"Үүрд тэдэнтэйгээ хамт баймаар байна"

Нисдэг тэрэгний ослоор 13 настай охины хамт амиа алдсан сагсан бөмбөгийн домогт тамирчин Коби Брайантын гэргий Ванесса Брайант олон хоногийн дараа анх удаа олон нийтэд мэдэгдэл хийлээ. Түүний мэдэгдлийг бүрэн эхээр нь хүргэе.

“Би болон манай охидод энэ аймшигтай цаг үед сэтгэл зүйн дэмжлэг үзүүлж буй олон сая хүмүүст баярлалаа гэж хэлмээр байна. Бидний төлөө залбирч байгаад тань баярлалаа. Бидэнд яг одоо та бүхний залбирал л хэрэгтэй байна. Хүүхдүүдийнхээ сайн эцэг, халамжит хань Коби болон үзэсгэлэнт охин, сайн эгч, сайн дүү Жианнагаа харамсалтайгаар алдсан нь үгээр хэлэхийн аргагүй хүнд цохилт боллоо. Мөн ням гаригт /2020.01.26/ тус ослоор нас барсан хүмүүсийн гэр бүлийн өмнөөс харамсан гашуудаж байна. Яг одоо мэдэрч буй зовлон шаналлыг үгээр илэрхийлэхэд бэрх байна.  Коби, Жижи хоёр минь өөрсдийг нь хайрладаг олон хүн байгааг мэддэг байсан гэдгийг санаад сэтгэл бага зэрэг тайвшрах шиг болж байна. Тэд бидний амьдралд ирсэн нь маш том адислал байсан юм.

Үүрд бидэнтэй хамт үлдсэн ч болоосой. Харамсалтай нь, тэр хоёр маань биднийгээ хэтэрхий эрт орхин одлоо. Цаашдаа бидний амьдрал ямар байхыг мэдэхгүй, тэдэнгүйгээр амьдралаа төсөөлж ч чадахгүй байгаа ч тэр хоёр минь замыг маань гэрэлтүүлэх учраас амьдралын төлөө үргэлжлүүлэн тэмцсээр байх болно. Тэднийг гэсэн хайр маань эцэс төгсгөлгүй, хэмжээлшгүй их. Тэднийгээ тэвэрч, үнсэхийг ямар их хүсч байна гээч. Үүрд тэдэнтэйгээ хамт баймаар байна.

Аз жаргал, уйтгар гунигийг маань хуваалцаж, биднийг дэмжиж байгаад баярлалаа. Энэ хүнд үйл явдалтай эвлэрэхэд одоо ч хэцүү байгаа учраас бидний хувийн орон зайг хүндэтгэхийг та бүхнээсээ хүсч байна. Бид энэхүү аймшигтай ослоор хайртай хүмүүсээ алдсан бусад гэр бүлүүдэд туслах үүднээс “MambaOnThree” хандивыг эхлүүлсэн юм. “MambaOnThree.org” вэбсайт руу орж хандив өргөхийг хүсч байна.

Коби болон Жианнагийн өсвөрийн спортод оруулсан хувь нэмрийг үргэлжлүүлэхийг хүсвэл “MambaSportsFoundation.org” вэбсайт руу зочилно уу.

Хүнд хэцүү цагт минь сэтгэл санааг дэмжиж, миний гэр бүл болох Коби, Жижи, Капри, Бианка, Натали болон намайг хайрлаж, залбирч байгаа та бүхэндээ баярлалаа”