Д.Батгэрэл: Монгол дайчин “UFC”-ийн дэвжээг байлдан дагуулахаар ирснийг дэлхий нийтэд харуулах болно

Мэргэжлийн холимог тулааны “UFC” холбоонд хүч үзэж байгаа Монголын анхны тамирчин Д.Батгэрэл ээлжит тулаанаа АНУ-ын тамирчин Крис Гутиерезын эсрэг гуравдугаар сарын 27-нд буюу энэ долоо хоногийн ням гаригт хийх билээ. Тэрээр “UFC” холбоонд нийт дөрвөн тоглолт хийж, үүний гуравт нь хүнд цохилтоор ялалт байгуулаад байгаа юм. Бид түүнтэй тулааны өмнөх сэтгэгдэл болон бэлтгэлийн явцын талаар товчхон ярилцлаа.
-“UFC”-д тун удахгүй тав дахь тулаанаа хийх гэж байна.  Бэлтгэл нь хэр сайн хангагдаж байна?
-Тулаан АНУ-ын Охайо мужийн Колумбус хотод 3 сарын 26-нд / АНУ-ын цагаар / болно. Би тулаандаа бэлдэхээр нэгдүгээр сард АНУ-д ирж өнөөдрийг хүртэл “Jackson Wink MMA Academy”-д бэлтгэлээ хангаад байж байна. Сүүлийн таван жилийн хугацаанд энд тогтмол бэлтгэл хийж байгаа бөгөөд урьд урьдынхаасаа улам бүр сайжирч байгаа гэж бодож байна. Бэлтгэл ч гэсэн сайхан хангагдаж, сэтгэл санаа маш өөдрөг байна.
-Та энэ удаагийн тулааны талаар ямар бодолтой байна. Өмнөх тулаануудаас юугаараа ялгаатай байна гэж бодож байна?
-Энэ удаагийн тулааны гол онцлог бол одоогийн байдлаар би “UFC”-д гурав дараалж хүнд цохилтоор ялаад байна. Энэ амжилт цааш яаж үргэлжлэх вэ гэдэг нь сонирхол татаж буй. Хэрэв дахин хүнд цохилтоор ялж чадвал мэргэжлийн холимог тулааны “UFC”-д дараалж хүнд цохилтоор ялснаараа топ хоёрдугаарт эрэмбэлэгдэх боломжтой болно. Одоогоор топ энэ амжилтаараа гуравдугаар байранд эрэмбэлэгдэж байгаа.
-Өрсөлдөгч тамирчин болох Крис Гутиерезын талаарх судалгаа хийгдсэн байх. Тухайн тамирчны онцлог, гол арга барилынх нь талаар танилцуулахгүй юу?
-Аливаа тэмцээний өмнө өрсөлдөгчөө багаараа судалж тактик боловсруулж, хамтдаа ярилцдаг. Крис Гутиерез  “UFC”-д ороод зургаа тулалдсанаас тав ялж, нэг тэнцсэн амжилттай. Босоо суурьтай, гар хөл жигд тамирчин, Гол төлөв хөлөөр довтолгоо хийж, хөл рүү анхаарал хандуулж байгаад толгой руу довтолдог арга барилтай гэж хэлж болно. Мэдээж бас барилдана, жюүжицугийн ягаан бүстэй юм билээ. Сонирхолтой тулаан болох байх гэж бодож байна.

-Таны хувьд тулааны өмнө хийдэг тогтсон зүйл бий юу. Хэрэв тийм бол тухайн үйлдлийг яагаад хийдэг вэ?
-Монгол хүн, Монголын агуу түүхээрээ бахархаж омогшиж явдаг. Тал нутгийг минь санагдуулсан сайхан уртын дуунууд сонсож, эрч хүч авч бахархах сэтгэл төрдөг. Харин “UFC”-гийн октагонд ороод “монгол” гэж улсаа дуудуулж, өөрийн болон аавынхаа нэрийг сүр жавхлантайгаар зарлуулахад ихээр омогшиж, дайнд орж буй дайчин мэт сэлмээ сугалан урагшаа довтолдог.
Мөн миний тулааны дуу болох “The HU” хамтлагийн “Sugaan Essena буюу Хар аянга” дуу надад маш их эрч хүч өгдөг. Энэ дууг “The HU”-ийн продюсер Б.Дашдондог ах албан ёсны эрхтэй тулааны өмнө эгшиглүүлэх зөвшөөрөл өгсөн. Энэ дуу нь тэнгэрийн хэлээр буюу ХIII зууны хэлээр дуулсан онцлогтой алдарт “Star Wars” киноны дуу юм.
-Тулаан бүр мэдээж маш амаргүй болдог байх. Гэсэн хэдий ч таны хувьд өмнөх гурван тулаандаа өрсөлдөгчөө нэгдүгээр үед хүнд цохилтоор буулган авсан. Таны тулааны гол онцлог юу вэ. Мөн энэ удаагийн тулаанд Монголчууд болон дэлхий нийтэд юуг харуулахыг хүсч, зорьж байна?
-Монголын дайчин түүх бол агуу. Үүнийг дэлхий нийт мэднэ. Өнөө үед ч гэсэн монгол дайчин, баатруудын удам залгаа дэлхийн энэ дэвжээн дээр хүртэл байлдан дагуулахаар ирснийг дэлхий нийтэд харуулахыг зорьдог.
-Мэргэжлийн холимог тулааны дэлхийн шилдэг “UFC”-ийн дэвжээнд тулалдаж буй нь танд хэр хариуцлагатай байхыг сануулдаг вэ. Олон гаднын орны тамирчид, үзэгчид таныг Монголоор төлөөлж харах болно. Таны хувьд энэ бүгдэд баримталдаг зарчим юу вэ?
-Холимог тулааны дэлхийн шилдэг холбоо болох “UFC”-д Монгол Улсынхаа далбааг мандуулж байгаадаа маш их бахархаж, баярлаж явдаг. Үүний зэрэгцээ томоохон хариуцлага дагаж ирдэг гэж боддог. Амжилт гаргаснаар цаашид Монголын олон тамирчдын хувьд дараа дараагийн үүд хаалгыг нээх болов уу гэж итгэдэг дээ.
Монголд зөвхөн холимог тулаан бус, ер нь л мэргэжлийн спортууд өндөр хөгжөөсэй гэж хүсч байна. Үүнтэй холбогдуулаад бас та бүхэнд шинэхэн мэдээ дуулгахад “UFC GYM”-ийг Монгол Улсдаа албан ёсны эрхтэйгээр оруулж ирэх эрхээ саяхан авлаа. Монгол хүн бүр эрүүл байж, спортоор хичээллэж, мөн цаашлаад олон тамирчдыг мэргэжлийн түвшинд бэлдэх болно!
-Таныг дэмжиж буй маш их хүмүүс бий. Тэрхүү хүмүүстээ хандаж та юуг хэлэх вэ?
-Тулаан сонирхогч фенүүд улам их болж байгаад баяртай байна. Өөрийн зүгээс хамгийн дээдээр хичээж, хийж болох бүхий л зүйлсээ хийх болно. Багш дасгалжуулагч хамт олон болон гэр бүл найз нөхөд, намайг дэмждэг бүх хүмүүстээ баярлалаа!
-Ярилцсанд баярлалаа. Таны тулаанд амжилт хүсье.

Бидний яриа ийнхүү дууссан юм. Тэрээр тулааны дараахан Монголдоо ирэхээр төлөвлөсөн бөгөөд бид “Дэлхийн Монгол” буландаа дахин дэлгэрэнгүй ярилцахаар болсон юм. Тун удахгүй түүний дэлгэрэнгүй ярилцлагаар дахин уулзацгаая!

скачать dle 12.0