МОНЦАМЭ агентлаг 101 жилийн өмнөх энэ өдөр анхны мэдээгээ дэлхий дахинд түгээжээ

Монголын цахилгаан мэдээний агентлаг МОНЦАМЭ “Монголчуудын бослого” нэртэй анхны мэдээгээ одоогоос 101 жилийн өмнөх энэ өдөр буюу 1921 оны гуравдугаар сарын 18-нд бэлтгэж, тухайн үеийн Алс Дорнодын Бүгд Найрамдах Улсын Дальта агентлаг руу дамжуулсан байна. Жанжин Д.Сүхбаатарын даалгавраар тухайн үеийн Монгол ардын хувьсгалт армийн Улс төрийн газрын зөвлөх-сургагчаар ажиллаж байсан Оросын иргэн И.Г.Демко уг мэдээг бичиж, “МОНТА мэдээлэв” хэмээн Дальта агентлагт уламжилжээ. И.Г.Демко хожим дурсахдаа, "Би 1921 оны гуравдугаар сард Монгол ардын хувьсгалт армийн Улс төрийн газрын даргын дэргэд зөвлөх-сургагч, Монголын цахилгаан мэдээний агентлаг /МОНТА буюу Монгольская Телеграфная Агенство/-ийн эрхлэгчээр томилогдон ажиллаж байсан. Гуравдугаар сарын 18-ны өдөр МАН-ын Төв хороо, Монгол ардын хувьсгалт түр засгийн газар монголын газар нутгийн тэр хэсгийг өөрийн мэдэлд чөлөөлөн авсны дараа Монголын цахилгаан мэдээний газрын эрхлэгчийн хувьд Москва руу РОСТА агентлагийн нэр дээр Монголын газар нутаг дээр Ардын хувьсгалт түр засгийн газар тогтоосон тухай мэдээг явуулсан" хэмээжээ. Жанжин Д.Сүхбаатарын удирдлага дор Монгол ардын журамт цэргүүд 1921 оны 3 дугаар сарын 18-ны өдөр Хиагтыг гамин цэргүүдээс чөлөөлсөн тухай агуулга бүхий энэхүү мэдээг 1921 оны 3 дугаар сарын 30-нд Дальта агентлагаас РОСТА агентлаг дамжуулан мэдээлснийг эх сурвалж болгон Оросын “Правда” сонинд нийтэлж, дэлхий дахины сонорт Монголын хувьсгалчдын харийн түрэмгийлэгчдийн эсрэг хийсэн анхны томоохон ялалтыг тунхаглажээ. Улмаар, 1921 оны долоодугаар сарын 19-нд Засгийн газрын зургаадугаар хурлаар Дотоод хэргийн яамны харьяанд “Шуудан бичиг, цахилгаан мэдээний ерөнхий хороо”-г албан ёсоор байгуулсан нь өнөөгийн "МОНЦАМЭ агентлаг" төдийгүй, Монголын хэвлэл мэдээлэл, сэтгүүл зүйн салбарт шинэ хуудас болсон юм. Энэ үеэс хойш "МОНЦАМЭ агентлаг" Монголыг олон улсад сурталчлах үүргээ нэг зууны турш амжилттай биелүүлжээ. Өнөөдрийн байдлаар, орос, хятад, япон, англи хэлээр болон босоо монгол бичгээрээ долоо хоног тутмын сонин гаргахаас гадна таван хэлээрх өдөр тутмын мэдээллийн “www.montsame.mn” цахим хуудсыг ажиллуулж байгаа нь Монголдоо анхдагч юм. Мөн улирал тутмын “Mongolia Today” сэтгүүлийг эрхлэн гаргахаас гадна англи, орос хэлээр " МОНЦАМЭ Daily news", "МОНЦАМЭ новости" товхимолоо уншигчдын гарт хүргэж байна.скачать dle 12.0