“Тал нутгийн марафон”-д 3000 гаруй тамирчин оролцоно

“Тал нутгийн Монгол” олон улсын марафон гүйлтийн 23 дахь удаагийн тэмцээнийг Хүй долоон худагт энэ сарын 8-нд зохион байгуулна.
Тэмцээнийг өсвөр үе, насанд хүрэгчид, ахмад, хөгжлийн бэрхшээлтэй иргэн гэсэн дөрвөн үндсэн ангиллаар зохион байгуулах юм. Оролцогчдын гүйх зай нь 3 км, 5 км, 10 км, 21 км бөгөөд зай тус бүрт эхний гурван байр эзэлсэн тамирчдыг медаль, өргөмжлөл, мөнгөн шагналаар шагнана. Хамгийн холын зай болох 23 км-т түрүүлсэн эрэгтэй, эмэгтэй тамирчдыг хурдан удмын даагаар шагнах аж. Энэ жилийн тэмцээнд зургаан улсын 3000 гаруй тамирчин, гүйлт сонирхогч, оюутан, сурагчид оролцоно.
Монгол Улсын соёл, онгон байгаль, зан заншлыг сурталчлах, хөнгөн атлетикийн спортыг дэлгэрүүлэн хөгжүүлэх, хүүхэд залуучуудын бие бялдрын өв тэгш хөгжлийг хангах, эх оронч үзлийг төлөвшүүлэх, шилдэг тамирчдыг нээн илрүүлэх зорилготой тус марафон гүйлтийн тэмцээний үеэр соёл, урлаг, нийтийн үйлчилгээ, мэдээлэл сурталчилгааны олон ажил зохион байгуулна гэж албаны хүмүүс онцоллоо.
Энэ удаагийн марафон гүйлтийн тэмцээний ерөнхий зохион байгуулагчаар Монголын Хөнгөн Атлетикийн холбоо, ерөнхий ивээн тэтгэгчээр “Мобиком” корпораци “Candy” цахим мөнгө, хамтран зохион байгуулагчаар Нийслэлийн Аялал жуулчлалын газар, Монголын Үндэсний олимпын хороо, Төв аймгийн ЗДТГ болон бусад холбогдох газрууд оролцож байна.
Хэвлэлийн хуралд Монголын Хөнгөн атлетикийн холбооны ерөнхий нарийн бичгийн дарга Ч.Зоригтбаатар, Нийслэлийн Аялал жуулчлалын газрын бодлогын хэрэгжилтийн хэлтсийн дарга В.Батчимэг, Япон Улсын иргэн Кон Аяа, Монголын Үндэсний олимпын хорооны Олимпын боловсрол хариуцсан мэргэжилтэн З.Гомбодорж нар оролцов.
скачать dle 12.0