“ТЭНГЭРИЙН ТОЙРОГ” ТӨСЛИЙН МЭДЭГДЭЛ

Бид Улаанбаатар хотын авто замын түгжрэлийн гол хэсэг болоод байгаа Их тойрууд давхар гүүрэн зам байгуулах “Тэнгэрийн тойрог” төслийг 2011 онд эхлүүлэн, сүүлийн 5 жилд идэвхитэй ажиллан өнөөдрийг хүрсэн бөгөөд энэхүү нөр их хөдөлмөрийн маань үр дүн гарч Монгол улсын засгийн газрын шийдвэр гарсанд бид маш их баяртай байна. Гэвч манай төслийг үл ойлгох, мушгин гуйвуулах үйл ажиллагааг зарим нэр бүхий улс төрчид манлайлан олон нийтийг төөрөгдүүлж байгаад бид харамсаж байна.

“Тэнгэрийн тойрог” төслийн багийн хамт олон Техник эдийн засгийн үндэслэлийг нарийвчлан боловсруулж, холбогдох төрийняам, агентлагууд, нийслэл Улаанбаатар хотын байгууллагуудтай хамтран ажиллаж, дэмжлэг хүлээсээр ирсэн юм. Бид төслөө 2017 онд Нийслэлийн иргэдийн төлөөлөгчдийн хурлаар 2018 онд Зам тээврийн хөгжлийн яамны шинжлэх ухаан, техникийн зөвлөлөөр хэлэлцүүлж дэмжүүлсэн билээ. Өнгөрсөн хугацаанд төрийн холбогдох яам, агентлагууд, нийслэлийн Захирагчийн ажлын алба, Авто замын хөгжлийн газар, Зураг төслийн хүрээлэн зэрэг мэргэжлийн байгууллагуудтай хамтран ажиллаж мөн дэмжлэг хүлээсэн юм.

Улаанбаатар хотын түгжрэлийг бууруулах энэ төсөлд төсвөөс нэг төгрөг ч гараагүй, цаашид ч гарахгүй бөгөөд гадаадын шууд хөрөнгө оруулалтаар хэрэгжинэ. Төслийн санаачлагч, “Хотын зам” ХХК-ийн захирал, Монгол улсын зөвлөх инженер Б.Атарбаяр нь энэ төсөлдөө зохиогчийн эрхийн гэрчилгээг 2016 онд авсан бөгөөд “Хотын зам” ХХК нь Маршал гүүр, Хаан хаалга, Багшийн дээд сургууль, Сансарын нүхэн гарц, Баруун 4 замаас 10-р хороолол хүртэлх авто замын өргөтгөл шинэчлэлт зэрэг олон бүтээн байгуулалт хийсэн үндэсний компани билээ.

“Тэнгэрийн тойрог” төслийг салбарын яам-Зам тээврийн хөгжлийн яам эхнээс нь тууштай дэмжиж, хамтран ажиллаж ирсэн юм. Төслийг өмнө ажиллаж байсан сайдууд Д.Ганбат, Ж.Бат-Эрдэнэ, Я. Содбаатар одоогийн сайд Б.Энхамгалан нар дэмжсээр ирсэнийг цохон тэмдэглэж байна.

Эхний ээлжинд хэрэгжүүлэх энэхүү 13 км давхар гүүрэн зам нь бидний боловсруулсан нийт 49 км урт гүүрэн замын төслийн нэгээхэн хэсэг юм. Дараагийн ээлжинд Хорин нэгдүгээр хороолол, Сонсголон, Дамбадаржаа, Чулуун овоо чиглэлд 36 км ийм давхар зам барьж Их тойруутай холбосноор Улаанбаар хотын авто замын түгжрэлийг бүрэн шийдэх юм.

Төслийн багийн хамт олны зүгээс бидний ажлыг зөвөөр ойлгож, дэмжиж хамтран ажиллахыг улс төрчид, мэргэжилтнүүд, бүтээн байгуулалтын компаниуд, ард иргэдэд уриалж байна. Монгол улсын эдийн засагт томоохон түлхэц өгч, замын түгжрэлээс үүдэлтэй үргүй зардал, цаг хугацааны алдагдал, нийгмийн стресс бухимдлыг арилгаж,үндэсний олон арван гүйцэтгэгч, ханган нийлүүлэгч компаниудын ашиг орлогыг нэмэгдүүлж, олон мянган ажлын байр бий болгох энэ төслийг хэрэгжүүлэх, бүгдээрээ дэмжих цаг ирлээ. Бид 2019 онд олон нийтийн цахим сүлжээнд 200 мянган хүний дунд хийсэн тандалт судалгаагаар нийт хүмүүсийн 97 хувь нь “Тэнгэрийн тойрог” төслийг дэмжиж байсан юм.

Санал, санаачлага гаргаж, хөдөлмөрлөн зүтгэж байгаа үндэсний мэргэжилтнүүд, инженерүүдээ гутаан доромжилж, улс төржүүлдэг зүй бус үзэгдэл манай нийгэмд заншил болон тогтож байгаад бид харамсаж байна. Гэвч зөв үйл, зөв санаа, зөв тооцоо хэзээд хэрэгждэгийг бид “Мянгуужингийн зам” хэмээн адлуулж байсан “Мянганы зам”-ын хэрэгжилтээс, Улаанбаатар хотын утааг бууруулсан үйл ажиллагаанаас, одоо хэрэгжиж байгаа Төмөр замын бүтээн байгуулалтаас харж байгаа билээ.

Монгол орон минь өнө мөнхөд мандан бадарч хөгжин дэвжих болтугай.