ажиллагаа байсан. Үүнийг цагдан хорих болон бусад эрхзүйн хэм хэмжээнүүдтэй андуураад буруу тайлбарлаад ташаа мэдээллүүд яваад байх шиг байна. Энэ хэрэг дуусахгүй. Цаашид үргэлжилнэ. Салхитын мөнгөний ордтой холбоотойгоор өнөөдрийн байдлаар цагдан хорьсон хүн байхгүй. Баривчлах ажиллагааны хүрээнд таван хүн баривчилсан.
-Нэр бүхий зургаан шүүгчийн талаарх асуудал юу болж байгаа вэ?
-Нэр бүхий зургаан шүүгч үндэслэлгүйгээр хөрөнгөжсөн гэдэг хэрэг шалгагдаж байгаа. Манай газраас шүүгчдийн хөрөнгө орлогын мэдүүлгийг 2016-2017 оны байдлаар шалгасан. Ингэх явцад нэр бүхий шүүгчид өөрсдийн хөрөнгө орлогын мэдүүлгээ өгөөгүй, зарим нь зөрүүтэй мэдүүлсэн, зарим нь хөрөнгийнхөө эх үүсвэрийг нотолж чадаагүй учраас хэрэг бүртгэлийн хэрэг нээсэн.
-Ерөнхий сайдуудтай холбоотой хэргийн талаар тайлбар өгөхгүй юү?
-Эрүүгийн хэрэг хянан шийдвэрлэх тухай хууль болон Эрүүгийн хууль шинээр батлагдаад 2017 оны долоодугаар сарын 1-ээс мөрдөгдөж эхэлсэн. Энэхүү шинэчилсэн хуулиар мөрдөгчийн бие даан мөрдөн шалгах үйл ажиллагаа явуулах эрхүүдийг хязгаарлаж, ихэвчлэн прокурор, шүүхийн шийдвэртэй хянан шалгах үйл ажиллагаа явуулах эрхүүд байгаа. Тэгэхээр энэхүү хэргүүдийг шалгахад тодорхой хэмжээний цаг хугацаа ордог. Мөн бүрэн эрхтэй хүмүүсийн бүрэн эрхийг нь түдгэлзүүлж байж шалгах хэрэг гарч байгаа тул хүндрэл үүсээд байна. Бүрэн эрхтэй хүмүүсийг бид албадаж, халдашгүй дархан эрхэнд нь халдаж болохгүй. Тодорхой төрлийн тийм хэргүүд манай газар дээр байгаа. Нийгэмд эдгээр нь хүлээлттэй байдаг. Тэгэхээр иргэдийг энэ асуудлыг ойлгоосой гэж хүсье.
-УБТЗ-ын дарга Жигжиднямаатай холбоотой хэрэг ямар шатандаа яваа вэ?
-Энэ хэргийг үргэлжлэн шалгаж байгаа.скачать dle 12.0