"Петрочайна Дачин тамсаг" сэг зэм устгаж байсан учраас хуулиа сайн мэдэж байгаа"

Дорнод аймгийн Байгаль орчин, аялал жуулчлалын газрын дарга А.Гантулга:-Байгаль орчин, аялал жуулчлалын яамны ажлын хэсэг гуравдугаар сарын 24-нөөс Дорнод аймагт ажиллаж байна. Энэ явцад олон нийтийн сүлжээнд "Петрочайна Дачин тамсаг" компанийн ашиглалтын талбайд цагаан зээр олноор хорогдсон талаар мэдээлэл цацагдсан. Үүнийг тогтоохоор ажлын хэсгүүд ажиллаж байна. Салбар яамнаас томилсон ажлын хэсэг дээр нэмэгдээд аймгаас Экологийн цагдаагийн албаар ахлуулсан хамтарсан ажлын хэсэг гээд нийт 10 гаруй хүн ажиллаж байна. Бид үүссэн нөхцөл байдлыг шууд дүгнэж хэлэх боломжгүй. Ажлын хэсгийн дүгнэлт, шинжилгээний хариу одоогоор гараагүй байна.

Холбогдох хууль дүрмын дагуу устгах ёстой сэг зэмийг дур мэдэн устгаж байгаа нь хууль бус болж байгаа юм. Мал амьтны сэг зэмийг устгаж, халдваргүйжүүлэх ерөнхий шаардлага, халдвар хамгааллын зааврыг зөрчигдсөн байх магадлалтай.

Байгаль орчны бохирдлыг бууруулах хүрээнд амьтны сэг зэмийг түүж цуглуулсан байж болно. Гэхдээ сэг зэмийг устгахдаа процессын алдаа гаргасан байж болзошгүй. Экологийн цагдаагийн алба болон шүүх шинжилгээний хамтарсан явуулын лабораториар хөрс, ус, амьтны сэг зэмээс дээж авч, өвчлөл, хордлого, цаг агаарын нөхцөл байдлаас болж хорогдсон уу гэдгийг тогтооно. Тус компанийнхан өмнө нь мал, амьтны сэг зэмийг түүж цуглуулж байсан учраас холбогдох хууль журмыг сайн мэдэж байгаа" гэв.
УРЬДЧИЛСАН БАЙДЛААР 300 ЗЭЭРИЙН СЭГ ЗЭМИЙГ ИЛРҮҮЛСЭНДорнод аймагт олон тооны цагаан зээр хорогдож, сэг зэмийг нь "Петрочайна Дачин тамсаг" компани хууль бусаар булах гэж байсан гэх мэдээлэл олон нийтийн сүлжээнд цацагдсан. Энэ талаар Байгаль орчин, аялал жуулчлалын яамнаас тодруулахад "Салбар яамнаас томилогдсон ажлын хэсэг өнгөрөгч Пүрэв гаригаас эхлэн "Петрочайна Дачин тамсаг" компанийн 19 дүгээр талбайд хяналт шалгалтыг хийсэн. Усны гэрээ байгуулаагүй байхад ус ашигласан гэх нөхцөл байдал тогтоогдсон. Мөн тус компани ус ашиглагчийнхаа гэрээг биелүүлээгүй бөгөөд албан ёсны зөвшөөрөлгүйгээр усны цооног гаргасан.

Албаныхан тус газрыг лацдаж, орон нутагт нь хүлээлгэж өгсөн. Химийн аюултай бодисын тусгай зөвшөөрөлтэй ч хадгалалт, хамгаалалтын асуудал зөрчигдсөн.

Газрын гүн рүү шахаж байгаа хуурай хоёр, шингэн нэг бодисын хаяг шошго нь тодорхойгүй байсан. Дээж авч, газар дээр нь тээвэрлүүлж, тооллого хийж, баталгаажуулсан. Мөн цэвэрлэх байгууламждаа 2021 оноос хойш шинжилгээ хийгээгүй байсан. Цаашид зөрчлийн хэрэг үүсгэж, шалгана. Одоо нотлох баримт бүрдүүлж байна. Олон нийтийн сүлжээнд цацагдсан тус компанийн 19 дүгээр талбайд химийн бодисын асуудал үүссэн. Энэ талбай 21 дүгээр талбайгаас 184 километрийн хол зайтай" гэв.

Тус талбайд ажлын хэсэг очиход урьдчилсан байдлаар нийт долоон цэгт 300 орчим зээрийн сэг зэмийг "Петрочайна Дачин тамсаг" ХХК-ийн 21 дүгээр бүсэд устгахаар бэлдэж байсныг илрүүлжээ.

ХХААХҮЯ-ны Мал эмнэлгийн ерөнхий газрын лабораторит шинжилгээ цагаан зээр хорогдсон шалтгааныг тогтоох юм байна. Үүний дараагаар сумын Засаг дарга устгалын цэгийг заан өгч, мэргэжлийн байгууллага хийх аж.
БОАЖ-ын сайд Б.Бат-Эрдэнэ:-Өмнө нь "Петрочайна Дачин тамсаг" компанийн талбай руу нутгийн иргэд нэвтэрч чаддаггүй байсан. Энэ асуудал гуравдугаар сарын 26-нд тодорхой болсон. Манай ажлын хэсэг шуурхай ажиллаж, нөхцөл байдлыг мэдээлсэн. Үүний дагуу Ерөнхий сайд Л.Оюун-Эрдэнэ гурван сайдаар ахлуулсан ажлын хэсэг томилж, үүрэг өгсөн. Арга хэмжээг шуурхай авч байна. Дорнод аймгийн Засаг даргын зүгээс "Петрочайна Дачин тамсаг" компанийн үйл ажиллагаанд өдөр тутмын байгаль орчны чиглэлийн хяналт тавигдаж чадахгүй байна. Тиймээс аймгаас зардал гаргаж, салбар яамнаас хяналт тавих албан ёсны зөвшөөрлийг олгооч ээ гэдэг хүсэлтийг тавьсан. Энэ ажлыг ярилцаж тохиролцож байна. Манай яам тус компанийн тусгай зөвшөөрлийг цуцлах эрхгүй, санал оруулах эрхтэй. Одоо Засгийн газраас ажлын хэсэг гаргаж, дээж авч цагаан зээрийн хорогдлын шалтгааныг тогтоож, халдваргүйжүүлэлтийг хийх ёстой" гэв.

Улсын хэмжээнд 3 сая толгой цагаан зээр бүртгэлтэй байдаг аж.

"ӨМНӨ НЬ ГАЗРЫН ТОС ТЭЭВЭРЛЭЛТИЙН АВТОМАШИН ОСОЛДОЖ, ХӨРСӨНД АСГАРСНЫГ НУУН ДАРАГДУУЛСАН"Дорнод аймгийн Засаг дарга М.Бадамсүрэн өөрийн албан ёсны фэйсбүүк хаягаараа дамжуулан "Хорогдсон Цагаан зээрийн сэг зэмийн талаарх мэдээллийг харьяалах сумын эрх бүхий албан тушаалтан, Мал эмнэлэг, Байгаль орчны байгууллагад мэдэгдэж зөвшөөрөл авахгүйгээр булах үйлдэл гаргаж буй нь хууль зөрчсөн үйлдэл юм. Зүй нь үйл ажиллагаа явуулж буй талбай орчимдоо хорогдсон мал, амьтны сэг зэмийн талаар мэдээллийг холбогдох мэргэжлийн байгууллагад өгч, хорогдсон шалтгаан нөхцлийг тодорхойлох шинжилгээнд хамруулж, дүгнэлтийг үндэслэн халдваргүйтгэл хийж зөвшөөрөгдсөн цэгт булж устгах зохицуулалттай.

Өмнө нь мөн газрын тос тээвэрлэлтийн автомашин осолдож түүхий тос газрын хөрсөнд асгарсныг нуун дарагдуулсан байсан.

Иймд аймгийн Цагдаагийн газрын Экологийн Цагдаагийн алба, Мал эмнэлгийн газар, Халхгол сум, Матад сумын ЗДТГ-аас мэргэжлийн баг бүрэлдэхүүнийг Газрын тосны бүтээгдэхүүн хуваах гэрээт 21, 19 дүгээр талбайд газар дээр нь шуурхай ажиллаж, зэрлэг амьтан их хэмжээгээр хорогдсон шалтгаан нөхцлийг тодорхойлж, холбогдох арга хэмжээг шуурхай авч хэрэгжүүлэхийг даалгалаа. Байгаль орчин, аялал жуулчлалын яамнаас томилогдсон ажлын хэсэг энэ өдрүүдэд тус талбайнуудад ажиллаж байна" гэж мэдээлжээ.скачать dle 12.0