ЗАВХАН: Мөсөн болон цагаан зудтай сумуудад улсын нөөцөөс дахин үнэгүй тэжээл хүргэнэ

Завхан аймагт өнөөдрийн байдлаар 45 мянга гаруй мал хорогджээ.
Тус аймаг өвс тэжээлийн нөөцийнхөө 82 хувийг бэлтгэсэн, өнөөдрийн байдлаар нийт бэлтгэсэн өвсний 1059,1 тонн, тэжээлийн 701 тонныг зарцуулаад байна. Өнгөрсөн долоо хоногт тус аймагт ажилласан Шуурхай бүлэг аймгийн Онцгой байдлын газарт улсын нөөцөөс үнэ төлбөргүй олгосон 400 тонн тэжээлийг хүргэж өгсөн.
Өдөр шөнийн температурын зөрүүгээс шалтгаалж цасан дээр 2-3 см мөсөн үе үүсэж Нөмрөг, Отгон, Тэс, Тэлмэн сумын нутгаар төмөр буюу мөсөн зудтай байна гэж аймгийн ЗДТГ-аас мэдээлэв.
Цаг уурын өртөө, харуулын ажиглалтын мэдээгээр, нийт сумдын нутгаар цасны зузаан 0-24 см зузаан цасан бүрхүүлтэй байна.

Хамгийн их нь Тэс сумын нутгаар 24 см, хамгийн бага нь Ургамал сумын нутгаар 0 см зузаан цасан бүрхүүлтэй байна.

Өнөөдрийн байдлаар цас ороогүй, хамгийн дулаан нь Ургамал сумын нутгаар -12 градус хүйтэн байна. Шөнөдөө -22...-38 градус хүйтэн, хамгийн хүйтэн нь Отгон сумын нутгаар -38 градус хүйтэн хоносон гэж Завхан аймгийн Ус Цаг уур орчны шинжилгээний газраас нэмж мэдээлэв.
Ташрамд зудын нөхцөл байдлын мэдээллийг Улсын Онцгой комиссын Шуурхай штабаас өдөр бүр мэдээлж байгаа бөгөөд өндөржүүлсэн бэлэн байдлын хүрээнд 7 чиглэлд баг ажилласан бөгөөд улсын нөөцөөс үнэгүй олгож буй тэжээлийг аймгуудад хүргэжээ.
Цаашид хоёр дахь шат буюу Хүнс хөдөө аж ахуйн корпорацийн нөөцөлсөн тэжээлийг мөсөн болон цагаан зудтай байгаа аймаг, сумдад хүргэхээр болжээ.

Тодруулбал, мөсөн зудтай аймгуудад 150 тонн, цагаан зудтай аймгуудад 75 тонн тэжээлийг хүргэх аж.

Завхан аймагт мөн дээрх тэжээл хүргэгдэх юм байна.скачать dle 12.0