Тэр эмэгтэй би хүн дайрчихлаа гээд утсаар яриад байсан

Одоогоос найм хоногийн өмнө Баянзүрх дүүргийн 26 дугаар хороо “Олимп” хотхоны ойролцоо “Ланд Круйзер-200” маркийн автомашин хашлага давж, эсрэг урсгалын долоон автомашин мөргөсөн осол гарсан. Тус ослоор долоон машин, хоёр хүүхэд эрүүл мэндээр хохирсон. Энэ талаар цахим хуудас, зарим мэдээллийн сайтад олон төрлийн мэдээлэл гарч буй. Бид осол гарах үед тухайн процессыг харж, гэмтсэн хүүхдэд анхны тусламж үзүүлсэн сурагчаас мэдээллийг тодрууллаа. Тэрбээр ЕБС нэгэн сургуулийн 10 дугаар ангид сурдаг аж.
"СУРАГЧ ОХИНЫ ӨВДӨГ ИХ ХҮНД ГЭМТСЭН ХАРАГДСАН"
Тэрбээр "Тухайн өдөр манай хичээл 13:30 цагт тарж, найзуудтайгаа тоглосон. Орой 18:30-19:00 цагийн үед биллъярднаас гарч ирээд "Олимп" хотхоны ард талын явган хүний замаар алхаж байсан. Гэтэл гэнэт "Эмралд" болон "Баянмонгол" хорооллын дундуур цагаан өнгийн дизель “Land cruiser” маркийн машин хүчтэй эргэж гарч ирсэн. Тухайн үед жолооч нь эмэгтэй хүн байсан, хаазаа андуурч дарсан гэж ослын дараа цагдаа нарт хэлж байсан. Осол гаргах үед долоон машины нэгийг цагаан шугам давтал мөргөсөн. Тэгээд эргэж дарахдаа явган хүний замаар алхаж явсан хоёр охиныг мөргөсөн. Нэгийг нь шүргээд, нөгөө охиныг хажуугийн хананд нь наагаад хэсэг газар чирж явсан.

Тухайн үед би 103 руу залгаж, яаралтай түргэн тусламж шууд дуудсан. Түргэн ирэхээс өмнө надтай цуг явж байсан анагаахын сургуульд сурдаг найз минь анхан шатны тусламж үзүүлэхэд хүүхдийн өвдөг цоорч, маш хүнд гэмтсэн харагдсан.

Тэр үед жолооч эмэгтэй машинаас бууж ирэхгүй суугаад байсан. Эмнэлэг, цагдаагийнхан шуурхай ирж тухайн хүүхдэд тусламж үзүүлж, авч явсан. Би гэрчийн хувиар мэдүүлэг өгсөн. Дахиж мэдүүлэг аваагүй. Харин осол гаргасан жолооч эмэгтэйн хажууд хэчнээн хүн байсныг сайн мэдэхгүй. Цагдаа нар архи хэрэглэсэн байж магадгүй гээд мэдүүлэг, авч шалгахаар явсан.

Машинд мөргүүлсэн хоёр хүүхдийн нэг нь шоконд орсон байх, шууд гүйгээд явсан.

Харин жолооч эмэгтэйн хувьд машиндаа удаж, удаж байж бууж ирээд сандраад утсаар яриад байсан. Би хүн мөргөчихлөө, дайрчихлаа гээд яриад байсан. Харин дайруулсан охинд тэр хавиар явж байсан олон хүн тусалсан.

Би охины зорчиж байсан замын дээд талын замаар явж байсан юм. Харахад бол нүд халтирам, охины өвдгийг бүр нүх гарч цоортол нь чирсэн байсан" гэлээ.

СУРАГЧИЙН БАГШ: ЭЦЭГ, ЭХ НЬ МЭДЭЭЛЭЛ ӨГӨХИЙГ ЗӨВШӨӨРӨӨГҮЙ
Осолд өртсөн сурагчдын багшаас мэдээлэл авахыг хүссэн боловч “Хүүхдийн биеийн байдал маш муу байгаа гэдэг ташаа мэдээлэл. Солонгос явж эмчлүүлнэ гэдэг мэдээлэл надад ирээгүй. Нэг сурагч нь эмнэлэгт хэвтэн эмчлүүлж байгаа бол нөгөө нь гадуур эмчилгээ хийлгэж байгаа. Сэтгэл санааны хувьд том цочролд орсон. Гэр бүлийнхний зүгээс намайг ямар нэгэн мэдээлэл өгөхгүй байхыг хүссэн” гэв.
Харин сургуулийн нийгмийн ажилтнаас асуухад “Ангийн багшаар дамжуулж мэдээлэл авсан. Бид хуулийн байгууллага биш учраас мэдээлэл өгөх боломжгүй. Ямартай ч гэрээр эмчилгээ хийлгэж байгаа сурагчийг ангийн багш нь эргэсэн. Гэм буруутай хүн нь ял шийтгэлээ эдлэх байх. Бидний зүгээс сурагчдаа хичээлдээ эргэн явахад нь сэтгэлзүйчтэй хамтраад бүхий л талын дэмжлэг үзүүлнэ гэж ярилцаж байгаа” гэх хариултыг өглөө.
ТЦА: ОСЛЫН ДҮГНЭЛТ ГАРААГҮЙ БАЙХАД ДЭЛГЭРЭНГҮЙ МЭДЭЭЛЭЛ ӨГӨХ БОЛОМЖГҮЙ
Олон нийтийн сүлжээнд жолооч хаазаа андуурч гишгэснээс болоод осол гаргасан гэх мэдээлэл тархаад байгаа билээ.  Энэ талаар Тээврийн цагдаагийн албанаас өчигдөр /2022.10.17/ хэвлэлийн бага хурал хийсэн.
Тодруулбал, ТЦА-ны Урьдчилан сэргийлэх ажил хариуцсан ахлах зохицуулагч Г.ОТГОНТАМИР "Ослыг мөрдөн шалгах ажиллагааг эхлүүлсэн. Баянзүрх дүүргийн 26 дугаар хорооны нутаг дэвсгэр "Олимп" хотхоны хойд замд зам тээврийн осол гаргасан авто машины жолооч нь 29 настай, эмэгтэй М гэгч байсан. Шүүх эмнэлгийн дүгнэлт гараагүй байгаа учраас ослын шалгалтыг 14 хоногоор сунгасан. Ослын дүгнэлт гараагүй байгаа. Хааз, тормоз андуурч дарсан эсэх нь тогтоогдоогүй. Осол гарах үед жолооч архи, согтууруулах ундаа хэрэглээгүй байсан. Мөн хар тамхитай тэмцэх хэлтсээс тест авсан. Тестийн хариу гарсан бөгөөд тухайн жолооч мансууруулах бодис хэрэглээгүй нь тогтоогдсон.

Шалгалтын ажил дуусаагүй бөгөөд тухайн осол гаргасан машины эзэмшигчид ч Зөрчлийн хуулиар хариуцлага тооцно. Мөрдөн шалгах ажиллагаа дууссаны дараа Прокуророос шүүх рүү шилжүүлж, хуулийн хариуцлага тооцно. Шалгалтын ажил үргэлжилж байхад дэлгэрэнгүй мэдээлэл өгөх боломжгүй” гэсэн юм.

скачать dle 12.0