Б.ОЧИРВААНИЙН ЭЭЖ Н.АМАРСАЙХАН: ХҮҮГЭЭ МАНЧЕСТЕР ЮНАЙТЕДЫН ТОГЛОЛТЫГ ҮЗЭЖ, ДУРТАЙ ХӨЛБӨМБӨГЧИНТЭЙГӨӨ УУЛЗАЖ БАЙГААГ НЬ ХАРААД УЙЛЧИХСАН

Түүний мөрөөдөлдөө хүрэхээр дугуйгаар туулсан зам нь 14000 километр. Тэр аагим халуун зун, шаргал навч, жиндүүхэн салхитай намар, хацар хайрч, цас бударсан өвөл, шинэ бүхэн нахиалж, нар зөөлхөн ээсэн хаврын улирлыг дугуйн дээрээ өнгөрүүлж, мөрөөлөлдөө хүрлээ. "Би заавал Манчестер Юнайтедын тоглолтыг үзнэ ээ" гэж ярьдаг байсан балчир хүү мөрөөдлөө, мөрөөдөл  чигээр нь үлдээх бус хичээвэл биелүүлж чаддаг гэдгийг батлан харууллаа. Улаанбаатараас дугуйгаар Манчестер хотод хүрч, дуртай багийнхаа тоглолтыг үзээд зогсохгүй, багаасаа дэмжиж, хүндэлдэг байсан хөлбөмбөгчинтэйгөө уулзаад баярын нулимс унагааж байгаа Б.Очирваанийн дүрс бичлэг хүн бүрийн сэтгэлд хүрч, түүнтэй хамт нулимсаа арчиж суусан болов уу. 14000 километр зам туулахдаа гаргасан хөлснийхөө үр шимийг ийнхүү хүртсэн Б.Очирваань удахгүй гэртээ, эх орондоо ирнэ. Түүнийг гэртээ ирэхийг хамгийн ихээр хүлээж байгаа, жилийн өмнө мөрөөдлөө биелүүлэхээр явсан хүүгийнхээ араас сүүн цацал өргөж суусан түүний ээж Н.Амарсайхантай ярилцсанаа хүргэж байна.

-Хүү нь мөрөөдлөөрөө жигүүр хийж дуртай багийнхаа тоглолтыг үзэж, хайртай хөлбөмбөгчинтэйгөө уулзлаа. Энэ аялалд гарах болсон талаараа танд хэзээ хэлсэн бэ?                 -Цар тахлын хөл хорионы үеэр мөрөөдлөө биелүүлж, Манчестер Юнайтедын тоглолтыг үзнэ гэж ярьж, бэлдэж эхэлсэн. Анх тэр хол газар руу гүйнэ гээд бэлддэг байсан. Дараа нь дугуйгаар явах нь хамгийн зөв сонголт юм байна гэсэн. Миний санааг зовоохгүй гээд надад дугуйгаар аялж байгаа хүмүүсийн дүрс бичлэгийг их үзүүлсэн. 
 
-Хол газар дугуйгаар явах гэж байгаа хүүдээ их санаа зовсон байх даа? 
       -Би эсэргүүцээгүй ч "Дугуйтай тэр хол газар явах хэцүү юм биш үү" гэж хэлсэн. Гэхдээ дотроо хүүдээ итгэж, мөрөөдөлдөө хүрнэ гэдэгт нь огт эргэлзээгүй ээ. Хээр хононо гэдэгт нь хамгийн их снаа зовж байлаа. Зорьсон газартаа аюулгүй хүрсэнд нь л эгч нь талархаж сууна. Очирваань бага байхын зорьсондоо заавал хүрдэг хүүхэд байсан юм. Хийнэ гэсэн юм нь үргэлж бүтдэг, болдог учраас илүү итгэсэн байх. Эргэн тойрны хүмүүсдээ сайн зэмлүүлсэн шүү, би. "Юу бодож хүүгээ тийм хол газар руу дугуйтай явуулж байна аа" гэсэн хүмүүс байсан. Би тэдний үгэнд биш хүүгийнхээ үгэнд итгэсэн юм.  
-Хүү нь багадаа ямар хүүхэд байсан бэ. Ер нь зорьсондоо хүрдэг зантай бололтой?             -Инээгээд л явж байдаг, даруухан залуу шүү дээ, миний хүү. Хийнэ гэсэн бол хийдэг. Багаасаа хөл бөмбөгт сонирхолтой хашаандаа, сургууль дээрээ, гудамжинд гээд байнга л хөл бөмбөг тоглоод явж байдаг байсан. Манчестер Юнайтедын тоглолтыг үзнэ, өөрөө тоглоно гэж их ярьдаг байсан. Ярьсаар байгаад мөрөөдөлдөө хүрлээ.  
 -Б.Очирваань дуртай хөлбөмбөгчинтэйгөө уулзаж байгаа дүрс бичлэг цахим сүлжээнд тавигдсан шүү дээ. Тэр үйл явдалын дараа хүүтэйгээ холбоо барьсан уу? 
           -Хүүгийнхээ уйлж байгааг хараад эгч нь дагаж уйлаад, хүүгийнхээ өмнөөс баярлаад сайхан байлаа. Утсаар ярьж амжаагүй, чат бичсэн. "Ээжээ хүү нь чадлаа шүү дээ" гэсэн. Өөр юу гэж хэлэх вэ "Чадлаа" гэдэг үг нь л бидэнд сайхан байгаа юм чинь. Өнгөрсөн жилийн тавдугаар сарын 5-нд гэрээсээ гарсан юм. Яг жилийн дараа Манчестер хотод очсон байна. 
 
-Энэ хугацаанд хүүтэйгээ байнга холбоотой байсан байх. Хүү нь аяллынхаа талаар хэр ярьсан бэ? 
            -Ээжийнхээ санааг зовоохгүй гээд сайн, сайхан бүхнийг нь л ярьсан даа. "Яаж байна, дажгүй юу" гэхээр "Зүгээрээ ээжээ, сайн явна" л гэдэг. Ер нь л ээждээ "Энэ бүтэхгүй, болохгүй байна" гэж хэлэхгүй. "Санаа зоволтгүй ээ, болж байгаа" л гэдэг юм. 
-Дуртай спортоороо байнга хичээллэх үү?  
           -Дүүрэг, сургуулийн олон тэмцээнээс медаль хүртсэн. Хөл бөмбөгөөр авсан медаль, амжилт олон бий шүү. Сүүлд лигүүдийн тэмцээнд оролцож байсан.  
-Та хамтдаа дуртай спортынх нь тоглолт, тэмцээнийг үзэж байв уу?            -Дэлхийн аваргын тоглолтыг хамт суугаад телевизээр олон үзсэн. Тоглолт болох өдрүүдэд хэлчихнэ. Бөөн сэтгэл хөдлөлөөр тэр тоглолтуудыг үзнэ шүү дээ. Сайхан дурсамжтай цаг өнгөрдөг юм. Хүүгийнхээ дэмжиж байгаа багийг хамт дэмжээд л суудаг даа. Өөрөө их эмоцитой үзнэ ээ. Дуртай тамирчинтайгаа уулзахдаа сэтгэл хөдлөлөө их дарж байгаа харагдсан. Сэтгэл хөдлөл ихтэй хүүхэд шүү дээ. 
-Мөрөөдөлөө биелүүлээд ирж байгаа хүүгээ угтаж авахдаа хэрхэн бэлдэж байна?            -Миний хүү дугуйгаар туулсан замаа онгоцоор туулаад эх орондоо ирнэ. Хүүгээ онгоцны буудал дээрээс хадаг, сүүтэй угтах өдрөө хүлээгээд догдолж сууна, эгч нь. 

 

Б.ОЧИРВААНИЙН ЭЭЖ Н.АМАРСАЙХАН: ХҮҮГЭЭ МАНЧЕСТЕР ЮНАЙТЕДЫН ТОГЛОЛТЫГ ҮЗЭЖ, ДУРТАЙ ХӨЛБӨМБӨГЧИНТЭЙГӨӨ УУЛЗАЖ БАЙГААГ НЬ ХАРААД УЙЛЧИХСАН

скачать dle 12.0