Хөнгөн атлетикийн ахмадын ДАШТ-аас эх орондоо зургаан алтан медаль авчирсан Ц.Раднаад хүндэтгэл үзүүллээ

Биеийн тамир, спортын улсын хорооны дарга О.Баттулга өнөөдөр Хөнгөн атлетикийн ахмадын ДАШТ-аас эх орондоо зургаан алтан медаль авчирсан Ц.Раднааг хүлээн авч, хүндэтгэл үзүүллээ.
Монгол Улсын Гавьяат тамирчин, Олон улсын хэмжээний мастер, Дэлхийн гүйлтийн рекорд эзэмшигч Ц.Раднаа гуай энэ оны наймдугаар сарын 13-25-ны өдрүүдэд Швед улсын Готенбург хотноо болсон Хөнгөн атлетикийн ахмадын ДАШТ-ий 90-95 насныхны 100, 200, 400, 800, 1500 метрийн гүйлт болон гурвын харайлтын төрөлд алтан медаль хүртсэн бахдам амжилт үзүүлсэн юм. Биеийн тамир, спортын улсын хорооны дарга О.Баттулга уулзалтын үеэр хэлсэн үгэндээ “Иргэн бүрийг идэвхтэй амьдралын хэвшилтэй болгох их үйлсэд манлайлан оролцохын зэрэгцээ уйгагүй хөдөлмөр зүтгэлээрээ улс, эх орныхоо нэрийг дуурсгаж яваа Танд талархал илэрхийлье” гэв.

Ц.Раднаа гуай 95 насандаа ямар амжилт гаргаж болох вэ гэдгээ бодож төлөвлөсөн. Цаашид ч улс, эх орныхоо нэр хүндийг олон улсын тавцанд гаргах бодолтой яваагаа энэ үеэр ярьж байлаа. Түүний амжилтын нууц нь байнгын бэлтгэл сургуулилт аж. Тэрбээр амралтын хоёр өдрөөс бусад өдөрт гүйж, бэлтгэлээ тасалдуулдаггүй. Түүний дараагийн зорилго нь Мастеруудын дэлхийн аварга, 2028 онд болох Ахмадуудын олимпын наадам юм байна.
Хүү Р.Бадрах энэ удаагийн тэмцээнд хамт явсан байна. Тэрбээр “Өмнө нь нэг өдөрт хоёр ч төрөлд оролцдог байсан. Энэ удаагийн тэмцээний эхний гурван төрөл хоёр өдрийн зайтай болсон. Үлдсэн гурван төрөл нь өдөр бүр дараалан боллоо. Тэмцээн болдог өдрүүдэд салхи ихтэй байж таарсан. Настай хүн салхи сөрж гүйх ямар билээ дээ, 1500 метр гэхэд стадионыг бараг дөрөв тойрно гэсэн үг. Энэхүү тэмцээн задгай стадионд болсон бол дараагийн тэмцээн АНУ-д ирэх гуравдугаар сард болно. Тэр тэмцээн битүү стадионд болох тул арай амар байх болов уу гэж бодож байна. Тэмцээний өдрүүдэд гадныхан аавыг их гайхаж байсан. Нэг хүн спортын нэг төрлөөр дагнан хичээллэдэг. Гэтэл олон төрөлд оролцож байгаа нь гайхалтай байна гэцгээж байсан” хэмээв.

Тэмцээн уралдааны дээд амжилтууд:
-2019 онд Польш Улсад болсон Хөнгөн атлетикийн ДАШТ-ээс 3 алтан медаль, нэг рекорд шинэчлэн тогтоосон.
-2019 онд Австрали Улсад болсон Далайн орнуудын мастеруудын хөнгөн атлетикийн аварга шалгаруулах тэмцээнээс,
-М85-Гурвын харайлт-Дээд амжилт
-М85-60м гүйлт-Дээд амжилт
-М85-80м саадтай гүйлт-Дээд амжилт
-М85-200м гүйлт-Дээд амжилт
-85-400м гүйлт-Дээд амжилт үзүүлж таван төрөлд Монгол Улсаа төлөөлж амжилттай оролцсон. 400 м-ийн гүйлтэд үзүүлсэн хувийн амжилтаа 1 секунд 46 долиор ахиулсан.
-2019 онд Малайз Улсад болсон Хөнгөн атлетикийн Ази тивийн аварга шалгаруулах тэмцээнээс 4 алтан медаль хүртэж, хоёр рекорд шинэчилсэн.
2019 онд болсон Ахмад мастеруудын ДАШТ-ий үеэр 85-90 насны ангилалд 400 метрт дэлхийн рекордыг шинэчлэн тогтоосон, одоог хүртэл эвдэгдээгүй байна. Ази тивийн Ахмад мастеруудын уламжлал болон зохиогддог томоохон тэмцээнүүдэд гүйлтийн төрлөөр нийт 11 рекорд амжилтыг шинэчлэн тогтоосон.
-2023 онд Өмнөд Солонгос Улсад болсон Ази Номхон далайн мастеруудын II наадмаас 3 алтан медаль хүртсэн.
-2023 онд Филиппин Улсад болсон Ази тивийн хөнгөн атлетикийн Мастеруудын аварга шалгаруулах тэмцээнд амжилттай оролцож, 800 м, 400 м, 200 м-ийн гүйлтийн төрөлд алт, 4×400-д багаараа мөнгөн медаль хүртсэн.
-2024 онд Тайланд Улсад болсон Мастеруудын IV удаагийн нээлттэй тэмцээний 100 м-ийн гүйлтэд 17,56 секундын амжилтаар өмнөх рекордоо эвдэн алтан медаль, 200 м-ийн гүйлтэт 35,82 секундын амжилтаар өмнөх рекордоо эвдэн алтан медаль, 800 м-ийн гүйлтэд 3 минут 41 секунд 09 долиор рекордоо эвдэн алтан медаль хүртсэн аж.скачать dle 12.0