Путин батлан хамгаалахын сайд Сергей Шойгуг албан тушаалаас нь огцрууллаа

ОХУ-ын ерөнхийлөгч Владимир Путин тангараг өргөснийхөө дараа засгийн газраа шинээр эмхлэн зохион байгуулж байна.
Энэ ажлын хүрээнд тэр батлан хамгаалахын сайд Сергей Шойгуг албан тушаалаас нь огцруулсан тухай албаны эх сурвалжууд Ням гарагт мэдээлжээ.
Шойгу нь 2012 оноос хойш батлан хамгаалахын сайдаар ажиллаж байгаа, Путиний хамгийн ойр дотны хүмүүсийн нэг юм.
Тэрбээр одоо Николай Патрушевын оронд ОХУ-ын үндэсний аюулгүй байдлын зөвлөлийн нарийн бичгийн даргын албан тушаалд томилогдож байгаа ажээ. Патрушевыг ямар ажилд томилох талаар мэдээлэл тодорхой болоогүй байна.
Зэвсэгт хүчний жанжин штабын дарга Валерий Герасимов албан тушаалдаа хэвээр үлдэхээр болжээ. Хуучин танхимын сайд нараас гадаад хэргийн сайд Сергей Лавров шинэ танхимд үргэлжлүүлэн ажиллахаар болсон байна.
Шойгугийн оронд Путин эдийн засагч Андрей Белоусовыг томилохоор болжээ. Тэрбээр өмнө нь ОХУ-ын ерөнхий сайдын эдийн засаг хариуцсан орлогчоор ажиллаж байсан хүн юм.
 
Андрей Белоусов
Өнгөрсөн сард Шойгугийн орлогч Тимур Иванов авлигын хэргээр баривчлагдсан.
Батлан хамгаалах салбарын барилга, бүтээн байгуулалтын төслүүдийг хариуцдаг байсан дэд сайд Ивановыг Шойгугийн ойр шадар хүн байсан гэдэг.
Украинд явуулж буй дайны ажиллагааны үр дүн тааруу байгааг олон хүн Шойгугийн чадвар мэдлэгтэй холбон тайлбарладаг.
Өнгөрсөн онд онгоцны ослоор амь үрэгдсэн Вагнер хувийн зэвсэгт хүчний тэргүүн Евгений Пригожин амьд ахуйдаа түүнийг “хогийн сав”, “хөгшин алиалагч” гэх мэтээр олны өмнө доромжилж, Оросын армийн чадваргүй байдлын гол буруутнаар нэрлэдэг байсан юм.
Одоо 68 настай Сергей Шойгу 12 жил засгийн газрын сайдаар ажилласан нь Зөвлөлт Холбоот Улс задарсны дараах Оросын түүхэнд байгаагүй өндөр үзүүлэлт юм.
Өмнөд Сибирийн Тувагийн хязгаарын уугуул Шойгу нь бас Зөвлөлтийн уналтын дараа Оросын төрийн өндөр албан тушаалд ажилласан цөөхөн орос биш гаралтай хүмүүсийн нэг ажээ.
Тэрбээр 1994 онд ерөнхийлөгч Борис Ельциний засгийн газарт онцгой байдлын сайдаар анх томилогдож байсан юм.
Цэрэг армийн ажлын туршлагагүй Шойгуг батлан хамгаалахын сайдаар ажилласан он жилүүдэд ОХУ-ын цэрэг Украины Крымийг эзэлж, Сирийн иргэний дайнд Башар Аль Ассадын дэглэмийг дэмжин оролцож байв.
ОХУ-ын батлан хамгаалах сайдын албан тушаалд салбарын бус хүн томилогдсон нь анхаарал татаж байна.
Путиний санаачилсан Андрей Белоусовын томилгоог ойрын үед Оросын парламент батлах юм.
Одоо 65 настай Белоусов нь 1981 онд М.В.Ломоносовын нэрэмжит Москвагийн Улсын Их Сургуулийг “кибернетик-эдийн засагч” мэргэжлээр төгсөж байжээ.
Түүний эцэг Рэм Белоусов мөн Зөвлөлт Холбоот Улсын үеийн томоохон эдийн засагчдын нэг байсан юм байна.
 
Эх сурвалж: Reutersскачать dle 12.0